စစ်တပ်အင်အားဖြင့် အာဏာသိမ်းသည့်အဖွဲ့က နိုင်ငံတော်၏အတိုင်ပင်ခံ ဒေါ်အောင်ဆန်းစုကြည်ကို ၎င်းတို့စွပ်စွဲထားသည့် အဂတိမှုဖြင့် နောက်ထပ်ထောင်ဒဏ် (၆)နှစ်ကို ၂၀၂၂ ခုနှစ် ဩဂုတ်လ (၁၅)ရက်နေ့တွင် ချမှတ်လိုက်ကြောင်း သိရသည်။
အာဏာသိမ်းစစ်ကောင်စီလက်အောက်ခံ အဂတိလိုက်စားမှုတိုက်ဖျက်ရေးကော်မရှင်၏ ညွှန်ကြားရေးမှူး ဦးရဲထက်က တရားလိုပြုလုပ် စွပ်စွဲထားသည့် ဒေါ်ခင်ကြည်ဖောင်ဒေးရှင်းကိစ္စနှင့်ပတ်သက်သည့်အဂတိမှုအတွက် နေပြည်တော် အထူးတရားရုံးက ချမှတ်ခြင်းဖြစ်သည်ဟု သိရသည်။ အာဏာသိမ်းအဖွဲ့က ၂၀၂၁ ခုနှစ် ဖေဖေါ်ဝါရီလ (၁)ရက်နေ့အစောပိုင်းတွင် စစ်တပ်အင်အားဖြင့် အာဏာသိမ်းကာ ဖမ်းဆီထားသည့် နိုင်ငံတော်၏အတိုင်ပင်ခံ ဒေါ်အောင်ဆန်းစုကြည်ကို သဘာဝဘေးပုဒ်မ ၊ ပုဒ်မ ၅၀၅(ခ)၊ ပို့ကုန်သွင်းကုန်ဥပဒေ၊ ဆက်သွယ်ရေးဥပဒေပုဒ်မ၊ အဂတိလိုက်စားမှုတိုက်ဖျက်ရေးပုဒ်မတို့ ဖြင့် စုစုပေါင်း ထောင်ဒဏ် (၁၁) နှစ်ချမှတ်ထားပြီးဖြစ်ရာ ယနေ့ ထပ်တိုးသည့်ထောင်ဒဏ်အပါအဝင် စုစုပေါင်းထောင်ဒဏ် (၁၇) နှစ်ရှိသွားပြီဖြစ်သည်။
ယင်းအပြင် အာဏာသိမ်းအဖွဲ့က စွပ်စွဲထားသည့် နောက်ထပ် အမှုပေါင်း (၉)မှုကျန်ရှိနေဆဲဖြစ်သည်။
အာဏာသိမ်းအဖွဲ့က နိုင်ငံတော်၏အတိုင်ပင်ခံပုဂ္ဂိုလ်ကို နေပြည်တောင် အချုပ်ထောင်တွင် လွန်ခဲ့သည့်နှစ်လကတည်းက ပြောင်းရွှေ့ထားခြင်းဖြစ်သည်။
