မြန်မာငလျင်ကယ်ဆယ်ရေးအတွက် ရောက်နေသည့် စင်္ကာပူအဖွဲ့သည် စစ်ကောင်စီက နေရာချထားပေးသည့် နေပြည်တော်မှ နေရာ (၇) ခု နှင့် မန္တလေးမှ နေရာ (၁)ခုတို့တွင် ရှာဖွေကယ်ဆယ်ရေး လုပ်ပေးနေကြောင်း သိရသည်။
စင်္ကာပူနိုင်ငံမှ ကယ်ဆယ်ရေးအဖွဲ့ Operation Lionheart (OLH)သည် အဖွဲ့နှစ်ဖွဲ့ခွဲကာ အဆိုပါနေရာ (၈)ခုတွင် စစ်ကောင်စီ၏ အမျိုးသားဘေးအန္တရာယ်ဆိုင်ရာ စီမံခန့်ခွဲမှုရုံး (NDMO) နှင့် မြန်မာနိုင်ငံမီးသတ်ဦးစီးဌာနတို့ဖြင့် ပူးပေါင်းဆောင်ရွက်နေသည်ဟု သိရသည်။
Operation Lionheart ၏ အဖွဲ့နှစ်ခု အနေဖြင့် ကယ်ဆယ်ရေးလုပ်နေသည့် နေရာ (၈)ခုတွင် ရှာဖွေရေးကို အဆက်မပြတ် လုပ်နိုင်စေရန်၊ ကယ်ဆယ်ရေးလုပ်ငန်းစဉ်များတွင် လုပ်ဆောင်မှုများ ထပ်မနေစေဘဲ ရှာဖွေမှု သေချာစေရန် စီမံလုပ်ဆောင်မှုနှင့်အတူ အဖွဲ့ဝင်များ လုံလောက်သည့် အနားယူမှု ရရှိစေရေးကိုပါ စင်္ကာပူသဘာဝဘေးစီမံဌာနက ကြီးကြပ်ပေးနေကြောင်း သိရသည်။
လက်ရှိတွင် နေပြည်တော်၌ စင်္ကာပူကယ်ဆယ်ရေးအဖွဲ့ OLH အပါအဝင် နိုင်ငံတကာမှ ကယ်ဆယ်ရေးအဖွဲ့များလည်းရှိနေပြီး အချို့နိုင်ငံတကာအဖွဲ့များမှာ မန္တလေးတွင် ရှီနေကြောင်း သိရသည်။
အဖွဲ့ဝင် (၈၈)ဦး ပါဝင်သည့် စင်္ကာပူကယ်ဆယ်ရေးအဖွဲ့သည် ၂၀၂၅ခုနှစ် မတ်လ (၂၉)ရက်နေ့ နံနက်အစောပိုင်းကတည်းက မြန်မာနိုင်ငံကို ရောက်ရှိကာ စစ်ကောင်စီက နေရာချထားပေးသည့် နေရာ (၈)ခုတွင် တောက်လျှောက် ရှာဖွေကယ်ဆယ်ရေးလုပ်ပေးနေခြင်းဖြစ်ကြောင်း သိရသည်။
မတ်လ (၂၈)ရက်နေ့က လှုပ်ခတ်ခဲ့သည့် အင်အားပြင်းငလျင်ကြောင့် ကြီးမားသည့် အပျက်အစီးပုံများအောက်တွင် လူပေါင်းများစွာ ပိတ်မိနေကြသည့်အတွက် စစ်ကောင်စီက ငလျင်ဒဏ်သင့်ဒေသများအားလုံးကို အရေးပေါ်ကြေညာကာ နိုင်ငံတကာအကူအညီများ တောင်းခံထားခြင်း ဖြစ်သည်။
အကူအညီတောင်းခံမှုကြောင့် နိုင်ငံတကာက အရေးပေါ်ကယ်ဆယ်ရေးအဖွဲ့များ စေလွှတ်ခြင်း၊ အရေးပေါ်ကယ်ဆယ်ရေးပစ္စည်းများ၊ ရန်ပုံငွေများပေးပို့ရန် ကမ်းလှမ်းကြသည့်အနက် ပြင်းထန်ငလျင်ဘေးကယ်ဆယ်ရေးအတွေ့အကြုံရှိသည့် ထိုင်ဝမ်ငလျင်ကယ်ဆယ်ရေးအဖွဲ့မှာ ပြည်ဝင်ခွင့်မရကြဘဲ အမေရိကန် Space X ကုမ္ပဏီက ငလျင်ဘေးသင့်ဒေသများတွင် ကြုံတွေ့နေရသည့် ဆက်သွယ်ရေးအခက်အခဲများ ဖြေရှင်းနိုင်ရေးအတွက် စတားလင့်ခ်ပံ့ပိုးရန် ကမ်းလှမ်းမှုမှာလည်း စစ်ကောင်စီ၏ အတည်ပြုမှုကို စောင့်ဆိုင်းနေဆဲဖြစ်သည်။
