စစ်ကိုင်းတိုင်း၊ ကလေးမြို့နယ်အတွင်း UG စခန်းတစ်ခုကို ၂၀၂၂ ခုနှစ်၊ ဩဂုတ်လ (၁၆) ရက်နေ့ နံနက်ပိုင်းတွင် အာဏာသိမ်းစစ်ကောင်စီတပ်က ဝင်ရောက်စီးနင်းပြီး စခန်းကိုမီးရှို့ဖျက်ဆီးသွားသည့်အပြင် အနီးဝန်းကျင်မှ လယ်ယာလုပ်နေသည့် ဒေသခံနှစ်ဦးကို ပစ်သတ်သွားကြောင်း ကလေး PDF တပ်ရင်း -၂ က သတင်းထုတ်ပြန်သည်။

အင်အား ၅၀ ဝန်းကျင်ပါသည့် အာဏာသိမ်းစစ်ကောင်စီတပ်ဖွဲ့က ဝင်ရောက်စီးနင်းခဲ့‌ရာ UG ရဲဘော်များ ဘေးကင်းစွာလွတ်မြောက်ခဲ့သော်လည်း  စခန်းမီးရှို့ဖျက်ဆီးခံခဲ့ရပြီး လက်လုပ်ရိုင်ဖယ် (၁) လက်၊ ဖုန်းနှင့် ပစ္စည်းအချို့ဆုံးရှုံးခဲ့ရကြောင်း သိရသည်။ 

ယင်းအပြင် အာဏာသိမ်းစစ်ကောင်စီတပ်က UG စခန်းအနီး လယ်ယာလုပ်ကိုင်နေသည့် ဒေသခံ ၂ ဦးကိုပါ ပစ်သတ်သွားပြီး လေးအိမ်စုကျေးရွာသို့ ဝင်ရောက်ကာ ပြည်သူ့နေအိမ် ၂ လုံးကို မီးရှို့ဖျက်ဆီးသွားကြောင်း သိရသည်။

ကလေး PDF၊ ကလေးမြို့နယ် ပ.က.ဖ၊ UG ရဲဘော်များက ပြန်လည်ထိုးစစ်စဥ်ရန် လေးအိမ်စုကျေးရွာသို့ချဥ်းကပ်လာစဉ် စစ်ကောင်စီတပ်က လက်ပံခုံကျေးရွာမှာတဆင့် ကလေးမြို့ဒကစတပ်ဘက် ဆုတ်ခွာသွား၍ တိုက်ပွဲမဖြစ်ခဲ့ကြောင်း သိရသည်။