မွန်ပြည်နယ် ရေးမြို့ရှိ အမှတ်(၁၉) စစ်ဆင်ရေးကွပ်ကဲမှုဌာနချုပ်မှ တပ်ကြပ်ကြီးတစ်ဦးအပါ (၆)ဦး လက်နက်ခဲယမ်းများနှင့်အတူ အလင်းဝင်လာသည်ဟု ရေးဘီလူးတပ်ဖွဲ့ထံမှ သိရသည်။

ယနေ့ ၂၀၂၅ခုနှစ် မတ်လ(၁၄)ရက်နေ့တွင် တပ်ကြပ်ကြီးတစ်ဦးအပါအဝင် (၆)ဦးသည် ရေးဘီလူးတပ်ရင်းထံသို့ တပ်ကြပ်ကြီး ကိုင်ဆောင်ထားသော MA-3 တစ်လက်၊ ကျည်ဘောက် (၂)ခု၊ ကျည်(၆၀)နှင့်အတူ အလင်းဝင်လာခြင်းဖြစ်ကြောင်း သိရသည်။

ရေးဘီလူးတပ်ဖွဲ့ထံ အလင်းဝင်လာသူများမှာ တပ်ကြပ်ကြီး ကိုဇူလှိုင်ဌေး၊ တပ်သား စောပြည့်ဟိန်း၊  တပ်သား ဝေယံထွဋ်၊ တပ်သား ခွန်အေးနိုင်စိုး၊ တပ်သား ကျော်သက်ဦးနှင့် တပ်သား ဝေမင်းပိုင်တို့ ဖြစ်သည်။

၄င်းတို့အထဲမှ လက်နက်ခဲယမ်းနှင့်အတူ အလင်းဝင်လာသည့် တပ်ကြပ်ကြီး ကိုဇူလှိုင်ဌေးအား ငွေကျပ်သိန်း(၃၀)ချီးမြှင့်ပြီး မွန်ပြည်နယ်အတွင်း တာဝန်ထမ်းဆောင်နေသော ရဲနှင့် စစ်ကောင်စီတပ်သားများ လာရောက်အလင်းဝင်ကြရန်လည်း တိုက်တွန်းထားသည်။

ရေးမြို့ရှိ အမှတ်(၁၉)စစ်ဆင်ရေးကွပ်ကဲမှုဌာနချုပ်နှင့် (၄)မိုင်အကွာရှိ ကျုံလောင်းကျေးရွာအနီးတွင် စစ်ကောင်စီတပ်နှင့် တော်လှန်ရေးပူးပေါင်းတပ်များ စစ်ရေးတင်းမာနေသည်။

#TachileikNewsAgency