ရခိုင်ပြည်နယ် ကျောက်ဖြူမြို့နယ် ကြတ္တိန်အောက်ရွာကို ၂၀၂၅ခုနှစ် မတ်လ (၇)ရက်နေ့တွင် စစ်ကောင်စီလေတပ်က ဗုံးကြဲတိုက်ခိုက်သဖြင့် နေအိမ် (၃၅)လုံးထက်မနည်း မီးလောင်းပျက်စီးသည်ဟု ဒေသခံများထံမှ သိရသည်။
စစ်ကောင်စီလေတပ်က ကြတ္တိန်အောက်ရွာကို တိုက်လေယာဉ်(၂)စီးဖြင့် ဗုံးကြဲတိုက်ခိုက်ခဲ့ခြင်းကြောင့် နေအိမ်(၃၅)လုံးထက်မနည်း ပျက်စီးသွားပြီး နွားတစ်ကောင် မီးလောင်သေဆုံးသည်ဟု သိရသည်။
“ရွာအနီးမှာ တိုက်ပွဲဖြစ်နေလို့ ဒေသခံတွေရှောင်နေလို့ အထိအခိုက်တော့မရှိဘူး။”ဟု ဒေသခံတစ်ဦးက Tachileik News Agency ကိုပြောသည်။
ကြတ္တိန်ကျေးရွာအနီးတွင် စစ်ကောင်စီတပ်နှင့် အာရက္ခတပ်တော်(AA)တို့ ပြီးခဲ့သည့် ဖေဖော်ဝါရီလကုန်ပိုင်းကတည်းက တိုက်ပွဲဖြစ်နေခြင်းဖြစ်သည်။
စစ်ကောင်စီတပ်သည် မတ်လ(၆)ရက်နေ့တွင်လည်း စစ်တွေမြို့နယ်မှ ဝါဘိုရွာနှင့် ကျောက်ဖြူမြို့နယ်မှ ဦးကင်းရွာတို့ကို ဒရုန်းဖြင့် ဗုံးသီးချ တိုက်ခိုက်ခဲ့သည်။
စစ်တွေမြို့နယ် ကံ့ကော်ကျွန်းရွာတွင် အထိုင်ချထားသည့် စစ်ကောင်စီတပ်က မတ်လ (၆)ရက်နေ့ နံနက်ပိုင်းတွင်လည်း ဝါဘိုရွာကို ဒရုန်း(၁၀)စီးဖြင့် ဗုံးသီးချ တိုက်ခိုက်ခဲ့ခြင်းကြောင့် နေအိမ်(၂၅)လုံးထက်မနည်း မီးလောင်ပျက်စီးသွားသည်။
ပြီးခဲ့သည့် ဇန်နဝါရီလကလည်း ဝါဘိုရွာကို စစ်ကောင်စီတပ်က ဒရုန်းအသုံးပြု၍ ဗုံးကြဲတိုက်ခိုက်ခြင်းကြောင့် နေအိမ်များ ပျက်စီးခဲ့ရသေးသည်။
ထို့အပြင် ကျောက်ဖြူမြို့နယ်ရှိ ဓညဝတီရေတပ်စခန်းဌာနချုပ်(ဓရခ)နှင့် (၃)မိုင်ဝန်းကျင်သာဝေးသော အိမ်ခြေ (၁၇၀)ဝန်းကျင်ရှိသည့် ဦးကင်းရွာကိုလည်း စစ်ကောင်စီတပ်က ဒရုန်းဖြင့်ဗုံးသီးချတိုက်ခိုက်ခဲ့သဖြင့် တစ်ရွာလုံး မီးလောင်ပျက်စီးသွားသည်ဟု ဒေသခံတစ်ဦးက Tachileik News Agency ကို ယမန်နေ့က ပြောသည်။
အာရက္ခတပ်တော်သည် ရခိုင်ပြည်နယ်ရှိ မြို့နယ်ပေါင်း(၁၇)မြို့နယ်အနက် စစ်တွေ၊ ကျောက်ဖြူနှင့် မာန်အောင်မြို့ နယ်တို့ကိုသာ သိမ်းပိုက်ရန် ကျန်ရှိတော့ခြင်းဖြစ်သည်။
#TachileikNewsAgency
Photo: APM
