နွေဦးအောင်ပွဲဟု ခေါင်းစဉ်တပ်လိုသော်လည်း နွေဦးရိုးရာအားကစားပြိုင်ပွဲဟုသာ ခေါင်းစဉ်တပ်၍ ကျင်းပနေသည့် ရှမ်းမြောက် လားရှိုးမြို့အခြေအနေများကို တရုတ်သတင်းဌာနများက ယနေ့ ၂၀၂၅ခုနှစ် ဖေဖော်ဝါရီလ (၁၂)ရက်နေ့တွင် လာရောက်၍ ရိုက်ကူးရေးလုပ်နေသည်ဟု သိရသည်။

ပြည်မမှ တော်လှန်ရေးအင်အားစုများနှင့်အတူ တိုက်ခိုက်သိမ်းပိုက်နိုင်ခဲ့သော အရှေ့မြောက်တိုင်းစစ်ဌာနချုပ် အခြေတည်ခဲ့ရာ လားရှိုးမြို့တွင် ကိုးကန့်တပ်ဖွဲ့(MNDAA)က ဖေဖော်ဝါရီလကုန်အထိ တစ်လကြာ ကျင်းပနေချိန် တရုတ်သတင်းဌာနများက လားရှိုးမြို့အခြေအနေကို လာရောက်ရိုက်ကူးနေသည်ဟု ဆိုသည်။

“ဒီနေ့ တရုတ်ပြည်ကလာတဲ့ မီဒီယာကနေပြီးတော့ လားရှိုးမြို့အကြောင်းတွေကို ပြည်သူတွေနဲ့ အင်တာဗျူးလုပ်ကြတယ်။ လောင်းကစားလုပ်နေတဲ့အခြေအနေတွေ၊ အားကစားပြိုင်ပွဲအခြေအနေတွေ၊ နေထိုင်ရတဲ့အခြေအနေတွေကို မေးသွားကြတယ်။”ဟု သတင်းဌာနများနှင့် တွေ့ဆုံခဲ့သူတစ်ဦးက Tachileik News Agency ကိုပြောသည်။

MNDAA ဘက်က လားရှိုးမြို့ ထွေအုပ်ရုံးအကြီးအကဲ၊ ကိုးကန့်ဆက်ဆံရေးဌာနအကြီးအကဲ၊ တရုတ်ပြည်သူ့ဆက်ဆံရေးရုံးမှ အကြီးအကဲများကိုလည်း မေးမြန်းသွားသည်ဟု ဆိုသည်။

“လက်ရှိဖြစ်ပေါ်နေတဲ့ လားရှိုးမြို့က ပြည်သူတစ်ယောက်အနေနဲ့ နေထိုင်မှုပေါ့ဗျာ။ စားသောက်မှု၊ စီးပွားရေး၊ လူမှုရေးတွေကို‌ မေးတယ်။ ဈေးဆိုင်ခန်းကိစ္စတွေ၊ လောင်းကစားကိစ္စတွေ၊ ပျော်ပွဲရွှင်ပွဲကိစ္စတွေနဲ့ MNDAAရဲ့ အုပ်ချုပ်တဲ့ကာလမှာ ဘာတွေ အားသာချက်ရှိလဲ၊ အားနည်းချက်ရှိလဲဆိုတာတွေ မေးသွားကြတယ်။”ဟု သတင်းဌာနများနှင့်တွေ့ဆုံခဲ့သူတစ်ဦးက ပြောသည်။

MNDAA သည် နွေဦးရိုးရာအားကစားပြိုင်ပွဲ မစတင်မီက နွေဦးအောင်ပွဲဟု အမည်တပ်၍ အားကစားပြိုင်ပွဲကို ကျင်းပရည်ရွယ်ခဲ့ခြင်းဖြစ်ပြီး ယနေ့ ပင်လုံစာချုပ် ချုပ်ဆိုသည့်နေ့တွင် ဆုပေးပွဲများပါ ပြုလုပ်မည်ဟု သိရသည်။

အာကစားပြိုင်ပွဲများအဖြစ် စားပွဲတင်တင်းနစ်၊ ဖူဆယ်ဘောလုံး၊ ပိုက်ကျော်ခြင်း၊ ကြက်တောင်အားကစား၊ မာရသွန်အပြေးပြိုင်ပွဲများအပြင် ပြည်ထောင်စုနေ့တွင် ပြုလုပ်နေကျ ရိုးရာအားကစားနည်းများလည်း ပါဝင်သည်ဟု သိရသည်။

အရှေ့မြောက်တိုင်းစစ်ဌာနချုပ်တည်ရှိခဲ့သော လားရှိုးမြို့ကို ၂၀၂၄ခုနှစ် ဩဂုတ်လ (၃)ရက်နေ့တွင် MNDAA နှင့် တော်လှန်ရေးတပ်များက သိမ်းပိုက်ရရှိခဲ့သည်။

MNDAA သည် ၁၀၂၇ စစ်ဆင်ရေးအတွင်း တရုတ်-မြန်မာ နယ်စပ်ဂိတ်ရှိ ချင်းရွှေဟော်မြို့ အပါအဝင် လားရှိုး၊ လောက်ကိုင်၊ မုံးကိုး၊ တာမိုးညဲ၊ ကုန်းကြမ်း၊ ကွမ်းလုံ၊ သိန္နီ၊ ပန်ဆိုင်း (ကြူကုတ်)၊ ဖောင်းဆိုင်နှင့် ဟိုပန်မြို့များကို သိမ်းပိုက်နိုင်ခဲ့သည်။ 

ထို့နောက် စစ်ကောင်စီနှင့် MNDAA တို့သည် တရုတ်နိုင်ငံ အနောက်တောင်ပိုင်း ကူးမင်းမြို့၌ ဇန်နဝါရီလ (၁၆)ရက်နေ့ကစတင်၍ နှစ်ရက်တာ တွေ့ဆုံဆွေးနွေးခဲ့ပြီးနောက် အပစ်ရပ်သဘောတူလက်မှတ်ရေးထိုးခဲ့ကြသည်။

ကိုးကန့် MNDAA တပ်ဖွဲ့နှင့် စစ်ကောင်စီတို့ တရားဝင် အပစ်ရပ်လိုက်ပြီးနောက် "ဝ"ပြည်မှ ကိုးကန့်ဒေသကို လွတ်လပ်စွာ ကုန်စည်ဖြတ်သန်းခွင့်ကိုလည်း ခွင့်ပြုလိုက်သည်။

ထို့နောက် MNDAA ခေါင်းဆောင် ဖုန်တာရွှင်ကိုလည်း တရုတ်ဘက်က ပြန်လွှတ်ပေးလိုက်ပြီးနောက် နယ်စပ်ဂိတ်များနှင့် MNDAA ထိပ်ပိုင်းခေါင်းဆောင်များ၏ ဘဏ်အကောင့်များအား တရုတ်ဘက်က ပြန်ဖွင့်ပေးလိုက်သည်ဟု သိရသည်။

စစ်ကောင်စီနှင့် MNDAA တို့သည် မတ်လအတွင်း ထပ်မံဆွေးနွေးရန်ရှိနေပြီး အဆိုပါဆွေးနွေးမှုမအောင်မြင်ပါက စစ်ကောင်စီ၏ လေကြောင်းရန်အတွက် လားရှိုးမြို့နေဒေသခံများ ကြိုတင်ပြင်ဆင်ရန် အသိပေးခြင်းများ ရှိနေသည်ဟုလည်း သိရသည်။

#TachileikNewsAgency

Photo:果敢资讯网 (နွေဦးရိုးရာအားကစားပြိုင်ပွဲကျင်းပနေသည့် ပုံရိပ်များ)