စစ်အာဏာသိမ်း လေးနှစ်အတွင်း မြန်မာ့သတင်းမီဒီယာ လွတ်လပ်ခွင့် ပျောက်ဆုံးနေမှုနှင့် လွတ်လပ်စွာ ထုတ်ဖော်ပြောဆိုခွင့် ဆိတ်သုန်းနေမှုအပေါ် ကန့်ကွက်ရှုတ်ချကြောင်း လွတ်လပ်သောမြန်မာသတင်းမီဒီယာကောင်စီ (IPCM) က ယနေ့ ၂၀၂၅ ခုနှစ် ဖေဖော်ဝါရီလ (၁) ရက်နေ့တွင် ထုတ်ပြန်သည်။

အာဏာသိမ်း လေးနှစ်တာကာလတွင် မြန်မာနိုင်ငံအတွင်း သတင်းမီဒီယာသမား (၂၀၀)ကျော် မတရားဖမ်းဆီးခံခဲ့ရပြီး သတင်းမီဒီယာသမား (၇) ဦးမှာ ဥပဒေမဲ့ သတ်ဖြတ်ခြင်းခံခဲ့ရကာ (၄၃)ဦးမှာ ယနေ့အချိန်အထိ နိုင်ငံတွင်း အကျဉ်းထောင်အသီးသီးတွင် မတရားသည့် ဥပဒေများ ၊ သတင်းမီဒီယာသမားများနှင့် သက်ဆိုင်ခြင်းမရှိသည့် အကြမ်းဖက် ဥပဒေများဖြင့် အရေးယူခံရပြီး ထောင်ဒဏ်ကျခံနေရဆဲဖြစ်ကြောင်း သိရသည်။

လက်ရှိအချိန်အထိ စစ်ကောင်စီတပ်အနေဖြင့် ပြည်သူလူထုအပေါ် အကြမ်းဖက်မှုများကို ပိုမိုအရှိန်မြှင့်လုပ်ဆောင်မှုကြောင့် အရပ်သားများ ထိခိုက်သေဆုံးခြင်း ၊ မြို့ရွာများ ပျက်စီးဆုံးရှုံးရခြင်း ၊ နေရပ်စွန့်ခွာ တိမ်းရှောင်ရခြင်းများ ကြုံတွေ့ခံစားနေရဆဲဖြစ်ပြီး မတရားစစ်မှုထမ်းခိုင်းခြင်း ၊ လူမှုဘ၀ မလုံခြုံခြင်း ၊ ရာဇ၀တ်မှု ထူပြောခြင်းများကို ရင်ဆိုင်ခံစားနေရသည်ဟု ဆိုသည်။

အခြားတဖက်တွင်လည်း ဆိုင်ဘာလုံခြုံရေး ဥပဒေကို မတရားပြဌာန်းခဲ့သည့်အတွက် လူထုအနေနှင့် လွတ်လပ်စွာ သတင်းသိရှိပိုင်ခွင့်များ ဆုံးရှုံးစေပြီး အွန်လိုင်း/ဒစ်ဂျစ်တယ် သတင်းစီးဆင်းမှုကို ဆိုးရွားစွာ ထိခိုက်မှုရှိခဲ့ကာ ထိုလုပ်ရပ်သည် သတင်းမီဒီယာလွတ်လပ်ခွင့်ကို တိုက်ရိုက်ထိပါးနေသည်ဟု မှတ်ယူကြောင်း IPCM က ဆိုသည်။

ယနေ့ထိ စစ်ကောင်စီတပ်၏ မီဒီယာဖိနှိပ်မှုများကြောင့် သတင်းမီဒီယာ သမားများနှင့် သတင်းမီဒီယာလုပ်ငန်းများသည် သတင်းလွတ်လပ်ခွင့် အခြေခံများအရ ရပ်တည်နိုင်ခြင်း မရှိဘဲ ၊ ကမ္ဘာ့အဆိုးရွားဆုံး သတင်းလွတ်လပ်ခွင့် ဖိနှိပ်ထိပါးခံရသော ထိပ်တန်းနိုင်ငံ စာရင်းတွင် ပါဝင်နေသည်အထိ အန္တရာယ်ကျရောက်နေကြောင်း IPCM က အသိပေးသည်။

သတင်းလွတ်လပ်ခွင့် ကာကွယ်မြှင့်တင်ရေး ၊ သတင်းမီဒီယာသမားများ သတင်းမီဒီယာလုပ်ငန်းကို လွတ်လပ်စွာ လုပ်ကိုင်နိုင်ရေးအတွက် အဖွဲ့အစည်း အသီးသီးက အလေးထား လုပ်ဆောင်ပေးကြပါရန်နှင့် စစ်ကောင်စီတပ်၏ မတရားလုပ်ကြံ ဖန်တီးထားသည့် သတင်းများအား မြန်မာလူထုအနေနှင့် အထူးသတိပြု စိစစ်ပြီးမှ လက်ခံကြရန် IPCM က တိုက်တွန်းထားသည်။

မြန်မာနိုင်ငံတွင်း စစ်ကောင်စီမှ ပြည်သူလူထုနှင့် သတင်းမီဒီယာသမားများအပေါ် ဖမ်းဆီးနှိပ်စက်သတ်ဖြတ်ခြင်း၊ ဖမ်းဆီးထောင်ချခြင်းများကို ပြင်းထန်စွာ ကန့်ကွက်ရှုတ်ချပြီး ကျူးလွန်မှုများအတွက် တာဝန်ခံမှုရှိစေရန် အလေးအနက် တောင်းဆိုလိုက်ကြောင်း လွတ်လပ်သော မြန်မာသတင်းမီဒီယာကောင်စီ (IPCM) က အသိပေးထားသည်။

#TachileikNewsAgency

#TNA_LE

Photo: ၂၀၂၁ ခုနှစ်က ရန်ကုန်မြို့တွင်ပြုလုပ်သည့် စစ်အာဏာရှင် ဆန့်ကျင်ရေး ဆန္ဒပြပွဲများတွင် ရဲတပ်ဖွဲ့ဝင်များက အကြမ်းဖက်ဖြိုခွဲ၍ သတင်းထောက်များပါ ထွက်ပြေးတိမ်းရှောင်ရစဥ် (ပုံဟောင်း)