ပဲခူးတိုင်း ညောင်လေးပင်မြို့နယ်ကို စက်လှေဖြင့်လာသည့် စစ်ကောင်စီတပ်အား တော်လှန်ရေးတပ်များက တိုက်ခိုက်ရာ စက်လှေနစ်မြှုပ်ပြီး စစ်ကောင်စီတပ်သား(၄)ဦးသေဆုံးသည်ဟု ဒေသခံများထံမှ သိရသည်။
၂၀၂၅ခုနှစ် ဇန်နဝါရီလ(၁၄)ရက်နေ့ နံနက်ပိုင်းက ဝေါမြို့နယ် စက်စုကျေးရွာမှ စစ်ကောင်စီတပ်သားများသည် ညောင်လေးပင်မြို့နယ်အစပ် စစ်တောင်းကမ်းနဖူးသို့လာရာ KNLA ရဲဘော်များနှင့် ပစ်ခတ်မှုဖြစ်သည်ဟု ဆိုသည်။
ပစ်ခတ်မှုအတွင်း စစ်ကောင်စီတပ်သား (၄)ဦးသေကာ စစ်တောင်းမြစ်ထဲတွင် နစ်မြုပ်သွားသောလှေနှင့် သေဆုံး စစ်ကောင်စီတပ်သား(၄)ဦးအား စစ်ကောင်စီတပ်က ပြန်လည်ဆယ်ယူခြင်းမရှိသေးဟု ဆိုသည်။
“စစ်ကောင်စီတပ်သား (၄)ဦး သေတာ အခုအထိ စစ်ကောင်စီတပ်ဘက်က ဆယ်ယူတာ မလုပ်သေးဘူး။ ပေါလော ပေါ်နေတယ်။”ဟု ဒေသခံတစ်ဦးက ပြောသည်။
ယနေ့ ဇန်နဝါရီ(၁၅)ရက်နေ့ ကွင်းဆိပ်၊ သူရဲသူမိန်၊ စက်စု၊ ထင်းကုန်း စသည့်နေရာများကို စစ်ကောင်စီတပ်သား (၃၀)ဝန်းကျင် စစ်ကြောင်းထိုးနေသည်ဟု သိရသည်။
“လက်ရှိတော့ စစ်ဆိုင်ထားတဲ့ အခြေအနေပါ။”ဟု တော်လှန်ရေးရဲဘော်တစ်ဦးက Tachileik News Agency ကို ပြောသည်။
ဇန်နဝါရီလ(၁၄)ရက်နေ့ နံနက်ပိုင်းကလည်း ညောင်လေးပင်မြို့နယ် စီပင်ရွာအုပ်ကြီး မင်းမင်းဦးနှင့် တပည့်များ ကားဖြင့် အင်းအတွင်းမှ ငါးများဖမ်းပြီးအပြန် KNLA တပ်မဟာ(၃)၊ ရင်း(၇)က ပစ်ခတ်သဖြင့် ပျူစောထီးတစ်ဦး သေကာ (၂)ဦးဒဏ်ရာရသည်ဟု သိရသည်။
အုပ်ကြီး မင်းမင်းဦးမှာ ဝမ်းဗိုက်ဒဏ်ရာဖြင့် အတွင်းလူနာ(စိုးရိမ်ရ) ကုသနေပြီး ပျူစောထီးတစ်ဦးမှာ လက် မောင်း ကျည်ထိမှန်ဒဏ်ရာရသည်ဟု သိရသည်။
