စစ်မှုထမ်းစုဆောင်းခြင်းနှင့် ငွေကြေးကောက်ခံခြင်းများ လုပ်ဆောင်နေသည့် ပြည်ခရိုင်အတွင်း ဗြူကုန်းကျေးရွာအုပ်စု၏ အုပ်ချုပ်ရေးမှူး ပစ်ခတ်ခံရ၍ ဆေးရုံသို့ ပို့ဆောင်စဥ် သေဆုံးသွားသည်ဟု သိရသည်။
ပဲခူးတိုင်း ပြည်ခရိုင် ပေါင်းတလည်မြို့ မြို့လှစံပြကျေးရွာတွင် နေထိုင်သည့် ကျေးရွာအုပ်စုအုပ်ချုပ်ရေးမှူး အောင်နိုင်ဦးကို ၂၀၂၅ ခုနှစ် ဇန်နဝါရီလ ( ၇ ) ရက်နေ့ နံနက် ( ၁၁ ) နာရီခန့်တွင် ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ PPDF - ၃၆၀၁ တပ်ရင်း တပ်ခွဲ ( ၃ ) က နေအိမ်သို့ သွားရောက်ပြီး ပစ်ခတ်ခဲ့ခြင်းဖြစ်သည်ဟု ဆိုသည်။
အုပ်ချုပ်ရေးမှူး အောင်နိုင်ဦးသည် စစ်မှုထမ်းစုဆောင်းခြင်း ၊ ပေါ်တာဆွဲရာတွင် လိုက်ပါခြင်း ၊ ကျေးရွာအုပ်စုအတွင်း ပြည်သူများအား စစ်မှုမထမ်းလိုလျှင် တအိမ်ထောင်လျှင် ( ၁ ) လကို ကျပ်သုံးသောင်းမှ ငါးသောင်းကျပ်အထိ ကောက်ခံခြင်းများ ပြုလုပ်သည်ဟု ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့က ထုတ်ပြန်ထားသည်။
၎င်းအား အုပ်ချုပ်ရေးမှူးတာဝန်မှ နှုတ်ထွက်ပြီး စစ်ကောင်စီနှင့် မပူးပေါင်းရန် ဖုန်းဖြင့် ( ၃ ) ကြိမ်ထက်မနည်း သတိပေးထားသည့်ကြားမှ နှုတ်ထွက်ခြင်းမပြုဘဲ ယခင်ကထက် ပိုမိုဆိုးရွားစွာ လုပ်ဆောင်နေသည့်အတွက် အရေးယူရခြင်းဖြစ်သည်ဟုလည်း ထုတ်ပြန်ထားသည်။
