စစ်ကိုင်းတိုင်း မြောင်မြို့နယ် ကျောက်ရစ်ကျေးရွာရှိ စစ်ကောင်စီရဲစခန်းအား တော်လှန်ရေးပူးပေါင်းတပ်ဖွဲ့မှ ဝင်ရောက်တိုက်ခိုက်ကြောင်း မြင်းခြံခရိုင်အမှတ် (၃)တပ်ရင်းထံမှ သိရသည်။

မြောင်မြို့နယ် ကျောက်ရစ်ကျေးရွာရှိ စစ်ကောင်စီရဲစခန်းအား တော်လှန်ရေးပူးပေါင်းတပ်ဖွဲ့က ၂၀၂၄ခုနှစ် သြဂုတ်လ (၂၃) ရက်နေ့တွင် မနက် (၈) နာရီခန့်မှ နေ့လယ် (၁)နာရီခန့်အထိ စစ်ကြောင်း (၃) ကြောင်းခွဲကာ လက်နက်ကြီး ၊ လက်နက်ငယ် ၊ Multi Wings ၊ Shar Htoo WAW နည်းပညာတိုက်ခိုက်ရေး Fixed Wings Drone များဖြင့် ဝင်ရောက်တိုက်ခိုက်ခဲ့ခြင်းဖြစ်ကြောင်း သိရသည်။

တိုက်ပွဲအတွင်း စစ်ကောင်စီမှ လက်နက်ကြီး ၊ လက်နက်ငယ်များဖြင့် ပြန်လည်ပစ်ခတ်ပြီး တိုက်ပွဲစတင်ချိန်မှစ၍ ရေစကြိုဘက်မှ ဟောင်ဝှစ်ဇာ လက်နက်ကြီးဖြင့် (၁၈)လုံးခန့် ပစ်ကူပေးခဲ့ကာ နေ့လယ် (၁၂) နာရီဝန်းကျင်တွင် တိုက်လေယာဉ် (၂)စီးဖြင့် လေကြောင်းတိုက်ခိုက်မှု လုပ်ဆောင်ခဲ့ကြောင်း သိရသည်။

တိုက်ပွဲဖြစ်ပြီး ညအချိန်တွင် ကျောက်ရစ်ကျေးရွာ ရဲစခန်းမှ အလောင်း (၄) လောင်းအား သုံးဘီးဆိုက်တွဲပေါ်တင်၍ တိတ်တစိတ် မြေထွက်မြှုပ်ပြီး ၊ သြဂုတ်လ (၂၄) ရက်နေ့ ညနေပိုင်းတွင်လည်း အလောင်း (၃)လောင်း ထပ်မံ မြေထွက်မြှုပ်သည်ဟု ပြန်လည်သိရှိရကြောင်း မြင်းခြံခရိုင်အမှတ် (၃) တပ်ရင်းက ဆိုသည်။

တိုက်ပွဲအတွင်း စစ်ကောင်စီ၏ လေကြောင်းတိုက်ခိုက်မှုကြောင့် မြင်းခြံခရိုင်အမှတ် (၃)တပ်ရင်းမှ (၇) ဦး ထိခိုက်ဒဏ်ရာရရှိခဲ့ပြီး ၊ (၂) ဦးမှာ ပြင်းထန်ဒဏ်ရာရရှိခဲ့ခြင်းဖြစ်ကြောင်း သိရသည်။

အဆိုပါတိုက်ခိုက်မှုအား မြင်းခြံခရိုင်အမှတ် (၃)တပ်ရင်းနှင့်အတူ ညီနောင်မဟာမိတ်များမှ ပူးပေါင်းဆောင်ရွက်ခဲ့ခြင်းဖြစ်ကြောင်း သိရသည်။

#TachileikNewsAgency