တနင်္သာရီတိုင်း မြိတ်ခရိုင် တနင်္သာရီမြို့နယ်အတွင်းရှိ ကျေးရွာအချို့ကို စစ်ကောင်စီမှ တိုက်ပွဲဖြစ်ပွားခြင်းမရှိဘဲ ဂျက်ဖိုက်တာနှစ်စီးဖြင့် ဗုံးကြဲတိုက်ခိုက်ကြောင်း တနင်္သာရီမြို့နယ် ပြည်သူ့ကာကွယ်ရေးတပ်ဖွဲ့ထံမှ သိရသည်။
တနင်္သာရီမြို့နယ်အတွင်းရှိ ကျွဲထိန်းကုန်းရွာနှင့်အနီးတဝိုက်ကို စစ်ကောင်စီမှ ယနေ့ ဇွန်လ (၂၇)ရက်နေ့ နေ့လယ် (၁)နာရီ (၁၀)မိနစ်အချိန်တွင် တိုက်ပွဲဖြစ်ပွားခြင်းမရှိဘဲ ပြည်သူများကို ပစ်မှတ်ထား၍ ဂျက်ဖိုက်တာနှစ်စီးဖြင့် ဗုံးကြဲတိုက်ခိုက်ခဲ့ကြောင်း တနင်္သာရီမြို့နယ် ပကဖမှ ဆိုသည်။
စစ်ကောင်စီမှ K8w-Jet fighter အမျိုးအစားကိုအသုံးပြု၍ ဗုံးသီး (၁၀)လုံးထက်မနည်း ကြဲချတိုက်ခိုက်ခဲ့ခြင်းဖြစ်ပြီး ဒေသခံပြည်သူများ၏ နေအိမ်တစ်ချို့ ထိခိုက်ပျက်စီးခဲ့ကာ ပြည်သူတစ်ဦး ထိခိုက်ဒဏ်ရာရရှိခဲ့ကြောင်း သိရသည်။
စစ်ကောင်စီက ပြည်သူများနေထိုင်သည့် ကျေးရွာများကို ပစ်မှတ်ထားတိုက်ခိုက်မှုကြောင့် ဒေသခံပြည်သူများ စိုးရိမ်ပူပန်လျှက်ရှိကြောင်း သိရသည်။
ပြီးခဲ့သည့် ဇွန်လ (၁၃)ရက်နေ့ကလည်း တနင်္သာရီမြို့နယ် တကူကျေးရွာရှိ စာသင်ကျောင်းအနီးနှင့် စစ်ရေးပစ်မှတ်မဟုတ်သည့် အရပ်သားနေအိမ်များကို စစ်ကောင်စီမှ Mi-2 ရဟတ်ယာဉ်ဖြင့် ဗုံးသီး (၁၈)လုံးကြဲချတိုက်ခိုက်ခဲ့ပြီး နေအိမ်တစ်လုံး ထိခိုက်ပျက်စီးခဲ့ကာ အရပ်သားတစ်ဦး ထိခိုက်ဒဏ်ရာ(မစိုးရိမ်ရ) ရရှိခဲ့ကြောင်း သိရသည်။
#TachileikNewsAgency
Photo: ပြည်သူ့ကာကွယ်ရေးတပ်ဖွဲ့
