ရန်ကုန်တိုင်း စမ်းချောင်းမြို့နယ် ဖျာပုံလမ်းရှိ စစ်ကောင်စီထောက်ခံသူ အဆိုတော်ယုန်လေး၏ နေအိမ်အနီးတွင် ယနေ့ ၂၀၂၄ခုနှစ် ဒီဇင်ဘာလ (၃၀)ရက်နေ့ နံနက်ပိုင်းက ဗုံးပေါက်ကွဲမှုဖြစ်ပွားကြောင်း ဒေသခံများထံမှ သိရသည်။
ဗုံးပေါက်ကွဲမှုကြောင့် ပန်းလှိုင်မိသားစု ဆေးခန်းရှေ့ရှိ မီးစက် (၂)လုံး ပေါက်ကွဲမှုဖြစ်ပွားခဲ့ပြီး ပေါက်ကွဲမှုကြောင့် ဆေးခန်းရှေ့ရပ်ထားသော ကားနှစ်စီးနှင့် လူတစ်ဦး ထိခိုက်မှုရှိသည်ဟု ဆိုသည်။
“ဗုံးပေါက်တာက လူတစ်ဦးတော့ ထိခိုက်မှုရှိတယ်။ ကားနှစ်စီးလည်း ထိခိုက်သွားတယ်။”ဟု စမ်းချောင်းမြို့နယ်နေသူတစ်ဦးက Tachileik News Agency ကိုပြောသည်။
ဗုံးပေါက်ကွဲပြီးနောက် စစ်ကောင်စီတပ်သားများက ဖျာပုံလမ်းကို ပိတ်ဆို့စစ်ဆေးမှုများ လုပ်ဆောင်သည်ဟုလည်း ဆိုသည်။
“ဗုံးပေါက်တာတော့ဟုတ်ပါတယ်။ ယုန်လေးရဲ့ အိမ်အနီးနားမှာပါ။”ဟု စစ်ချောင်းပင်မသပိတ်စစ်ကြောင်းမှ တာဝန်ရှိသူတစ်ဦးကလည်း Tachileik News Agency ကို အတည်ပြုသည်။
ယုန်လေး၏ နေအိမ်သည် စမ်းချောင်းမြို့နယ်၊ ဖျာပုံလမ်း၊ ကျွန်းလယ်ရပ်ကွက်၊ ပန်းလှိုင်မိသားစုဆေးခန်းအနီးတွင် ရှိသည်ဟုလည်း ဆိုသည်။
စမ်းချောင်းမြို့နယ် ကျွန်းတောအလယ်ရပ်ကွက်ရုံးအနီး ထောင်ခဲ့သောဗုံးမှာ နည်းပညာအခက်အခဲကြောင့် ဖောက်ခွဲနိုင်ခြင်းမရှိကြောင်း သတင်းရသဖြင့် ပြည်သူများ ယင်းအနီးသို့သွားလာခြင်းမလုပ်ကြရန်လည်း Sanchaung Scout Channel က အသိပေးထားသည်ကို တွေ့ရသည်။
၂၀၂၁ ခုနှစ် ဧပြီလ(၁၈)ရက်နေ့ကလည်း စမ်းချောင်းမြို့နယ်၊ ကျွန်းတောလမ်းအလယ်တွင် ယုန်လေး၏ကား ဗုံးပေါက်ကွဲမှုဖြစ်ပွားခဲ့သေးသည်။
#TachileikNewsAgency
#TNA_MAT
Photo:CJ
