စစ်ကောင်စီတပ်မှ ပြည်သူများအပေါ် ပစ်မှတ်ထား အကြမ်းဖက်တိုက်ခိုက်မှုများအား ချက်ချင်းရပ်တန့်ရန်အတွက် ပို၍ထိရောက်သည့် အရေးယူမှုများ ပြုလုပ်ရန် နိုင်ငံတကာနှင့် သက်ဆိုင်ရာ အဖွဲ့အစည်းများအား ကရင်အရေးပေါ်ကူညီကယ်ဆယ်ရေးကော်မတီ (လယ်ဒိုကော်ဆာ)က တောင်းဆိုလိုက်သည်။

လက်ရှိတွင် စစ်ကောင်စီတပ်မှ ပြည်သူလူထုများ နေထိုင်ရာ ကျေးရွာများကို လက်နက်ကြီး၊ ဒရုန်း အပါအဝင် လေကြောင်းတိုက်ခိုက်မှုများ အပြင် ဒေသခံပြည်သူများအား မတရား ဖမ်းဆီးထောင်ချခြင်း၊ ငွေညှစ်ခြင်း ၊ ရိုက်နှက်ခြင်းနှင့် ပြည်သူပိုင် ပစ္စည်းများ ခိုးယူခြင်း ၊ မီးရှို့ခြင်းနှင့် ပြည်သူများ မတရား စစ်မှုထမ်းစေခိုင်းခြင်းစသည့် လူ့အခွင့်အရေး ချိုးဖောက်မှုများအား နေ့စဉ်ရက်ဆက် လုပ်ဆောင်နေကြောင်း ကရင်အရေးပေါ်ကူညီကယ်ဆယ်ရေးကော်မတီက ဆိုသည်။

၂၀၂၄ ခုနှစ် အောက်တိုဘာလမှ နိုဝင်ဘာလအတွင်း စစ်ကောင်စီတပ်၏ တောင်ပိုင်းတိုင်းစစ်ဌာနချုပ် ကွပ်ကဲမှုအောက်ရှိ အမြောက်တပ် ၊ ကြည်းတပ်နှင့် လေတပ်တို့မှ ကျေးရွာများအတွင်းသို့ လက်နက်ကြီးအလုံးရေ (၂၄၄)လုံးနှင့် လေတပ်မှ ဗုံး (၂)လုံး ကြဲချခဲ့သည့်အပြင် အော်လီဂန်းဖြင့် (၄)ကြိမ် နှင့် ဒရုန်းဖြင့် (၃၇)ကြိမ်ထက်မနည်း ပစ်ခတ်တိုက်ခိုက်ခဲ့သည်ဟု ဆိုသည်။

အဆိုပါ ပစ်ခတ်မှုများကြောင့် အရပ်သားပြည်သူ စုစုပေါင်း (၂၁)ဦး ထိခိုက်ခဲ့ရပြီး (၃)ဦး သေဆုံးခဲ့ရကာ၊ လူနေအိမ် စုစုပေါင်း (၁၆)လုံး ၊ ဘုန်းကြီးကျောင်း (၄)ကျောင်း ၊ ခရစ်ယာန် ဘုရားကျောင်း (၅)ကျောင်းနှင့် ဆေးပေးခန်း (၂)ခန်းတို့ ထိခိုက်ပျက်စီးခဲ့ရကြောင်း သိရသည်။

စစ်ကောင်စီတပ်၏ တိုက်ခိုက်မှုများကြောင့် ပြည်သူများမှာ လူမှုဘဝလုံခြုံမှုကင်းမဲ့စွာ အသက်ရှင်နေထိုင်ရပြီး ပြည်သူများအပေါ် အကြမ်းဖက်မှုကို အားပေးအားမြှောက်ပြုနေသည့် မည်သည့်အဖွဲ့အစည်း လူပုဂ္ဂိုလ်ကိုမဆို ပြင်းထန်စွာ ရှုတ်ချ၍ ၊ အကြမ်းဖက်မှုများကို ကျူးလွန်ခြင်း အားပေးလှုံ့ဆော်နေခြင်းများကို ရပ်တန့်ရန် ကရင်အရေးပေါ်ကူညီကယ်ဆယ်ရေးကော်မတီက တောင်းဆိုသည်။

စစ်ရှောင်ပြည်သူများ၏ လုံခြုံရေးနှင့် စားဝတ်နေရေး ၊ ကျန်းမာရေး ၊ ပညာရေး အစရှိသည့် လိုအပ်နေမှုများကို လူသားခြင်းစာနာထောက်ထားမှုဆိုင်ရာ အကူအညီများ ပေးအပ်ရန် နိုင်ငံတကာအဖွဲ့အစည်းများအားလည်း တောင်းဆိုသည်ဟု ဆိုသည်။

စစ်ကောင်စီတပ်မှ ပြည်သူလူထုများအပေါ် ပစ်မှတ်ထား အကြမ်းဖက်တိုက်ခိုက်မှုများအား ချက်ချင်းရပ်တန့်ရန်အတွက် ပို၍ ထိရောက်သည့် အရေးယူမှုများ ပြုလုပ်ရန် ပြည်တွင်းပြည်ပမှ ပြည်သူလူထုများ ကိုယ်စားပြုသည့် အရပ်ဖက် အဖွဲ့အစည်းများ ၊ တော်လှန်ရေး အဖွဲ့အစည်းများ ၊ နိုင်ငံတကာ အစိုးရများ ၊ နိုင်ငံတကာ လူ့အခွင့်အရေးဆိုင်ရာ အဖွဲ့အစည်းများအား တောင်းဆိုကြောင်း အသိပေးထားသည်။

လယ်ဒိုကော်ဆာ ကရင်အရေးပေါ်ကူညီကယ်ဆယ်ရေးကော်မတီသည် ကရင်ပြည်အတွင်း ပြည်သူလူထု၏ စားဝတ်နေရေး ၊ ကျန်းမာရေး ၊ ပညာရေး ၊ စီးပွားရေး အစရှိသည့် လူမှုဘဝလုံခြုံရေး ဆောင်ရွက်ပေးနေသည့် အဖွဲ့တစ်ခုဖြစ်သည်။

#TachileikNewsAgency

Photo: KNU ထိန်းချုပ်နယ်မြေအတွင်းရှိ ကျေးရွာကို စစ်ကောင်စီတပ်က ပစ်ခတ်တိုက်ခိုက်ခဲ့စဥ် (ပုံဟောင်း)