နေပြည်တော် ဇေယျာသီရီမြို့နယ်နှင့် ပုဗ္ဗသီရိမြို့နယ်များတွင် ယမန်နေ့ညကစ၍ ရေနစ်မြုပ်သဖြင့် ပိတ်မိနေသည့် ဒေသခံများကို ၂၀၂၄ ခုနှစ် စက်တင်ဘာလ (၁၂)ရက်နေ့တွင် ကယ်ဆယ်ရေးအဖွဲ့များက လိုက်လံရှာဖွေ ကယ်ဆယ်ပေးနေကြကြောင်း သိရသည်။

ဇေယျာသီရိမြို့နယ်တွင် စည်ပင်အုပ်စု၊ ညောင်ပင်ကြီးရွာအပြင် ရွာများရေမြုပ်နေပြီး ပုဗ္ဗသီရိမြို့နယ်တွင် ဇီးကုန်း၊ ကုလားရွာအပြင် ကျေးရွာအများစု ရေမြုပ်နေပြီဟု သိရသည်။ 

screenshot_2024-09-12_115559.png

"မနေ့ကပုဗ္ဗသီရီမြို့နယ် ကုလားရွာနားမှာ မကျည်းပင်ပေါ် ကလေးတွေနဲ့ လူကြီး(၁၅)ယောက်လောက် တက်နေရလို့ သွားကယ်ရတယ်။ အဲဒီလို အခြေအနေတွေ ထပ်ရှိနေသေးတယ်။"ဟု ကယ်ဆယ်ရေးသမားတစ်ဦးက Tachileik News Agency ကိုပြောသည်။

ရေကြီးနစ်မြုပ်၍ သစ်ပင်များတွင် တက်နေရသူများမှာ မြွေအန္တရာယ်ကိုလည်း ကြောက်နေကြရသည်ဟု ဒေသခံတစ်ဦးကဆိုသည်။

screenshot_2024-09-12_115715.png

"ရေတွေက တပြင်လုံးဖြစ်နေပြီ။ အိမ်တွေလည်း မြုပ်ကုန်ပြီ။ တက်နေစရာဆိုလို့ အပင်တွေပဲရှိတော့တယ်။ လူတွေရော မြွေတွေရော အတူတက်နေရတဲ့အဖြစ်။"ဟု ဒေသခံတစ်ဦးက ပြောသည်။ 

ယင်းအပြင် နေအိမ်အချို့၌လည်း ပိတ်မိနေသူများရှိနေသည်ဟု သိရသည်။

လက်ရှိတွင် ရေဆက်လက်မြင့်တက်နေပြီး ရေစီးအားလည်းသန်ကာ စိုးရိမ်ရသည့်အခြေအနေဖြစ်နေသည်ဟု သိရသည်။

#TachileikNewsAgency

Photo: လူမှုကရုဏာရှင်