အောင်တဲ့သူလည်း အောင် မအောင်တဲ့သူလည်းကျနဲ့ ကျောင်းရှေ့ မနက်ခင်းတစ်ခုလုံး ပျော်ရွှင်သူ ဝမ်းနည်းသူတွေနှင့် ဝရုန်းသုံးကားကို ဖြစ်လို့။ ကျွန်တော်တို့ မြို့လေးကတော့ ထုံးစံအတိုင်း အောင်ချက် အနည်းငယ်ဖြင့်သာ အောင်မြင်ကြပါသည်။ တစ်ဆက်ထဲမှာပင် တစ်နိုင်ငံလုံး အတိုင်းတာဖြင့်လည်း အောင်ချက် ကျဆင်းခဲ့သည်ဟု ကြားသိရပါတယ်။

အထက်မှာ ရေးသားခဲ့ပြီးသလို ဆယ်တန်းအောင်စာရင်းနဲ့ မြန်မာ့ပညာရေး နိုင်ငံရေး ဘယ်လို ပတ်သက်သလဲဆိုရင် မြန်မာနိုင်ငံသူ နိုင်ငံသားတွေ အနေနဲ့ ဆယ်တန်းအောင်စာရင်းဟာ အရမ်းကို ကြီးကျယ် ခမ်းနားလွန်းပါတယ်။ ဆယ်တန်းအောင်မှတ် အလိုက် ဆိုင်ရာတက္ကသိုလ်ဝင်ခွင့်တွေ ရွေးချယ်ခဲ့တာမို့ပါ။ ဒီနှစ် ကျရှုံးသူအများစုဟာလည်း အင်္ဂလိပ်စာ မေးခွန်းမရလို့ မဖြေနိုင်လို့ ကျရှုံးမှု ပိုများခဲ့ကြပါတယ်။

ဆယ်တန်းမှာ အင်္ဂလိပ်လို အနည်းဆုံး (၄)ဘာသာ ပါရှိပါတယ်၊ ဘိုင်အိုသမားတွေ အတွက်ဆိုရင် (၅)ဘာသာ ဖြစ်သွားပါတယ်၊ ရာခိုင်နှုန်းအားဖြင့် ဆယ်တန်းမှာ အင်္ဂလိပ်လို (၈၀)ရာခိုင်နှုန်း သင်ကြားနေရပြီး မြန်မာစာ နှစ်ဆယ်ရာခိုင်းနှုန်းလို့ သတ်မှတ်လို့ရပါတယ်။ အဲ့တော့ (၉)တန်း (၁၀)တန်း ရောက်လာမယ့် ကလေးတွေ အတွက် အင်္ဂလိပ်စာဟာ အရမ်း အရမ်းကို အရေးကြီးတယ်လို့ ပြောပါရစေ။

ကျွန်တော်တို့ ကလေးတွေ ဘာကြောင့် အင်္ဂလိပ်စာ ညံ့ကြရသလဲ။ အဖြေက ရှင်းပါတယ် ပညာရေးစနစ် ညံ့ဖျင်းလို့ပါ၊ သင်ကြားရေးစနစ်မှာ လိုအပ်ချက်တွေ ရှိနေဆဲမို့ပါ။ အခုလက်ရှိ အချိန်ထိ အစိုးရတန်းကျောင်းတွေကနေ ဆယ်တန်းအောင်မြင်တဲ့ ကလေးတွေရော မအောင်မြင်ခဲ့တဲ့ ကလေးတွေပါ တစ်ရာမှာ ကိုးဆယ့်ရှစ်ယောက် လောက်က ကျောင်းပြီးသွားချိန်မှာ အင်္ဂလိပ်လို မပြောတတ်ပါဘူး။ ဒါဟာ တန်းကျောင်းတွေကနေ အင်္ဂလိပ်သဒ္ဒါပိုင်း စနစ်တကျ သင်ကြားမှု အားနည်းတာရယ် အင်္ဂလိပ်စကားပြော အစီစဉ် သင်ကြားရေး လုံးဝမရှိသေးတာရယ်ကြောင့်ပါ။

နိုင်ငံတကာမှာ ထိုးဖောက်ဝင်ရောက်ဖို့ နိုင်ငံတကာမှာ အောင်မြင်မှု ရဖို့ဆိုရင် အင်္ဂလိပ်စာ အင်္ဂလိပ်စကား အင်မတန့် အင်မတန် အရေးကြီးလိုအပ်ပါတယ်။ လက်ရှိ အောင်မြင်နေတဲ့ မြန်မာနိုင်ငံဆိုင်ရာ ထိပ်တန်း ပုဂ္ဂိုလ်ကြီးတွေ အာရှဒေသ အတွင်းက ထိပ်တန်း ပုဂ္ဂိုလ် ကြီးတွေ အားလုံးဟာ အင်္ဂလိပ်စာနဲ့ ကင်းလို့မရကြပါဘူး။ အဲ့တော့ ကျွန်တော်တို့ မြန်မာနိုင်ငံအနေနဲ့ မြန်မာလူမျိူးတွေ အနေနဲ့ ကမာ္ဘနဲ့ ရင်ဘောင်တန်းချင်တယ် ဆိုရင်တော့ နောက်လာမယ့် မျိုးဆက်သစ်လေးတွေကို အင်္ဂလိပ်စာ၊ အင်္ဂလိပ်စကား အဓိက တက်ကျွမ်းနားလည်စေဖို့ လိုအပ်ချက်ရှိနေတာကို သတိချပ်စေချင်ပါတယ်။

ကျွန်တော်တို့ ကလေးတွေ အင်္ဂလိပ်စာ ကျွမ်းကျင်မှု ရှိအောင် ဘယ်လိုဆောင်ရွက်ကြမလဲ ဝင်ရောက် ဆွေးနွေးကြရအောင် ဖိတ်ခေါ်ပါတယ်။ ကျွမ်းကျင်မှု ရှိဖို့ဆိုရင် အရင်ဦးဆုံး အကျွမ်းဝင်ဖို့ လိုပါတယ်။ ကလေးတွေဟာ အင်္ဂလိပ်စာ/စကားနဲ့ အကျွမ်းတဝင် ဖြစ်နေဖို့ လိုအပ်ပါတယ်။

အခုချိန်ထိ ကျွန်တော်တို့ ကလေးတွေဟာ သူငယ်တန်း ကနေစ အင်္ဂလိပ်စာကို အေ ဘီ စီ ဒီ( A B C D ) ဆိုပြီး ဆယ်တန်းအထိ နှစ်စဉ် သင်ယူခဲ့ကြရပါတယ်၊ အချိန်အားဖြင့် ဆယ်နှစ်ပါ။ ဆယ်တန်းပြီးသွားပြီး တကယ့်ဘဝထဲကို ခြေစုံပစ်ဝင်ကြချိန်မှာ အင်္ဂလိပ်စာ အင်္ဂလိပ်စကားနဲ့ နဖူးတွေ့ဒူးတွေ့ တွေ့ကြရပါပြီ ကျွန်တော်တို့ ကလေးတွေဟာ အင်္ဂလိပ်စကား မပြောတက်ရုံတင်မကဘူး အင်္ဂလိပ်စာမှာပါ သွက်သွက် ခါအောင် ညံ့ဖျင်းနကြေရပါတယ်။

ဒါဟာ မြန်မာနိုင်ငံရဲ့ တန်းကျောင်းတွေကနေ ဆယ်နှစ်တာ သင်ကြားပေးလိုက်တာ အင်္ဂလိပ်စာမှ ဟုတ်ပါလေစလို့တောင် မေးခွန်းထုတ်ချင်စရာပါ။ ပြောရရင် ကုန်နိုင်မှာ မဟုတ်သလို အဖက် ဖက်က ထိခိုက်နစ်နာစရာတွေ ရှိလာမှာမို့ လိုရင် တိုးရှင်ပဲပြောကြတာပေါ့ဗျာ။

ကျွန်တော်အနေနဲ့ အခု အစိုးတန်းကျောင်းတွေမှာ အင်္ဂလိပ်စာသင်ချိန်အပြင် အင်္ဂလိပ်စကားပြော ချိန်လေးတစ်ချိန်ပါ ထည့်သွင်းသင်ကြား သင့်တယ်လို့ မြင်မိပါတယ်။ အဲ့လိုသင်တဲ့နေရာမှာ တန်းကျောင်းတွေမှာ ဘာသာရပ်တစ်ခုအနေနဲ့ ပညာရေးဝန်ကြီးဌာနကနပြေီးတော့ ကျွမ်းကျင် တက်ကျွမ်းတဲ့ ဆရာ၊ဆရာမတွေ ချပေးပြီးတော့ အခြေခံပညာဖြစ်တဲ့ နှစ်တန်း သုံးတန်းကနေ စပြီး ဆယ်တန်းအထိ သင်ခန်းစာ တစ်ခုအနေနဲ့ သင်ယူစေချင်ပါတယ်လို့ အကြံပြုပါရစေ။

ကျောင်းသား ကျောင်းသူတွေ အတွက်လည်း စာရိတ္တအချိန်၊ ရသချိန်၊ ကာယအချိန်၊ အမှိုက်ကောက်ချိန်၊ စတဲ့ အချိန်တွေထက်စာရင် ပိုပြီးတော့ အကျိုးရှိမယ်လို့ မျှော်လင့်မိပါတော့တယ်။

ကျောင်းသူ ကျောင်းသားလေးများ အားလုံး တော်တက် နားလည်တဲ့ ပညာရှိလေးများ ဖြစ်ပေါ်လာပါစေ။

⊰❂ #TachileikNewsAgency #TachileikOnlineNews  #တာခ်ီလိတ္သတင္းေအဂ်င္စီ www.tachileik.net  ❂⊱