မြန်မာ့ငလျင်ဘေး ကူညီရေးရောက်ရှိနေသည့် ထိုင်းကယ်ဆယ်ရေးအဖွဲ့မှ ဆေးအဖွဲ့သည် ၂၀၂၅ ခုနှစ် ဧပြီလ (၂)ရက်နေ့ တစ်နေ့တာအတွင်း နေပြည်တော် လယ်ဝေး၌ လူနာ (၁၀၀)ကျော် စစ်ဆေးကုသပေးထားကြောင်း သိရသည်။

ထိုင်းကယ်ဆယ်ရေးအဖွဲ့သည် စစ်ကောင်စီမှ နေရာချထားပေးသည့် နေပြည်တော် လယ်ဝေးမြို့ရှိ မြို့သစ်ဓမ္မာရုံတွင် ယာယီကုသခန်းဖွင့်လှစ်ကာ နံနက် (၁၀)နာရီခွဲမှ ညနေ (၃)နာရီအထိ ကုသမှုပေးခဲ့ရာ လူနာစုစုပေါင်း (၁၀၇)ဦးအား စစ်ဆေးကုသပေးခဲ့ပြီး ယင်းတို့အနက် လူနာ (၂)ဦးကို ဆက်လက်ကုသရန် မြန်မာဆေးအဖွဲ့သို့ လွှဲပြောင်းပေးခဲ့ကြောင်း သိရသည်။

အလားတူ လာအိုနိုင်ငံမှ ကယ်ဆယ်ရေးအဖွဲ့မှ ဆေးတပ်ဖွဲ့ကိုလည်း စစ်ကောင်စီက မန္တလေး ကျောက်ဆည်ပြည်သူ့ဆေးရုံတွင် တာဝန်ချထားပေးကြောင်း သိရသည်။

ငလျင်ဘေးကယ်ဆယ်ရေးအတွက် နိုင်ငံတကာမှ လာရောက်ကြသည့် ကူညီကယ်ဆယ်ရေးအဖွဲ့များသည် စစ်ကောင်စီက နေရာချထားပေးသည့် နေရာများတွင် ရှာဖွေကယ်ဆယ် ကုသခြင်းများကို လုပ်ဆောင်ပေးနေကြခြင်းဖြစ်သည်။

Photo: Royal Thai Armed Forces  

#TachileikNewsAgency