နိုင်ငံကျော် အဆိုတော် ဂျေညီညီ ကွယ်လွန်သွားကြောင်း ၎င်း၏ ညီမဖြစ်သူ ဂျေညီမလေးက လူမှုကွန်ရက်ကနေ အသိပေးထားသည်။

"အဆိုတော် ဂျေညီညီ မနက် (၄း၃၀)မိနစ်မှာ ဆုံးသွားပါပြီ"ဟု ဂျေညီမလေးသည် မတ်လ(၃၁)ရက်နေ့ နံနက်(၅)နာရီ (၃၂)မိနစ်အချိန်က လူမှုကွန်ရက်တွင် ရေးသားကို အသိပေးထားခြင်း ဖြစ်သည်။

အသက်(၇၂)နှစ်ဝန်းကျင်ရှိ အဆိုတော် ဂျေညီညီသည် ၂၀၂၅ခုနှစ် မတ်လ(၃၁)ရက်နေ့ နံနက်(၄)နာရီခွဲ အချိန်တွင် ကွယ်လွန်သွားခြင်း ဖြစ်သည်။

၎င်းမကွယ်လွန်မီ ၂၀၂၅ခုနှစ် မတ်လ(၃၀)ရက်နေ့ နံနက် (၇)နာရီ (၅၆)မိနစ်အချိန်က ၎င်း၏ လူမှုကွန်ရက်တွင် "ဒီမနက်မူးလို့ ကောင်းတုန်း တယောက်ထဲ ငလျင်မိနေသလို ဟိုကိုင် ဒီကိုင် လမ်းလျှောက်နေရတယ်"ဟု သွေးပေါင်းချိန်တိုင်းတာသည့် စက်ပုံနှင့်အတူ နောက်ဆုံး ပိုစ့်တင်ထားသည်ကိုလည်း တွေ့ရသည်။

အဆိုတော် ဂျေညီညီကို ၁၉၅၃ခုနှစ် ဒီဇင်ဘာလ(၁၂)ရက်နေ့တွင် ဝါးခယ်မမြို့တွင် မွေးဖွားသူဖြစ်သည်။

အဆိုတော် ဂျေညီညီ၏ အစ်ကိုမှာ အဆိုတော် ဂျေမောင်မောင်ဖြစ်ပြီး ညီမဖြစ်သူမှာ အဆိုတော် ဂျေညီမလေး ဖြစ်သလို တူမတော်စပ်သူမှာလည်း အဆိုတော် သီရိဂျေမောင်မောင် ( ဂျေမောင်မောင်၏ သမီး )ဖြစ်ပြီး ဂီတလောကတွင် ဂျေမိသားစု( J Family )အဖြစ် လူသိထင်ရှားသည်။ 

ကွယ်လွန်သွားသူ အဆိုတော် ဂျေညီညီသည် ဂီတလောကထဲသို့ (၁၉၇၄)ခုနှစ် ဝန်းကျင်က စတင်ဝင်ရောက်လာခဲ့ခြင်း ဖြစ်ပြီး ၁၉၈၅ ခုနှစ်တွင် စွဲနေပြီ တေးစီးရီးကို စတင်ထုတ်ဝေခဲ့ပြီးနောက် တေးစီးရီးများစွာ ထုတ်ဝေခဲ့ရာ ၎င်း၏ တေးသီးများသည် ပရိသတ်များအကြား နှစ်ပေါင်းရှည်ကြာစွာ ရေပန်းစားနေလျက်ရှိသည်။