တရုတ်နိုင်ငံသမ္မတ ရှီကျင့်ဖျင်က မြန်မာနိုင်ငံတွင် မြေငလျင်လှုပ်ခတ်မှုနှင့်ပတ်သက်၍ စစ်ခေါင်းဆောင် မင်းအောင်လှိုင်ထံ စာနာကြောင်း သဝဏ်လွှာပေးပို့သည်ဟု မြန်မာနိုင်ငံဆိုင်ရာတရုတ်သံရုံးက ယနေ့ ၂၀၂၅ခုနှစ် မတ်လ (၂၉)ရက်နေ့တွင် သတင်းထုတ်ပြန်သည်။

တရုတ်သမ္မတက ပေးပို့သည့် စာနာကြောင်း သဝဏ်လွှာတွင် မြန်မာနိုင်ငံတွင် ပြင်းထန်သည့် ငလျင်ဘေးဒဏ် ခံစားနေရသည်ကို သိရှိကြောင်းနှင့် ငလျင်ဘေးဒဏ်သင့် ပြည်သူများအတွက် ဝမ်းနည်းကြောင်းအပါအဝင် တရုတ်နိုင်ငံက မြန်မာနိုင်ငံအတွက် လိုအပ်သော အကူအညီများ ပေးအပ်ရန်နှင့် သဘာဝဘေးဒဏ်ကို ကျော်လွှားပြီး နေအိမ်များ အမြန်ဆုံး ပြန်လည်တည်ဆောက်ပေးနိုင်ရန် ကူညီပေးရန် ဆန္ဒရှိကြောင်း ပါဝင်သည်။

ယနေ့ မတ်လ (၂၉)ရက်နေ့ မနက်ပိုင်းတွင် တရုတ်နိုင်ငံ ယူနန်ပြည်မှ စေလွှတ်သည့် ကယ်ဆယ်ရေးဆေးကုသမှုအဖွဲ့သည် ရန်ကုန်လေဆိပ်သို့ ရောက်ရှိလာခဲ့ပြီး Blue Sky Rescue (ယူနန်) အဖွဲ့သည်လည်း ယနေ့ နံနက်ပိုင်းတွင် ယူနန်ပြည်နယ် ရွှေလီနယ်စပ်မှ တဆင့် မြန်မာနိုင်ငံ မူဆယ်မြို့သို့ သွားရောက်ကာ ကယ်ဆယ်ရေးလုပ်ငန်းများ ဆောင်ရွက်မည်ဟု တရုတ်သံရုံးက ဖော်ပြသည်။

မြန်မာနိုင်ငံအတွင်း ၂၀၂၅ခုနှစ် မတ်လ(၂၈)ရက်နေ့ မြန်မာစံတော်ချိန် နေ့လယ်(၁၂)နာရီ (၅၁)မိနစ် (၀၂)စက္ကန့် အချိန်က မန္တလေးမြေငလျင်စခန်းမှ အရှေ့မြောက်ဘက် (၂၁)ကီလိုမီတာခန့် ကွာဝေးသော မြန်မာနိုင်ငံပြည်တွင်း (မန္တလေးမြို့၏ အရှေ့ မြောက်ဘက် (၂၀) ကီလိုမီတာခန့်အကွာ)တွင် အင်အား ရစ်(ခ်)တာစကေး (၇.၇) အဆင့်ရှိသည့် အင်အားအလွန်ပြင်းထန် ငလျင်လှုပ်ခတ်သွားခြင်းဖြစ်သည်။

#TachileikNewsAgency

Photo:Chinese Embassy in Myanmar