မကွေးတိုင်း ရေစကြိမြို့နယ်နှင့် မြောင်မြို့နယ်အစပ်ရှိ ကျေးရွာများကို စစ်ကောင်စီတပ်က စစ်ကြောင်းထိုးမီးရှို့ကာ ဘုန်းကြီးတစ်ပါးအပါအဝင် အရပ်သား (၁၀)ဦးဝန်းကျင်ကို ပစ်သတ်၍ မီးရှို့သွားသည်ဟု တော်လှန်ရေးတပ်များထံမှ သိရသည်။
ဖေဖော်ဝါရီလ (၂၆)ရက်နေ့ကစတင်ကာ ရေစကြိုမြို့နယ် ဆိပ်ကမ်းဘက်မှ မြောင်မြို့နယ်ဘက်သို့ ကူးလာသည့် စစ်ကောင်စီတပ်နှင့် တော်လှန်ရေးတပ်များ တိုက်ပွဲဖြစ်ပြီးနောက် မတ်လ(၁)ရက်နေ့တွင် မြေစွန်းရွာကို ရုတ်တရက် ဝင်စီး၍ (၃) ရက်တိုင် မီးရှို့လူသတ်မှုများ ကျူးလွန်ခြင်းဖြစ်သည်ဟု သိရသည်။
“ရွာကိုမီးရှို့တာကို ဝင်တားတဲ့ မြေစွန်းရွာကျောင်းထိုင်ဆရာတော်ကို ပစ်သတ်ခဲ့တယ်။ သက်တော်က (၈၀)နီးပါးရှိပြီ။ နောက်ပြီး မပြေးနိုင်တော့တဲ့ အသက် (၆၀)နှစ်ကနေ (၈၀)နှစ်ကြား သက်ကြီးပိုင်း (၁၀)ဦးလောက်ကို ပစ်သတ်မီးရှို့သွားတယ်။”ဟု CDSOM တပ်ဖွဲ့မှ ကိုနွေဦးက Tachileik News Agency ကို ပြောသည်။
စစ်ကောင်စီတပ်က ပစ်သတ်၍ မီးရှို့သွားသူများအနက် ဘုန်းကြီးတစ်ပါး အပါအဝင် (၆)ဦးကို မည်သူမည်ဝါဆိုသည်ကို သိရှိရသော်လည်း (၂)ဦးမှာ မျက်နှာများ ပျက်စီးသွား၍ မည်သူမည်ဝါ မသိရသည့်အပြင် ပျောက်ဆုံးနေသူများလည်းရှိနေသည်ဟု ဆိုသည်။
“အခု မြေစွန်းကနေ ဇရပ်နီရွာဘက်ကို ပြောင်းရွှေ့ပြီး မီးရှို့နေတယ်။ ဒေသခံတွေလည်း မြေစွန်းရွာထဲကို ခဏဝင်တော့ အလောင်းတွေကို တွေ့ခဲ့တာ။ အလောင်းတွေ မသယ်နိုင်သေးဘူး။ ဒီအတိုင်း ပစ်ထားခဲ့ရတယ်။ မပြန်ရဲလို့ မပြန်ရသေးဘူး။”ဟု ကိုနွေဦးက ဆက်ပြောသည်။
ဇရပ်နီရွာမှာ အိမ်(၁၅၀)ကျော်ရှိသည် ရွာကြီးဖြစ်ပြီး ခလရ (၂၆၅)အပြင် စစ်တပ် တပ်ရင်းနှင့်် ရဲတပ်ရင်းတို့မှ အင်အား (၂၀၀)ဝန်းကျင်ဖြင့် ကျေးရွာများကို စစ်ကြောင်းထိုးမီးရှို့နေခြင်းဖြစ်ကြောင်း သိရသည်။
ဖေဖော်ဝါရီလ (၂၆)ရက်နေ့က ရေစကြိုဆိပ်ကမ်းမှ မြောင်နယ်ဘက်သို့ အင်အား(၁၈၀)ဝန်းကျင်ဖြင့် ကူးလာသည့် စစ်ကောင်စီတပ်ကို တော်လှန်ရေးတပ်များက တိုက်ခိုက်ရာ စစ်ကောင်စီတပ်ဘက်က အထိနာသဖြင့် တိုက်လေယာဉ်ဖြင့် နှစ်ကြိမ်၊ Mi-35 ဖြင့် (၅)ကြိမ် လေကြောင်းတိုက်ခိုက်ခဲ့သည်။
ထို့နောက် မတ်လ(၁)ရက်နေ့တွင်လည်း ရေစကြိုဘက်မှ အင်အား(၈၀)ခန့်နှင့် ခဲယမ်းရိက္ခာများကို အင်အားထပ်ဖြည့်၍ စစ်ကောင်စီဘက်သို့ အင်အားဖြည့်ကာ မတ်လ (၂)ရက်နေ့ နံနက်(၅)နာရီခန့်တွင် လက်နက်ကြီးများနှင့်ပစ်ခတ်ကာ ဝင်ရောက်စီးနင်း မီးရှို့ခဲ့သည်ဟု သိရသည်။
စစ်ကောင်စီတပ်က လက်နက်ကြီးပစ်ခတ်ခြင်းကြောင့် ဆင်ခြေယာရွာမှ အသက်(၇၀)အရွယ် အဖွားတစ်ဦး ထိမှန်သေဆုံးကာ အသက်(၈၀)အရွယ် အဖွားတစ်ဦး လက်မောင်းဒဏ်ရာရပြီး အသက်(၃၀)အရွယ် အမျိုးသားတစ်ဦးလည်း ဒဏ်ရာရသည်ဟု သိရသည်။
စစ်ကောင်စီမီးရှို့ဖျက်ဆီးခဲ့သည့် မြေစွန်းရွာသည် အိမ်ခြေ(၂၀၀)ဝန်းကျင်ရှိသည့် ရွာကြီးဖြစ်ပြီး လက်ရှိတွင် နေအိမ်(၇)လုံးဝန်းကျင်သာ ကျန်တော့သည်ဟု သိရသည်။
“မနေ့က ဇရပ်နီရွာနဲ့ကပ်လျှက် ရွှေလှန်ရွာကို နံနက်ပိုင်းမှာ လေကြောင်းတိုက်ခိုက်တာ နေအိမ်တစ်လုံးမီးလောင်တယ်။ နွား (၁၂) ကောင်လောက်သေတယ်။ အဲဒီနောက်မှာ ဇရပ်နီရွာကိုရောက်လာပြီး နံနက်ပိုင်းကတည်းက မီးရှို့နေတယ်။ အခုအချိန်ထိလည်း စစ်ကောင်စီတပ်တွေ အဲဒီရွာနားတဝိုက်မှာရှိနေတယ်။”ဟု ကိုနွေဦးက ဆက်ပြောသည်။
စစ်ကောင်စီတပ်၏ မီးရှို့လူသတ်မှုများကြောင့် ရေစကြိုမြို့နယ်မှ ဇရပ်နီ၊ ရွာသစ်၊ မြေစွန်း၊ ဆင်ခြေယာရွာ၊ မာလကာခြံ၊ ရွှေလှန်နှင့် မြောင်နယ်မှ နနွင်းကိုင်း၊ ဆူးလေးကုန်း၊ မြစ်သာ၊ ဆင်လှောင်၊ သုခဒီပနှင့် မြစ်ဆုံရွာမှ ဒေသခံ ထောင်ချီပြီး ထွက်ပြေးနေရသည်။
#TachileikNewsAgency
