ရန်ကုန်တိုင်းအတွင်း ၂၀၂၄ ခုနှစ် ဒီဇင်ဘာလအတွင်း ပြည်သူ (၅၉၆)ဦး ဖမ်းဆီးခံရပြီး ၎င်းတို့အနက်မှ (၁၄၆)ဦး စစ်မှုထမ်းသင်တန်းကျောင်းများသို့ ပို့ဆောင်ခြင်းခံရကြောင်း Rangoon Scout Network ၏ အချက်အလက်ကောက်ယူမှုများအရ သိရသည်။
ရန်ကုန်တိုင်းအတွင်း ဒီဇင်ဘာလအတွင်း ပြည်သူ (၅၉၆)ဦး ဖမ်းဆီးခံခဲ့ရပြီး ၎င်းတို့အနက်မှ (၁၆၂)ဦးမှာ ပြန်မလွတ်လာတော့ကြောင်း သိရသည်။
ဖမ်းဆီးခံရသူများအနက် ပြန်လွတ်လာသူ (၇၁)ဦး ရှိပြီး ကျန် (၃၅၈)ဦး၏ နောက်ဆက်တွဲအခြေအနေများနှင့် ပက်သက်၍ စုံစမ်းမရသေးဘဲ ၊ ချုပ်နှောင်ထားသည့်ကြားမှ ထွက်ပြေးလွတ်မြောက်လာသူ (၆)ဦးရှိကြောင်း Rangoon Scout Network က ဆိုသည်။
ဖမ်းဆီးခံရသူများအနက် စစ်မှုထမ်းသင်တန်းကျောင်းများသို့ ပို့ဆောင်ခြင်းခံရသူ (၁၄၆)ဦးရှိပြီး ၊ တော်လှန်ရေးလှုပ်ရှားသူများဟုဆိုကာ ဖမ်းဆီးခံရသူ (၇)ဦး ရှိကာ ၊ ဆိုရှယ်မီဒီယာပေါ်တွင် စစ်ကောင်စီကို ဝေဖန်သည့်အတွက် ဖမ်းဆီးခြင်းခံရသူ (၂)ဦး ရှိကြောင်း သိရသည်။
ထို့အပြင် အသက်မပြည့်သေးသူ လူငယ် (၄)ဦးကို လိမ်လည်ခေါ်ဆောင်ကာ စစ်တပ်ထံသို့ ရောင်းစားသည့် ဖြစ်စဉ်လည်း ရှိခဲ့ပြီး ၊ သင်္ကန်းစည်းထားသူ (၂)ဦးလည်း ဖမ်းဆီးခံခဲ့ရကြောင်း သိရသည်။
ဖမ်းဆီးခံရသူများအနက် ပြည်သူ (၃၆)ဦးမှာ ဖမ်းဆီးချိန် ရိုက်နှက်ခံရပြီး ၊ ကျဉ်စက်ဖြင့်တို့၍ ဖမ်းဆီးခံရသူ (၃)ဦးရှိကာ ၊ ၀င်ရောက်ဖမ်းဆီးချိန် သေနတ်ပစ်ခတ်မှုဖြစ်ခဲ့သည့် ဖြစ်စဉ် (၁)ခုလည်း ရှိကြောင်း သိရသည်။
“အခုဆို အဖမ်းအဆီး သတင်းတွေကြောင့် ညနေစောင်းရင် အပြင်မထွက်တော့ဘူး။ ကိုယ့်ရပ်ကွက်ထဲကိုယ်တော့ စိတ်မပူပါဘူး။ တခြားနေရာတွေသွားရင်တော့ ဂရုစိုက်ရတာပေါ့။” ဟု ရန်ကုန်မြို့ ကမာရွတ်မြို့နယ်မှ ဒေသခံတစ်ဦးက Tachileik News Anegcy ကို ပြောသည်။
ဖမ်းဆီးခံရသည့် အချက်အလက်များသည် Rangoon Scout Network ၊ ချိတ်ဆက်အဖွဲ့အစည်းများ နှင့် မီဒီယာသတင်းများထံမှ ကိုးကား၍ ပြုစုတွက်ချက်ထားခြင်းဖြစ်ပြီး လက်တွေ့မြေပြင်အခြေအနေမှာ ပို၍များနိုင်ကြောင်း Rangoon Scout Network က အသိပေးထားသည်။
#TachileikNewsAgency
#TNA_LE
Photo:Rangoon Scout Network
