သေဒဏ်ကျခံထားရသည့် ပထမဆုံး CDM ရေတပ်သား ကိုပြည့်စုံဦး ကျောက်ကပ်ရောဂါဝေဒနာဖြင့် ၂၀၂၄ ခုနှစ် နိုဝင်ဘာလ (၃၀)ရက်နေ့တွင် အင်းစိန်ထောင်တွင်း၌ ကွယ်လွန်သည်ဟု မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM) ထံမှ သိရသည်။

ကိုပြည့်စုံဦးသည် စစ်အုပ်စု အာဏာသိမ်းစဉ်တွင် CDM တပ်သားအနေဖြင့် ၂၀၂၁ခုနှစ် မတ်လက ပြည်သူ့ဘက်သို့ ကူးပြောင်းပြီး နိုင်ငံရေးလုပ်ငန်းများတွင် ပူးပေါင်းပါဝင်ခဲ့သူဖြစ်သည်။ 

တော်လှန်ရေးလုပ်ငန်းများဆောင်ရွက်နေစဉ် ၂၀၂၂ ခုနှစ် သြဂုတ်လ (၂၇)ရက်နေ့တွင် ဖမ်းဆီခံခဲ့ရသည်ဟု သိရသည်။

ထို့နောက် စစ်ကောင်စီတပ်က သံလျင်ရေတပ်မှ တပ်ပြေးပုဒ်မအပြင် အခြားပုဒ်မများဖြစ်သည့် ပုဒ်မ တမအ ၃၇ (တပ်မတော်အက်ဥပဒေပုဒ်မ ၃၇)၊ တမအ ၃၂(တပ်မတော်အက်ဥပဒေပုဒ်မ ၃၂)တို့ဖြင့် အမှုဖွင့်ခံခဲ့ရပြီး ၂၀၂၃ ခုနှစ် စက်တင်ဘာလ (၁၂)ရက်နေ့တွင် သေဒဏ်ချက အင်းစိန်ထောင်သို့ ပို့ခံရသည်။ 

အင်းစိန်ထောင်သို့ ရောက်ရှိပြီးနောက် ကျောက်ကပ်ရောဂါနှင့် အဆုတ်ရေဝိုင်းရောဂါများကို ခံစားရပြီး ခြောက်လအကြာတွင် ကွယ်လွန်သွားခြင်းဖြစ်ကြောင်း သိရသည်။

နိုင်ငံတဝှမ်း အကျဉ်းထောင်တွင်းက ဖိနှိပ်မှုများနှင့် ဆေးဝါးလုံလောက်စွာကုသမှုမရခြင်းကြောင့် ၂၀၂၄ခုနှစ်အတွင်း နိုင်ငံရေးအကျဉ်းသား၊ အကျဉ်းသူ (၂၀)ဦး ကျဆုံးသည်ဟု မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)ကဆိုသည်။ 

၂၀၂၄ခုနှစ် ဇန်နဝါရီလ (၁)ရက်နေ့မှ နိုဝင်ဘာလ (၃၀)ရက်‌နေ့အထိ (၁၁)လတာ ကာလအတွင်း ကျန်းမာရေးစောင့်ရှောက်မှု လုံလောက်စွာ မရရှိခြင်းကြောင့် အကျဉ်းသား၊ အကျဉ်းသူ (၂၀)ဦးမှာ ကျဆုံးရခြင်းဖြစ်ပြီး အမျိုးသမီး(၂)ဦးနှင့် အမျိုးသား (၁၈)ဦး ပါဝင်သည်ဟု သိရသည်။

#TachileikNewsAgency

Photo: Political Prisoners Network - Myanmar