မကွေးတိုင်း ပခုက္ကူမြို့နယ်ရှိ စစ်ကောင်စီတပ်များ၏ အင်ပင်ဂိတ်စခန်း၊ အရှေ့ဘုန်းကန်ရွာပျူစောထီးစခန်းနှင့် ပခုက္ကူမြို့ တပ်မ(၁၀၁)အား ၂၀၂၃ခုနှစ် ဩဂုတ်လ (၈)ရက်နေ့က တာဝေးပစ်ဒုံးများဖြင့် ပစ်ခတ်တိုက်ခိုက်ခဲ့ကြောင်း ပခုက္ကူမြို့နယ် ပြည်သူ့ကာကွယ်ရေးတပ်ဖွဲ့ထံမှ သိရသည်။ 

၎င်းစစ်ကောင်စီတပ်စခန်းများကို ၈၈၈၈ အရေးတော်ပုံ (၃၅)နှစ်ပြည့် အထိမ်းအမှတ်အနေဖြင့် Pakokku Special Guerrilla Force-PSGF (ပခုက္ကူမြို့နယ်ပြည်သူ့ကာကွယ်ရေးအဖွဲ့-ပကဖ)၊ Dragon Force၊ ကျေးလက်ဒေသ ပြောက်ကျားတပ်ဖွဲ့၊ BRR-PDF၊ သူရိန်တပ်ဖွဲ့တို့ ပူးပေါင်း၍ တိုက်ခိုက်ခဲ့ခြင်းဖြစ်ကြောင်း သိရသည်။

တိုက်ခိုက်မှုကြောင့် တပ်မ(၁၀၁)အတွင်းသို့ တာဝေးပစ်ဒုံး(၅)လုံး ကျရောက်ပေါက်ကွဲခဲ့ပြီး စစ်ကောင်စီတပ်သားများ ထိခိုက်သေဆုံးသူရှိကာ အရှေ့ဘုန်းကန်ရွာ ပျူစောထီးစခန်း အတွင်းသို့(၄)လုံး ကျရောက်ပေါက်ကွဲခဲ့သဖြင့် စစ်ကောင်စီတပ်ဘက်က လက်နက်ကြီးများဖြင့် ကင်းရွာအထိ လာရောက်ပြန်လည်တိုက်ခိုက်ခဲ့သော်လည်း ပြည်သူ့ကာကွယ်ရေးတပ်ဖွဲ့များ အထိအခိုက် အကျအဆုံးမရှိ ပြန်လည်ဆုတ်ခွာနိုင်ခဲ့သည်ဟု သိရသည်။

#TachileikNewsAgency

Photo :ပခုက္ကူမြို့နယ် ပြည်သူ့ကာကွယ်ရေးအဖွဲ့ -ပကဖ