စစ်ကိုင်းတိုင်း၊ တန့်ဆည်မြို့ နှင့် ရေဦးမြို့အကြား စိမ်းခါးရွာအနီး ဟိုက်ဝေးလမ်းအတိုင်း မောင်နှင်လာသည့် အာဏာသိမ်းစစ်ကောင်စီ၏ ကားများကို  မတ်လ(၁၂)ရက်နေ့ နံနက်ပိုင်းက တိုက်ခိုက်ရာ စစ်ကောင်စီတပ်သား (၃)ဦးသေပြီး (၁)ဦး အရှင်မိကာ လက်နက် (၅)လက် သိမ်းဆည်းရမိကြောင်း  သိရသည်။

တိုက်ခိုက်မှုကို Phoenix Defence Force - Taze (တန့်ဆည်မြို့နယ်တပ်ရင်း (၂)၊ တပ်မ(၇)၊ တပ်ခွဲ (၃) )နှင့် ဓူဝံမြောက်ပိုင်းမဟာမိတ်တပ်ဖွဲ့တို့ ပူးပေါင်းတိုက်ခိုက်ခဲ့ကြောင်း သိရသည်။

တိုက်ပွဲအတွင်း သေနတ် (၅)လက်နှင့် လက်နက်ခဲယမ်းအချို့ သိမ်းဆည်းနိုင်ခဲ့ပြီး စစ်ကောင်စီတပ်သားများ ဒဏ်ရာများနှင့် ခြေဦးတည့်ရာ ထွက်ပြေးသွားကြကြောင်း သိရသည်။

"စခများကို လိုက်လှန်ပစ်ခတ်တိုက်ခိုက်ခဲ့သော်လည်း လက်နက်ခဲယမ်းမလုံလောက်မှု အခက်အခဲတွေကြောင့် မိမိတို့ တော်လှန်ရေးရဲဖော်များ ပြန်လည်ဆုတ်ခွာခဲ့ပါသည်။"ဟု Phoenix Defence Force - Tazeက ဆိုသည်။

တိုက်ပွဲဖြစ်ပွားပြီးနောက် လက်ရှိတွင် စိမ်းခါးရွာကို အကြမ်းဖက်စစ်ကောင်စီတပ်သားများက မီးရှို့နေကြောင်း သိရသည်။