အာဏာသိမ်းစစ်ကောင်စီ၏ ပြည်ထောင်စုအစိုးရအဖွဲ့က ငွေကြေးအခက်အခဲများကို ဖြေရှင်းနိုင်ရန်အတွက် ပြည်သူများ၏ လက်ဝယ်တွင်ရှိနေသည့် ငွေကြေးများကို ဘဏ်တွင် လာရောက် အပ်နှံစေရေး စည်းရုံးဆောင်ရွက်ရန်အတွက် လျှို့ဝှက်ညွှန်ကြားထားသည်။
ငွေကြေးစီးဆင်းလည်ပတ်မှု ကောင်းမွန်မှသာ အလုပ်အကိုင် အခွင့်အလမ်းနှင့် စီးပွားရေး ဖွံ့ဖြိုးတိုးတက်မည် ဖြစ်သောကြောင့် ပြည်သူများလက်ဝယ်တွင် ရှိသော ငွေကြေးများကို ဘဏ်သို့ လာရောက် အပ်နှံစေနိုင်ရေး စည်းရုံးဆောင်ရွက်ရန်
ဟု အာဏာသိမ်းစစ်ကောင်စီ၏ ပြည်ထောင်စုအစိုးရအဖွဲ့ အစည်းအဝေးတွင် ပြောကြားမှုအပေါ် လိုက်ပါဆောင်ရွက်နိုင်ရန်အတွက် တဆင့်ကဲပြီး အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်၏ လက်အောက်ခံ တိုင်းနှင့်ပြည်နယ် ဝန်ကြီးချုပ်များက ဒီဇင်ဘာလအတွင်း စာထုတ်ကာ လျှို့ဝှက်ညွှန်ကြားထားခြင်း ဖြစ်ကြောင်း သိရသည်။
အာဏာသိမ်းလိုက်ချိန်မှစ၍ ဘဏ်များမှ အပ်ငွေများထုတ်ယူ၍ မရတော့ဘဲ အကန့်အသတ်များဖြင့် ထုတ်ပေးနိုင်တော့သည့် အခြေအနေဖြစ်လာသည့် အပြင် အာဏာသိမ်းအဖွဲ့က သံသယရှိသူများ၏ ဘဏ်အကောင့်များကို ပိတ်သိမ်းခိုင်းခြင်းများကို ဘဏ်များက လုပ်ဆောင်ပေးနေသဖြင့် ဘဏ်များအပေါ် ယုံကြည်မှုပျက်ပြားလာသည့် အခြေအနေနှင့် ကြုံနေရခြင်းလည်း ဖြစ်သည်။
