ရှမ်းပြည်နယ်မြောက်ပိုင်းရှိ  ပလောင်ကိုယ်ပိုင်အုပ်ချုပ်ခွင့်ရဒေသ နမ့်ဆန်မြို့အနီးရှိ လွယ်ခမ်းကျေးရွာတွင် ၂၀၂၁ ခုနှစ် မတ်လ (၁၄) ရက်နေ့  ညနေ (၄) နာရီဝန်းကျင်၌ အာဏာသိမ်းစစ်တပ်နှင့် တအာင်းအမျိုးသား လွတ်မြောက်ရေး တပ်မတော် (TNLA)တို့ ပစ်ခတ်မှုဖြစ်ပွားပြီးနောက် လွယ်ခမ်းနှင့် ငွန်ဆိုင်းကျေးရွာကြားတွင် ပြည်သူ့စစ်ခေါင်းဆောင် ထွန်းမြတ်လေး ပစ်ခတ်ခံရမှုဖြင့် သေဆုံးသွားကြောင်း သိရသည်။

နမ့်ဆန်မြို့ရှိ ပြည်သူ့စစ်ခေါင်းဆောင် ထွန်းမြတ်လေး၏ နေအိမ်ကို TNLA က ပစ်ခတ်ခဲ့ရာ စစ်တပ်ကရောက်လာပြီး အပြန်အလှန် ပစ်ခတ်မှုများ ဖြစ်ပွားပြီးနောက် TNLA က ပြန်ဆုတ်သွားကာ အဆိုပါနေအိမ်တွင် လူအထိအခိုက် မရှိကြောင်း သိရသည်။

ယင်းနောက် လွယ်ခမ်းနှင့် ငွန်ဆိုင်းကျေးရွာကြားတွင် ပြည်သူ့စစ်ခေါင်းဆောင် ထွန်းမြတ်လေး ပစ်ခတ်ခံရပြီး သေဆုံးနေသည်ကို တွေ့ရပြီး အလောင်းအား နမ့်ဆန်မြို့ ပြည်သူ့ဆေးရုံသို့ ပို့ထားကြောင်း သိရသည်။

ပြည်သူ့စစ်တပ်ဖွဲ့ဝင်များသည် စစ်တပ်၏ လက်အောက်ခံများဖြစ်ပြီး စစ်တပ်၏ စီမံခန့်ခွဲမှုအောက်တွင်ရှိသည်။