ရှမ်းပြည်နယ်(မြောက်ပိုင်း) ကျောက်မဲမြို့အဝင်ရှိ DENKO စက်သုံးဆီအရောင်းဆိုင်၌ ၂၀၁၉ ခုနှစ်၊ အောက်တိုဘာလ (၂၁)ရက်နေ့ နံနက်အစောပိုင်းတွင် လက်လုပ်ဗုံးအတုဖြင့် ခြိမ်းခြောက်ငွေတောင်းခံသူဟု ယူဆရသူအား ရဲတပ်ဖွဲ့က နာရီပိုင်းအတွင်း ဖေါ်ထုတ်ဖမ်းဆီးရမိလိုက်ကြောင်း သိရသည်။

"မနက် ၁၀ နာရီလောက်မှာ အဲဒီအမျိုးသား အိမ်ငှားပြီးနေထိုင်တဲ့နေရာကို စုံစမ်းဖေါ်ထုတ်နိုင်ခဲ့ပြီး ချက်ချင်း ဖမ်းဆီးနိုင်ခဲ့တာဖြစ်ပါတယ်။ ဗုံးကတော့အတုပါ၊ ကီးပက်ဖုန်းတစ်လုံးရယ်၊ ဆိုင်ကယ်ပစ္စည်းတစ်ခုရယ်၊ ဖုန်း အားသွင်းတဲ့ အတုံးတစ်ခုရယ်ကို ဆင်ထားတယ်။ ကတ္ထူစက္ကူတွေပတ်ပြီး တိပ်ပတ်ထားတော့ ရုတ်တရက်ဆို တကယ့်ဗုံးတစ်လုံးလို့ထင်ရအောင် လုပ်ထားတာ " ဟု ကျောက်မဲမြို့မရဲတပ်ဖွဲ့မှ ရဲအရာရှိတစ်ဦးက တာချီလိတ်သတင်းအေဂျင်စီသို့ ပြောသည်။

ကျောက်မဲမြို့အဝင် ခိုအုံကျေးရွာအနီး ပြည်ထောင်စုလမ်းမကြီးဘေးရှိ DENKO စက်သုံးဆီအရောင်းဆိုင်၏ အများသုံးအိမ်သာထဲတွင် ဗုံးထောင်ထားကြောင်းနှင့် ငွေကျပ်ဆယ်သိန်းအား Wave Money ဖြင့်လွှဲပေးရန် ရေးထားသည့်စာကို ဆိုင်ဝန်ထမ်းများက ဆိုင်ဧရိယာအတွင်း သန့်ရှင်းလုပ်နေစဉ် နံနက် (၄) နာရီ (၄၅) မိနစ်ခန့်က တွေ့ခဲ့ရသဖြင့် သက်ဆိုင်ရာသို့ အကြောင်းကြားခဲ့ခြင်းဖြစ်သည်။
ဆိုင်အိမ်သာအတွင်းမှ လက်လုပ်ဗုံးအား နယ်မြေခံတပ်မှ ဗုံးရှင်းလင်းရေးအဖွဲ့က ဖယ်ရှားကာ ဗုံးအတုဖြစ်ကြောင်း အတည်ပြုပေးခဲ့ခြင်းဖြစ်သည်။

ယင်းနောက် Wave Money မှ ငွေထုတ်ယူသွားသူမှာ ကျောက်မဲမြို့တွင် အိမ်ငှားနေထိုင်သည့် အမျိုးသားတစ်ဦးဖြစ်ကြောင်း ရဲတပ်ဖွဲ့က ဖေါ်ထုတ်နိုင်ခဲ့ပြီး ခြိမ်းခြောက် ငွေတောင်းခံသူဟု ယူဆရသည့် အသက် (၃၂)နှစ်အရွယ် စောအေးမြင့်စန်း(ခ) စောချစ်ကို ဖမ်းဆီးရမိခဲ့ခြင်းဖြစ်သည်။

စောအေးမြင့်စန်း (ခ) စောချစ်ကို ကျောက်မဲမြို့မရဲစခန်းတွင် (ပ) ၁၅၆/ ၂၀၁၉၊ ရာဇသတ်ကြီး ပုဒ်မ-၃၈၆ ဖြင့် အမှုဖွင့် စစ်ဆေးနေကြောင်း သိရသည်။

သတင်း #နေဖြိုးမြင့်
ဓါတ်ပုံ - ရဲတပ်ဖွဲ့