မန္တလေးတွင် ငလျင်ကြောင့် ပြိုကျသွားသည့် ဂရိတ်ဝေါဟိုတယ်တွင် ပိတ်မိနေသူများအား ဆက်လက်ရှာဖွေပေးရန် မိသားစုဝင်များက ငိုယိုတောင်းဆိုနေကြသည့် ဗီဒီယိုဖိုင်တစ်ခု ၂၀၂၅ ခုနှစ် ဧပြီလ (၃)ရက်နေ့တွင် လူမှုကွန်ယက်စာမျက်နှာ၌ တွေ့လာရသည်။
“တောင်းပန်ဆို တောင်းပန်ပါရစေ။ ကယ်ကြပါအုံး”ဟု လမ်းဘေးတွင် ဒူးထောက်လက်အုပ်ချီကာ တောင်းပန်နေကြသည့် အမျိုးသမီးများက ငိုယိုအကူအညီတောင်းနေကြသည်ကို တွေ့ရသည်။
အဆိုပါဟိုတယ်တွင် ပိတ်မိနေသူများအား ရှာဖွေခြင်းအား ဟိုတယ်အုပ်ချုပ်ရေးပိုင်းက မတ်လ (၃၁)ရက်နေ့ကတည်းက ရပ်ဆိုင်းလိုက်သဖြင့် ကျန်ရှိသူများအား ဆက်လက်ရှာဖွေပေးရန် မိသားစုဝင်များက တောင်းဆိုနေကြခြင်းဖြစ်သည်။
မတ်လ (၂၈)ရက်နေ့က ငလျင်အတွင်း ပြိုကျသွားသည့် အဆိုပါဟိုတယ်တွင် ရှာဖွေခြင်းကို မတ်လ (၃၀)ရက်နေ့၌ ရုရှား၊ တရုတ်နှင့် ပြည်တွင်းကယ်ဆယ်ရေးအဖွဲ့များက လုပ်ဆောင်ခဲ့ကာ မတ်လ (၃၁)ရက်နေ့ ညနေပိုင်း၌ ရှာဖွေရေး ရပ်ဆိုင်းလိုက်ကြခြင်းဖြစ်ကြောင်း သိရသည်။
ရှာဖွေမှုအတွင်း ဟိုတယ်၏ အနောက်ဘက်ခြမ်းကိုသာ ရှာဖွေခဲ့ကြပြီး ဟိုတယ်ရှေ့ဘက်ခြမ်း၌လည်း အသက်ရှင်လျက် ပိတ်မိနေသူများရှိနိုင်သည်ဟု ပိတ်မိနေသူများ၏ မိသားစုဝင်များက မျှော်လင့်နေကြခြင်းဖြစ်သည်။
"ဟိုတယ်က ပြောပါတယ်။ နိုင်ငံတော်က လုပ်ပေးရမယ်လို့ ပြောပါတယ်။ သူတို့လုပ်ပေးလို့ မရဘူးတဲ့။ အထဲမှာ သုံးယောက်ရှိသေးတယ်လို့လည်း ပြောတယ်။ အခုထက်ထိလည်း အဲဒီသုံးယောက်ကို မကယ်သေးဘူး။ ကယ်ကြပါဦး။ “ဟု တောင်းပန်နေကြသည်ကို တွေ့ရသည်။
ဂရိတ်ဝေါဟိုတယ်အတွင်း ပိတ်မိနေသူများအား ဆက်လက်ရှာဖွေပေးရေးအတွက် ဧပြီလ (၁)ရက်နေ့ကတည်းက တောင်းဆိုနေကြသည်ကိုလည်း တွေ့ရသည်။
#TachileikNewsAgency
Video: လူမှုကွန်ရက်
