ရှမ်းပြည်နယ် (အရှေ့ပိုင်း) တာချီလိတ်မြို့တွင် လိုင်စင်မဲ့ယာဉ်များကို လူနာတင်ယာဉ်အဖြစ် အသုံးပြု နေရသည့် တာချီလိတ်နာရေးကူညီမှုအသင်းအတွက် လိုင်စင်ရှိ မော်တော်ယာဉ်များ အသုံးပြုနိုင်ရေး စုပေါင်းလှူဒါန်းနေကြရာ နှစ်ရက်တာအတွင်း ကျပ်(၉၇)သိန်းကျော်နှင့် မော်တော်ယာဉ် (၂)စီး လှူဒါန်းထားကြပြီဖြစ်ကြောင်း သိရသည်။

“အသင်းမှာက နာရေးကားဖြစ်တဲ့ HSE လိုင်စင်ကားတော့ရှိပါတယ်။ လူနာတင်ယာဉ်အတွက် လိုတာဆိုတော့ အခု လိုင်စင်ကားဝယ်နိုင်ဖို့ စုပေါင်းလှူဒါန်းနေကြတာ ဖြစ်ပါတယ်။ အရင်သုံးနေကျကားအတိုင်း လိုင်စင်နဲ့ဆိုတော့ သိန်း(၂၀၀)လောက်တော့ ကျမယ်လို့ ထင်တယ်။ လောလောဆယ် ငွေလှူဒါန်းနေတာအပြင် ကျိုင်းတုံကနေ လိုင်စင်ပါတဲ့မော်တော်ယာဉ်တစ်စီးလှူမယ်ပြောတယ်။ နောက်ထပ် ထိုင်းဘက်ကလည်း လိုင်စင်နဲ့မော်တော်ယာဉ်တစ်စီး လှူမယ်လို့လည်း ပြောထားပါတယ်”ဟု တာချီလိတ်နာရေးကူညီမှုအသင်း ဥက္ကဌ ဦးလှမိုးက တာချီလိတ်သတင်းအေဂျင်စီသို့ ပြောသည်။

တာချီလိတ်မြို့တွင် မတော်တဆမှုများအပါအဝင် အရေးပေါ်လူနာတင်ယာဉ်လိုအပ်မှုများအတွက် အများဆုံး အကူအညီပေးနေရသည့် တာချီလိတ်နာရေးကူညီမှုအသင်းတွင် ယခင်က လိုင်စင်မဲ့မော်တော်ယာဉ်ကို အသုံးပြုနေရခြင်းဖြစ်ပြီး လိုင်စင်မဲ့ယာဉ်များကို သက်ဆိုင်ရာထံ အပ်နှံရတော့မည်ဖြစ်၍ လိုင်စင်ရှိ မော်တော်ယာဉ် အသုံးပြုနိုင်ရေး စုပေါင်းလှူဒါန်းနေကြခြင်းဖြစ်သည်။

တာချီလိတ်နာရေးကူညီမှုအသင်းက အသုံးပြုနေသည့် လိုင်စင်မဲ့မော်တော်ယာဉ်(၂)စီးကို သက်ဆိုင်ရာသို့ အပ်နံှရမည်ဖြစ်၍ အရေးပေါ်ကူညီရေးအတွက် အခက်အခဲမဖြစ်စေရန် လိုင်စင်ရှိကားများ ဝယ်ယူနိုင်ရေး ၂၀၁၉ ခုနှစ်၊ အောက်တိုဘာလ (၁၈)ရက်နေ့မှစ၍ စုပေါင်းလှူဒါန်းနေကြရာ အောက်တိုဘာလ (၁၉)ရက်နေ့တွင် အလှူရှင် (၅၆)ဦးက အလှူငွေစုစုပေါင်း ကျပ် ( ၈၉၅၆၅၀၀)၊ ဘတ်ငွေ (၁၄၁၅၅)နှင့် အမေရိကန်ဒေါ်လာ (၁၀၀) လှူဒါန်းထားပြီး အလှူရှင်(၂)ဦးက မော်တော်ယာဉ် (၂)စီးလှူဒါန်းမည်ဖြစ်ကြောင်း သိရသည်။

Tachileik News Agency