~~~~~~~~⊰❂ Unicode Version ❂⊱~~~~~~~~

"အစီအစဉ်တော့ ရှိပါတယ်။ ကျွန်တော်တို့လက်ထဲမှာ ကာကွယ်ဆေးအရန်သင့် မရှိသေးလို့ အလှူခံရဦးမှာပေါ့။ ကာကွယ်ဆေးက အပြင်မှာဝယ်ရင်ဈေးက အရမ်းကြီးတာဆိုတော့ လူတန်းစားပေါင်းစုံ မထိုးနိုင်ဘူးဖြစ်မှာစိုးလို့"ဟု တာချီလိတ်မြို့ မွေးမြူရေးနှင့်ကုသရေးဦးစီးဌာနမှ လက်ထောက်ညွှန်ကြားရေးမှူး ဒေါက်တာကျော်ကျော်စိုးက တာချီလိတ်သတင်းအေဂျင်စီသို့ ၂၀၁၉ခုနှစ် မေလ(၂၃)ရက်နေ့တွင် ပြောသည်။

တာချီလိတ်မြို့တွင် တိရိစာ္ဆန်ကုဆေးခန်းများတွင် အိမ်မွေးခွေးများအား ခွေးရူးပြန်ကာကွယ်ဆေးကို သတ်မှတ်နှုန်းများဖြင့် ထိုးနိုင်သော်လည်း မွေးမြူရေးနှင့်ကုသရေးဦးစီးဌာနက အလှူရှင်များပေါ်မူတည်၍ လမ်းဘေးခွေးများနှင့် အိမ်မွေးခွေးများကိုပါ နှစ်စဉ်အခမဲ့ထိုးနှံပေးလေ့ရှိကြောင်း သိရသည်။

မြန်မာနိုင်ငံတွင် ခွေးကောင်ရေ လေးသန်းခန့်ရှိမည်ဟု ခန့်မှန်းထားပြီး လူခြောက်ယောက်လျှင် ခွေးတစ်ကောင်နှုန်း ရှိနေကာ နှစ်စဉ် ခွေးကိုက်ခံရသည့် လူဦးရေမှာ (၁၅,ဝဝဝ)မှ (၂၀,ဝဝဝ)ကြားတွင် ရှိသည့်အနက် လူဦးရေ (၂၀၀)ခန့်မှာ ခွေးရူးရောဂါ ကူးစက်ခံရကြောင်း ကျန်းမာရေးဝန်ကြီးဌာနမှ အချက်အလက်များအရသိရပြီး အိမ်မွေးတိရစ္ဆာန်များမှတ်ပုံတင်စနစ်ဖြင့် ရောဂါကာကွယ်ရေး ထိန်းချုပ်နိုင်ရန်လည်း ကြိုးစားနေကြောင်း မွေးမြူရေးနှင့်ကုသရေးဦးစီးဌာနထံမှ သိရသည်။

ခွေးရူးရောဂါသည် ရောဂါကူးစက်ခံရချိန်မှ ပျမ်းမျှ (၇)ရက်မှ (၁၄)ရက်အတွင်း သေဆုံးနိုင်ပြီး တိရစ္ဆာန်များတွင် ခွေးရူးရောဂါကူးစက်ခံထားရပါက ရုတ်တရက်အမူအရာများ ပြောင်းသွားခြင်း၊ ထိုင်းမှိုင်းခြင်း၊ အစာမစားခြင်း၊ တံတွေးများ အလွန်အကျွံထွက်ခြင်း၊ ဦးတည်ရာမဲ့သွားခြင်း၊ အစာ၊ ရေမျိုချရန် ခက်ခဲခြင်းစသည့် လက္ခဏာများ တွေ့ရမည်ဖြစ်ကြောင်း သိရသည်။

ခွေးရူးရောဂါကူးစက်ခံထားရသည့် တိရစ္ဆာန်၏ တံတွေးမှ ရောဂါပိုးကူးစက်နိုင်ပြီး လူတွင်ကူးစက်ခံရသည့် ခွေးရူးရောဂါ၏ (၉၉)ရာခိုင်နှုန်းမှာ ခွေးကိုက်ခံရခြင်းမှ ကူးစက်ခြင်းဖြစ်ကြောင်း သိရသည်။

ခွေးကိုက်ခံရပါက ဒဏ်ရာကို ဆပ်ပြာဖြင့် သေချာစွာဆေးကြောသန့်စင်ပြီး ချက်ချင်း ကာကွယ်ဆေး ထိုးနိုင်လျှင် အသက်အန္တရာယ်မှ ကာကွယ်နိုင်သဖြင့် ခွေးကိုက်ခံရလျှင် ဆေးဘက်ဆိုင်ရာဆရာဝန်ထံ ကုသမှုခံယူရန် လိုအပ်ကြောင်း သိရသည်။

Tachileik News Agency
သတင်း - #ဟန်စိုးထိုက်