~~~~~~~~⊰❂ unicode ❂⊱~~~~~~~~

ရှဉ့်နှစ်ကောင်ကြောင့် လျှပ်စစ်ဓာတ်အားပြတ်တောက်မှုဖြစ်ပွားခဲ့ခြင်းနှင့် ပတ်သက်၍ မကျီးကန် ဓာတ်အားခွဲရုံမှူးနှင့် တွေ့ဆုံမေးမြန်း
***************
မကွေးတိုင်းဒေသကြီး မကျီးကန်ဓာတ်အားခွဲရုံရှိ ထရန်စဖော်မာ(၂)လုံးမှာ ရှဉ့်ဝင်ရောက်မှုကြောင့် ဧပြီလ(၃ဝ)ရက်နေ့က လောင်ကျွမ်းပျက်စီးမှု ဖြစ်ပွားခဲ့၍ မကွေးမြို့နှင့် ရေနံချောင်းမြို့တို့တွင် လျှပ်စစ်ဓာတ်အားပြတ်တောက်မှုဖြစ်ပွားခဲ့ရာ လက်ရှိတွင် ရပ်ကွက်များကို အပိုင်းလိုက် အလှည့်ကျစနစ်ဖြင့် လျှပ်စစ်မီး ပေးဝေနေရခြင်းဖြစ်သည်။

ထရန်စဖော်မာများ အစားထိုးတပ်ဆင်မှုလုပ်ဆောင်နေပြီဖြစ်ရာ လျှပ်စစ်မီးအားကို ပုံမှန်အတိုင်း ပြန်လည်ပေးဝေနိုင်မည့်အခြေအနေကို သိရှိနိုင်ရန် မကျီးကန်ဓာတ်အားခွဲရုံသို့ သွားရောက်ပြီး မကွေးပင်မဓာတ်အားခွဲရုံမှ ခွဲရုံမှူး ဦးဇော်ဖိုးလှိုင်နှင့် တာချီလိတ်သတင်းအေဂျင်စီက သွားရောက်တွေ့ဆုံမေးမြန်းထားပါသည်။

TNA : အခုဒီမှာလုပ်ဆောင်နေတာလေးတွေနဲ့ ပတ်သက်ပြီး ရှင်းပြပေးပါဦးဆရာ။
UZPH: အရင်က ပါဝါထရန်စဖော်မာနှစ်လုံးလောင်ကျွမ်းသွားတဲ့အတွက် အစားထိုးတပ်ဆင်ခြင်းလုပ်ငန်း ဆောင်ရွက်နေတာပါ။ ဒီထရန်စဖော်မာတွေက စစ်ကိုင်းတိုင်း၊ ညောင်ပင်ကြီးဓာတ်အားခွဲရုံက သယ်လာရတာပါ။

TNA : ထရန်စဖော်မာနှစ်လုံး လောင်ကျွမ်းပျက်စီးရတာက ဘယ်လိုကြောင့်ဖြစ်သွားတယ်ဆိုတာ သိပါရစေ။
UZPH: ရှဉ့်နှစ်ကောင်ဝင်ရောက်လာမှုကြောင့် အခန့်မသင့် ဖြစ်သွားတဲ့သဘောပါပဲ။ ထရန်စဖော်မာသုံးလုံး ရှိတဲ့အနက်က နှစ်လုံးလောင်ကျွမ်းသွားတာပါ။

TNA : ရှဉ့်ကြောင့်ဖြစ်တယ်ဆိုတဲ့အပေါ်မှာ ပြည်သူတွေ လက်မခံနိုင်ကြဘဲ ဖြစ်နေတယ်။ အဲဒီအပေါ်မှာ ရှင်းပြပေးစေလိုပါတယ်။
UZPH: ဧပြီလ(၃၀)ရက်နေ့ မနက်ပိုင်းကဖြစ်တာကို မယုံမှာစိုးလို့ ဓာတ်ပုံရိုက်ထားပြီး ညနေမိုးချုပ်ခါနီးမှ အဲဒီ့ရှဉ့်ကိုလွှင့်ပစ်ခဲ့ရပါတယ်။ လျှပ်စစ်ဆိုတာက သိတဲ့အတိုင်း ဖြစ်လိုက်တာနဲ့ သေသွားတာမျိုးဆိုတော့ မီးလောင်ကျွမ်းသွားတဲ့အထိ ဖြစ်သွားဖို့ မလိုဘူးပေါ့။ မြင်တဲ့အတိုင်းပါပဲ။ ထရန်စဖော်မာတွေမှာ ရှဉ့်မတက်ရေး၊ မြွေမတက်ရေး၊ ကြွက်မတက်ရေး တို့အတွက် ကာကွယ်ထားတာတွေရှိပါတယ်။ ရှဉ့်က အကာအကွယ်မရှိတဲ့ တိုင်ကြီးတွေကတစ်ဆင့်တက်ပြီး ရှဉ့်ဆိုတဲ့သဘောက ဒီထရန်စဖော်မာထဲကို သွယ်ထားတဲ့ကြိုးကနေ ဆင်းလာတယ်လို့ ယူဆပါတယ်။ ကိုယ်တိုင်မြင်ရတာမျိုးမဟုတ်တော့ ဖြစ်နိုင်ခြေကိုပဲ သုံးသပ်လို့ရပါတယ်။ အခြားအကြောင်းအရာကတော့ ဘာတစ်ခုမှမတွေ့ပါဘူး။ ကျွန်တော်တို့ ရုံးချုပ်မှာလည်း ကျွန်တော်တို့ထက်တော်တဲ့ ပညာရှင်တွေအများကြီးရှိပါတယ်။ သူတို့လည်း ဒီမှတ်ချက်အပေါ်မှာ လက်ခံကြပါတယ်။

TNA : လောင်ကျွမ်းပျက်စီးသွားတဲ့ ထရန်စဖော်မာတွေရဲ့ MVA က ဘယ်လောက်တွေလဲဆိုတာနဲ့ အခု အစားထိုးတပ်ဆင်တဲ့ ထရန်စဖော်တွေကရော ဘယ်လောက်ရှိလဲသိပါရစေ။
UZPH: မူလ ထရန်စဖော်တွေက တစ်လုံးကို 20MVA (၃)လုံးဆိုတော့ 60MVA ဖြစ်ပြီး အစားထိုး တပ်ဆင်နေတဲ့ ထရန်စဖော်မာတွေက တစ်လုံးကို 13.33MVA (၃)လုံးဆိုတော့ 40MVA လောက်ရှိပါတယ်။ အဲဒီထဲက (၁)လုံးချွတ်ယွင်းမှုဖြစ်ပွားရင် အစားထိုးနိုင်ဖို့အတွက် အရံ(၁)လုံး အပိုပါလာပါတယ်။

TNA : မူလ transformer တွေက 60MVA ရှိပြီးတော့ အစားထိုးတပ်ဆင်တဲ့ အလုံးတွေက 40MVA ပဲရှိ တယ်ဆိုတော့ ဓာတ်အားဖြန့်ဝေဖို့က လုံလောက်မှုရှိပါ့မလား။
UZPH: နိုင်ပါတယ်ခင်ဗျ။ အရင် ထရန်စဖော်မာတုန်းက အဝင်ဗို့အား 60MVA ရှိတယ်ဆိုပေမဲ့ သုံးတာက 21MW ပဲ သုံးတာဆိုတော့ နိုင်ပါတယ်။ အခု(၃)လုံးက 40MVA လောက်ရှိတော့ မဂ္ဂါဝပ်နဲ့ဆိုရင် 36 လောက် ရှိပါမယ်။

TNA : ဒီဓာတ်အားခွဲရုံရဲ့ ကွန်ရက်ကိုလည်း သိပါရစေ။
UZPH: ဓာတ်အားကွန်ရက်စနစ်က ချောက်ဓာတ်အားလိုင်း၊ တောင်တွင်းကြီးဓာတ်အားလိုင်း၊ မင်းဘူး(မန်း) ဓာတ်အားလိုင်း အဲဒီဓာတ်အားကွန်ရက်ထဲမှာပဲရှိပါတယ်။ အဲဒီဓာတ်အားကွန်ရက်ထဲကမှ မကွေးဓာတ်အားခွဲရုံကို ရောက်ပြီး ဒီကမှ မကွေး၊ ရေနံချောင်း၊ မြင်ကွန်း၊ မိကျောင်းရဲတို့ကို ဓာတ်အားဖြန့်ဖြူးပါတယ်။

TNA : လတ်တလော ဓာတ်အားဖြန့်ဖြူးနေရတဲ့ အခြေအနေလေးလည်း ပြောပြပေးပါဦး။
UZPH: 15MVA (၁)လုံးရှိပါတယ်။ အဲဒီကမှ မူလပေးနေတဲ့နေရာတွေကို မျှပြီးအချိန်ခွဲပေးနေရတာပါ။

TNA : ပေးနေတဲ့အချိန်လေးမှာကိုပဲ ဓာတ်အားပြတ်တောက်မှုတွေ ဖြစ်နေတဲ့အတွက် ပြည်သူတွေမှာ သုံးစွဲရတာ ကသိကအောက်ဖြစ်နေကြပါတယ်။ ဘာကြောင့် အဲလို ဓာတ်အားပြတ်တောက်မှု ဖြစ်ရတာလဲ ဆိုတဲ့အပေါ်မှာရော ရှင်းပြပေးပါခင်ဗျ။
UZPH: 15 MVA က 9MW ကျော်သွားရင် ထိန်းရပါတယ်။ အုပ်စု(၄)စုခွဲပြီးပေးဖို့ အစိုးရအဖွဲ့က တာဝန် ရှိသူတွေရယ် တိုင်းလျှပ်စစ်အင်ဂျင်နီယာနဲ့ မြို့နယ်လျှပ်စစ်အင်ဂျင်နီယာအဖွဲ့တို့ ညှိနှိုင်းပြီး ဘယ်အုပ်စုက load ဘယ်လောက်များတယ်ဆိုတာ တွက်ချက်ပေးတဲ့အပေါ် ပထမတော့ (၆)နာရီမီးပေးစနစ် လုပ်ခဲ့ပေမဲ့ အခက်အခဲရှိလာတဲ့အတွက် (၃)နာရီမီးပေးစနစ်ကိုပြောင်းခဲ့ရပါတယ်။ ဒါလည်းအခက်အခဲတော့ရှိတုန်းပါပဲ။ ပြည်သူတွေအနေနဲ့ ရတဲ့အချိန်လေးမှာ ဝိုင်းဆွဲသုံးကြရတော့ ပုံမှန်ဝန်အားမဟုတ်တော့ဘဲ load များပြီး ပြုတ်ပြုတ်ကျတာမျိုးတော့ရှိနေပါသေးတယ်။ အဲလိုပြတ်သွားတဲ့အပေါ်မှာလဲ အသုံးနည်းတဲ့ ညဉ့်နက်အ ချိန်မျိုးတွေမှာ ပြန်အစားထိုးပေးပါတယ်။

TNA : ပျက်စီးဆုံးရှုံးသွားတဲ့ ထရန်စဖော်မာတွေရဲ့တန်ဖိုးနဲ့ သယ်ယူလာတဲ့ ထရန်စဖော်မာတွေအတွက်ကုန် ကျစရိတ်ဘယ်လောက်ရှိမလဲ။ ဒါကိုဘယ်ဘက်ဂျက်ကနေ သုံးစွဲသလဲ ဆိုတာလေးလည်းသိပါရစေ။
UZPH: ပျက်စီးဆုံးရှုံးသွားတဲ့ ထရန်စဖော်မာတွေရဲ့တန်ဖိုးကိုတော့ ကျွန်တော့်အနေနဲ့မသိပါဘူး။ သယ်ဆောင် လာတဲ့ ထရန်စဖော်မာတွေအတွက်ကတော့ ကျွန်တော်တို့ဝန်ကြီးဌာနရဲ့ စီမံမှုနဲ့ပဲ ဒီကိုရွှေ့ပြောင်းယူလာတာဖြစ်ပြီး အခုလုပ်နေတဲ့ဝန်ထမ်းတွေကလည်း နေပြည်တော်ကကျွန်တော်တို့ဝန်ကြီးဌာနကပဲ ဖြစ်ပါတယ်။

TNA : မီးအပြည့်အဝပြန်ပေးနိုင်ဖို့ ရက်ကိုသိပါရစေ။
UZPH: ဒီနေ့ည(မေလ ၆ ရက်)ဆိုရင် တစ်ညလုံး(၂၄)နာရီအထိ ဒီနေ့ထည့်ပြီးတဲ့ ထရန်စဖော်မာဆီတွေကို ရေငွေ့ပျံသွားအောင်၊ ကာဗွန်ဂျိုးတွေထွက်သွားအောင် စက်မောင်းကြရမယ်။ ဒါတွေလုပ်ပြီး ဆီအခြေအနေ ရလဒ်ကောင်းလာပြီဆိုရင်လည်း နားလို့မရတော့ဘူး။ နေပြည်တော်ရုံးချုပ်မှာ လျှပ်စစ်စမ်းသပ်ရေးဌာန ဆိုတာရှိတယ်။ မေလ(၈)ရက်နေ့မှာ အဲဒီအဖွဲ့ကိုခေါ်ပြီး စမ်းသပ်မှုတွေပြုလုပ်မယ်။ အိုကေတယ်ဆိုရင် ထရန်စဖော်မာတွေကို ဓာတ်အားထည့်ပြီး အနည်းဆုံး(၈)နာရီကနေ (၁၂)နာရီလောက်ထိ စောင့်ကြည့်ရပါအုံးမယ်။ စိတ်ချရပြီဆိုမှ မေလ(၉)ရက်နေ့လောက်ကျမှ ဓာတ်အားဖြန့်ဖြူးနိုင်မယ်လို့ ခန့်မှန်းပါတယ်။

TNA : အဲလိုစတင်ပြီး ဓာတ်အားပြန်လည်ဖြန့်ဖြူးပြီဆိုတဲ့အခါမှာ ဗို့အားတွေမြင့်ပြီးဝင်သွားတာမျိုး ဖြစ်နိုင်သ လားဆရာ။
UZPH: မရှိပါဘူး။ အဲလိုမဖြစ်အောင်လို့ ratio test ဆိုတာမျိုးကိုစမ်းရပါတယ်။ ဒီကနေ ဗို့အားဘယ်လောက် လွှတ်ရင် ဟိုကနေဘယ်လောက်ထွက်မယ်ဆိုတာ စိတ်ချရပြီဆိုမှ လွှတ်မှာဖြစ်ပါတယ်။
ကျေးဇူးတင်ပါတယ်။

တွေ့ဆုံမေးမြန်းသူ #ဖီးနစ်