ရှမ်းပြည်နယ်တောင်ပိုင်းဒေသ ရပ်စောက်မြို့နယ်အတွင်း အာဏာသိမ်း စစ်ကောင်စီတပ် နှင့် ဓနုပြည်သူ့လွတ်မြောက်ရေးတပ်တော်(DPLA)တို့ တိုက်ပွဲဖြစ်ပွားနေစဉ်အတွင်း စစ်ကောင်စီတပ်၏ လေကြောင်းဖြင့် ဗုံးကြဲတိုက်ခိုက်မှုကြောင့် ကျေးရွာသားတစ်ဦး သေဆုံးခဲ့ရကြောင်း သိရသည်။

ရပ်စောက်မြို့နယ်၊ ကျောက်ဂူဒေသတွင်း အမှတ်(၃၄၉)အမြောက်တပ်ရင်းအနီးတွင် ဓနုကိုယ်ပိုင်အုပ်ချုပ်ခွင့်ရဒေသအတွင်း ဓနုပြည်သူ့လွတ်မြောက်ရေးတပ်တော် နှင့် ဆက်လက်တိုက်ပွဲဖြစ်ပွားနေပြီး ဒီဇင်ဘာလ(၁၈)ရက်နေ့ ညနေ(၃)နာရီဝန်းကျင်အချိန်က စစ်ကောင်စီတပ်မှ လေကြောင်းကနေ ဗုံးကြဲတိုက်ခိုက်မှုကြောင့် ထမင်းပေါင်းကျေးရွာမှ ကျေးရွာသားတစ်ဦး သေဆုံးခဲ့ရကြောင်း DPLA ၏ သတင်းနှင့်ပြန်ကြားရေးအဖွဲ့က သတင်းထုတ်ပြန်ထားသည်။

စစ်ကောင်စီတပ်သည် ကျောက်ဂူဒေသတွင်းရှိ ကျေးရွာများသို့ လက်နက်ကြီးဖြင့် ပစ်ခတ်သည့်အပြင် Drone ဖြင့်လည်း ဗုံးကြဲချပြီး တိုက်ခိုက်မှုများ လုပ်ဆောင်နေသို ဒီဇင်ဘာလ(၁၀)ရက်နေ့ကလည်း ကျောက်မီးခတ် ကျေးရွာဘုန်းကြီးကျောင်းကို Drone ဖြင့် ဗုံးကြဲတိုက်ခိုက်မှုကြောင့် အရပ်သားတစ်ဦး ထိခိုက်ဒဏ်ရာရရှိခဲ့သေးကြောင်းလည်း သိရသည်။