မန္တလေးတိုင်း မြင်းခြံခရိုင် တောင်သာမြို့နယ်အတွင်းရှိ ရုံးစဉ်ကြီးတိုက်နယ်ရဲစခန်းကို ပြည်သူ့ကာကွယ်ရေး ပူးပေါင်းတပ်ဖွဲ့များမှ အနီးကပ်ဝင်ရောက်တိုက်ခိုက်ကြောင်း တောင်သာမြို့နယ် ပြည်သူ့ကာကွယ်ရေးအဖွဲ့ (TTA–PDF) အဖွဲ့က ယနေ့ ၂၀၂၄ ခုနှစ် နိုဝင်ဘာလ (၁၂) ရက်နေ့တွင် သတင်းထုတ်ပြန်သည်။

တောင်သာမြို့နယ် တောင်သာ-မိတ္ထီလာလမ်းပေါ်ရှိ ရုံးစဉ်ကြီးတိုက်နယ်ရဲစခန်းကို နိုဝင်ဘာလ (၁၁) ရက်နေ့ နံနက် (၅) နာရီတွင် PDF ပူးပေါင်းတပ်ဖွဲ့များမှ လက်နက်ကြီး ၊ လက်နက်ငယ်များ အပါအဝင် ဒရုန်းများဖြင့် အနီးကပ်ဝင်ရောက် တိုက်ခိုက်ခဲ့ခြင်းဖြစ်ကြောင်း သိရသည်။

တိုက်ခိုက်မှုအတွင်း စခန်းသိမ်းပိုက်နိုင်ခြင်းမရှိသော်လည်း အထိအခိုက်မရှိ ပြန်လည်ဆုတ်ခွာနိုင်ခဲ့ပြီး စစ်ကောင်စီဘက်မှ ရဲတပ်သား (၂)ဦး သေဆုံးပြီး အများအပြား ထိခိုက်ဒဏ်ရာရကြောင်း တောင်သာမြို့နယ် ပြည်သူ့ကာကွယ်ရေးအဖွဲ့က ထုတ်ပြန်သည်။

အဆိုပါ တိုက်ခိုက်မှုအား မြင်းခြံခရိုင် အထူးစစ်ဆင်ရေး အဖြစ် တောင်သာမြို့နယ် ပြည်သူ့ကာကွယ်ရေးအဖွဲ့ (TTA – PDF) ၊ Myingyan Disctric Drone Strike၊ နေပြည်တော် ၈၀၁ တပ်ရင်း၊ မိတ္ထီလာ ပကဖ၊ စဉ့်ကိုင် ပကဖ၊ ကျောက်ပန်းတောင်း ပကဖ၊ တောင်သာ ပလဖနှင့် ညောင်ဦးခရိုင် တပ်ရင်း (၁) တို့မှ ပူးပေါင်းဆောင်ရွက်ခဲ့ခြင်းဖြစ်ကြောင်း သိရသည်။

#TachileikNewsAgency

Photo: TTA-People Defense Force (ပုံဟောင်း)