တနင်္သာရီတိုင်း ကော့သောင်းမြို့နယ်အတွင်းရှိ ရပ်ကွက်၊ ကျေးရွာအုပ်ချုပ်ရေးမှူးများနှင့် ရာအိမ်မှူးများ စစ်မှုထမ်းစုဆောင်းခြင်းနှင့် ငွေကြေးကောက်ခံခြင်းများ ဆက်လက်လုပ်ဆောင်နေပါက စစ်ရေးပစ်မှတ်အဖြစ် သတ်မှတ်ပြီး ရှင်းလင်းသွားမည်ဖြစ်ကြောင်း ကော့သောင်းမြို့နယ် ပြည်သူ့ကာကွယ်ရေးတပ်ဖွဲ့မှ ၂၀၂၄ ခုနှစ် သြဂုတ်လ (၂) ရက်နေ့တွင် သတင်းထုတ်ပြန်သည်။
ကော့သောင်းမြို့နယ်အတွင်းရှိ ရပ်ကွက်/ကျေးရွာအုပ်ချုပ်ရေးမှုးများနှင့် ရာအိမ်မှုးများသည် စစ်မှုထမ်းကိစ္စရပ်များအတွက် လူစုဆောင်းခြင်းများအား အကြောင်းပြ၍ တချို့သည် တစ်အိမ်ထောင်လျှင် တစ်သောင်းကျပ်ကောက်ခံခြင်းနှင့် စစ်ကောင်စီ သတင်းပေးအဖြစ် ဆောင်ရွက်နေကြောင်း ကော့သောင်းမြို့နယ် ပြည်သူ့ကာကွယ်ရေးတပ်ဖွဲ့က ဆိုသည်။
အဆိုပါ ရပ်ကွက်/ကျေးရွာအုပ်ချုပ်ရေးမှုးများနှင့် ရာအိမ်မှုးများ၏ နေရပ်လိပ်စာနှင့် အမည်များအား ပြည်သူ့ကာကွယ်ရေးတပ်ဖွဲ့မှ ရရှိထားပြီး ၊ စစ်မှုထမ်းစုဆောင်းခြင်း ၊ ငွေကြေးကောက်ခံခြင်းနှင့် သတင်းပေးအဖြစ်ဆောင်ရွက်နေခြင်းများအား ရပ်တန့်ရန်နှင့် ပြည်သူနှင့်အတူ ရပ်တည်ကြရန် ကော့သောင်းမြို့နယ် ပြည်သူ့ကာကွယ်ရေးတပ်ဖွဲ့က သတိပေးထားသည်။
ဆက်လက်၍ ပြည်သူနှင့်အတူရပ်တည်ခြင်းမရှိသည့် စစ်ကောင်စီအားပေး ထောက်တိုင်များ ၊ သတင်းပေးသူလျှိုများအား ကော့သောင်းမြို့နယ်ပြည်သူ့ကာကွယ်ရေးအဖွဲ့(ပကဖ) အနေဖြင့် စစ်ကောင်စီနှင့်နည်းတူ စစ်ရေးပစ်မှတ်အဖြစ် သတ်မှတ်ရှင်းလင်းသွားမည်ဖြစ်သည့်အတွက် နောက်ဆုံးအနေဖြင့် သတိပေးခြင်းဖြစ်ကြောင်း သိရသည်။
#TachileikNewsAgency
