မကွေးတိုင်း ပခုက္ကူမြို့တွင် စစ်ကောင်စီယာဉ်တန်း ကြားဖြတ်တိုက်ခိုက်ခံရပြီးနောက် စစ်ကောင်စီတပ်က ကျေးရွာအတွင်းသို့ လေကြောင်းမှ ဗုံးကြဲရာ ဒေသခံ (၄)ဦးသေဆုံးပြီး အများအပြား ဒဏ်ရာရကြောင်း သိရသည်။
ပခုက္ကူမြို့ရှိ စစ်ကောင်စီတပ်မ (၁၀၁)မှထွက်လာသော စစ်ကောင်စီယာဉ်တန်း (၁၃)စီးနှင့် အင်အား(၁၅၀)ဝန်းကျင်ပါ စစ်ကြောင်းကို ပခုက္ကူ-ကမ္မလမ်းပိုင်းတွင် တော်လှန်ရေးတပ်များက ဒရုန်းဖြင့် ဗုံးသီးအလုံး (၅၀)ချ တိုက်ခိုက်ခဲ့ကြောင်း သိရသည်။
တိုက်ခိုက်မှုကြောင့် စစ်ကောင်စီတပ်မှ စစ်ကြောင်းမှူးအပါအဝင် တပ်သား (၁၀)ဦး သေပြီး (၂၈)ဦး ဒဏ်ရာရကြောင်း Young Force UG က ထုတ်ပြန်ထားသော်လည်း Tachileik News Agency အနေဖြင့် သီးခြားအတည်မပြုနိုင်ပါ။
အဆိုပါတိုက်ခိုက်မှုကြောင့် စစ်ကောင်စီယာဉ်တန်းရှေ့ဆက်မတိုးနိုင်သဖြင့် အနီးရှိရွာများကို လေကြောင်းမှ ဗုံးကြဲတိုက်ခိုက်ရာ ဒေသခံ အမျိုးသမီးများ အပါအဝင် (၄)ဦးသေဆုံးပြီး (၁၆)ဦး ဒဏ်ရာရရှိခဲ့သည်ဟု သိရသည်။
တော်လှန်ရေးတပ်များသည် ဇွန်လ(၃)ရက်နေ့ကလည်း ပခုက္ကူမြို့နယ်ရှိ စစ်ကောင်စီတပ်စွဲထားသော အနောက်ဘုန်းကံရွာကို တိုက်ခိုက်ခဲ့သည်။
#TachileikNewsAgency
Photo: Young Force UG
