~~~~~~~~⊰❂ unicode ❂⊱~~~~~~~~

လူမှုကူညီရေးအသင်းများ၏ တရားမဝင်လိုင်စင်မဲ့ယာဉ်များကို လိုင်စင်ထုတ်ပေးရန် အစီအစဉ်မရှိ
**************
လူမှုကူညီရေးအသင်းများအနေဖြင့် အသုံးပြုနေသည့် တရားမဝင် လိုင်စင်မဲ့မော်တော်ယာဉ်များကို လိုင်စင်ထုတ်ပေးရန်အစီအစဉ်မရှိကြောင်း သိရသည်။

မှတ်ပုံတင်မဲ့ လူမှုကူညီရေးယာဉ်များကို OSS စီမံချက်ဖြင့် တရားဝင် မှတ်ပုံတင်ပေးရန်မှာ ပို့ဆောင်ရေးနှင့် ဆက်သွယ် ရေးဝန်ကြီးဌာနတစ်ခုတည်း ဆောင်ရွက်၍ ရသည့်ကိစ္စမဟုတ်ဘဲ အခြားသက်ဆိုင်သော ဝန်ကြီးဌာနများအပါအဝင် တိုင်းဒေသကြီး/ ပြည်နယ်အစိုးရ အဖွဲ့များနှင့် ပေါင်းစပ်ညှိနှိုင်းပြီး လုပ်ငန်းစီမံချက်ရေးဆွဲလျက် ပြည်ထောင်စုအစိုးရ အဖွဲ့၏မူဝါဒ လမ်းညွှန်အတည်ပြုချက် ဖြင့်ဆောင်ရွက်ရမည့် ကိစ္စရပ်ဖြစ်သဖြင့် လက်ရှိတွင် လုပ်ဆောင်ပေးရန်အစီအစဉ်မရှိသေးကြောင်း ပို့ဆောင်ရေးနှင့်ဆက်သွယ်ရေး ဒုတိယဝန်ကြီး ဦးကျော်မျိုးက ပြန်လည်ဖြေကြားထားခြင်းဖြစ်သည်။

လူမှုကူညီရေး အသင်းအဖွဲ့များ အမှန်တကယ် အသုံးပြုနေသည့် မော်တော်ယာဉ်များ တရားဝင်အသုံးပြုခွင့် ရရှိရေးအတွက် ဖြေလျော့ပေးမည့်အစီအစဉ်နှင့် နိဗ္ဗာန်ယာဉ် (HSE)ကဲ့သို့ လိုင်စင်ခွင့်ပြုပေးနိုင်ရေးအတွက် မည်သည့် ကန့်သတ်ချက်များ သတ်မှတ်ထားသည်ကို သိလိုကြောင်း ၂၀၁၈ ခုနှစ်၊ နိုဝင်ဘာလ (၃၀) ရက်နေ့တွင် ကျင်းပသော ပြည်သူ့လွှတ်တော် အစည်းအဝေးတွင် မောက်မယ်မဲဆန္ဒနယ်မှ ဦးစိုင်းငေါင်းဆိုင်ဟိန်းက မေးမြန်းခဲ့ခြင်းဖြစ်သည်။

နိဗ္ဗာန်ယာဉ်ကိုဖြစ်စေ၊ လူနာတင်ယာဉ်ကိုဖြစ်စေ တရားဝင်တင်သွင်းလာပါက နိုင်ငံတော်မှ အကောက်ခွန်နှင့် ကုန်းလမ်းပို့ဆောင်ရေးညွှန်ကြားမှုဦးစီးဌာန၏ မှတ်ပုံတင်ခများ ကင်းလွတ်ခွင့်ဖြင့် သက်သာအောင် ဖြေလျှော့ဆောင်ရွက်ပေးထားပြီးဖြစ်ရာ  တရားမဝင်လိုင်စင်မဲ့မော်တော်ယာဉ်များကို လူမှုကူညီရေးအသင်း အဖွဲ့များအတွက် တရားဝင်လိုင်စင်ရရှိအောင် ဆောင်ရွက်ပေးမည်ဆိုပါက တည်ဆဲဥပဒေ၊ နည်းဥပဒေ များကို ဖောက်ဖျက်ကျော် လွန်ဆောင်ရွက်ရာရောက်မည်ဖြစ်ခြင်း၊ နောင်တွင်လည်း အလားတူ ထပ်မံ၍ ဖောက်ဖျက်ရန်အလေ့အထ သဖွယ်ကျင့်သုံးလာကြမည်ဖြစ်ခြင်း၊ တရားမဝင်တင်သွင်းမှုကို အားပေးရာ ရောက်စေမည်ဖြစ်ခြင်း၊ အိမ်နီးချင်းနိုင်ငံများမှ ခိုးသွင်း လာသောယာဉ်များဖြစ်ပါကလည်း ကန့်ကွက် တားမြစ်ခြင်း များကြောင့် အိမ်နီးချင်းနိုင်ငံများနှင့် မလိုလားအပ်သောကိစ္စများ ရှုပ်ထွေးလာနိုင်ခြင်း စသည့်မလိုလားအပ်သော အခြေအနေများနှင့် ရင်ဆိုင်ရမည်ဖြစ်ကြောင်း ဒုတိယဝန်ကြီးက လွှတ်တော်တွင် ရှင်းလင်းပြောကြားခဲ့သည်။

အသင်းအဖွဲ့များအနေဖြင့် ပြည်သူများ၏ အမှန်လက်တွေ့ဘဝလိုအပ်ချက်များကြောင့် မှတ်ပုံတင်မဲ့ ယာဉ်များကို လူမှုကူညီရေးကိစ္စရပ်များတွင် အသုံးပြုနေရခြင်းဖြစ်သည့်အတွက် ၎င်းမှတ်ပုံတင်မဲ့ ယာဉ်များကို တရားဝင်ဖြစ်စေရေး၊ ဥပဒေနှင့်အညီဖြစ်စေရေးတို့အတွက် နိုင်ငံတော်မှ အသိအမှတ်ပြု မှတ်ပုံတင်ပေးစေ လိုသောဆန္ဒရှိကြကြောင်းကိုလည်း လေ့လာသိရှိရပြီး လူမှုကူညီရေးယာဉ်များ မလုံမလောက်ဖြစ်ကာ မှတ်ပုံတင်မဲ့ယာဉ်များကို အလျဉ်းသင့် သလို သုံးစွဲဆောင်ရွက်နေကြခြင်းမှာလည်း နိုင်ငံ၏စနစ်တကျရှိမှုနှင့် တရားဥပဒေစိုးမိုးမှုကို ထိခိုက်စေလျက် ရှိသည်ဟု သုံးသပ်သိရှိရပါသည်ဟု ဒုတိယဝန်ကြီးကဆိုသည်။

နိုင်ငံတော်အနေဖြင့် ပြည်သူများ သက်သက်သာသာဖြင့် ကားစီးနိုင်စေရန် ဖြေလျှော့မှုများဖြင့် တရားဝင်တင်သွင်းခွင့်များကို ခွင့်ပြုဆောင်ရွက်ပေးလျက်ရှိရာ တစ်ဖက်မှ တရားမဝင်တင်သွင်း သုံးစွဲမှုများ ပပျောက်ရေးကိုလည်း အလေးထားဦးတည်ဆောင်ရွက်နေရခြင်းဖြစ်သဖြင့် တရားမဝင်ယာဉ် တင်သွင်းသုံးစွဲမှုများကို တိုက်ဖျက်ရာ၌  တာဝန်သိပြည်သူများအဖြစ် ဝိုင်းဝန်းပူးပေါင်း ဆောင်ရွက်ရန် လိုအပ်သည်ဟုဆိုသည်။
နာရေးကိစ္စရပ်များတွင် အသုံးပြုရန်အတွက် တရားမဝင် နိဗ္ဗာန်ယာဉ်ကို ၂၀၁၄ ခုနှစ်တွင် OSS ဖြင့် HSE အဖြစ် မှတ်ပုံတင် ဆောင်ရွက်ပေးခဲ့ပြီးဖြစ်သည်။

ဒေသအသီးသီးတွင် မတော်တဆမှုများအပါအဝင် ဒေသခံများ၏ကျန်းမာရေးအရေးပေါ်လိုအပ်ချက်များအတွက် အရေးပေါ်လူနာတင်ယာဉ်များကို လူမှုကူညီရေးအသင်းများထံမှ အများဆုံး အကူအညီရယူနေကြရခြင်း ဖြစ်ပြီး ဒေသတွင်း လူမှုကူညီရေးအသင်းများအနေဖြင့် ဈေးနှုန်းသက်သာသည့် လိုင်စင်မဲ့မော်တော်ယာဉ်များကို အသုံးပြုနေကြရခြင်းဖြစ်သည်။

Tachileik News Agency