ရှမ်းပြည်နယ်စားသုံးသူတိုင်ကြားမှုလက်ခံဆောင်ရွက်ရေးလုပ်ငန်းကော်မတီနှင့် Telenor မြန်မာကုမ္ပဏီတို့ ၂၀၁၉ ခုနှစ်၊ မတ်လ (၅) ရက်နေ့က ရှမ်းပြည်နယ်၊ စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ၌ တွေ့ဆုံဆွေးနွေးခဲ့ကြခြင်းဖြစ်သည်။
"ဝန်ဆောင်မှုဆိုရင် Telenor နဲ့ပတ်သက်တဲ့ဥစ္စာတွေပေါ့။ ညှိနှိုင်းဖြေရှင်းချက်တွေကို ဆောင်ရွက်မပေးဘူးဆိုရင် လုပ်မပေးဘူးဆိုရင် တည်ဆဲဥပဒေတွေ၊ သက်ဆိုင်တဲ့ဥပဒေတွေနဲ့ အရေးယူရမှာပေါ့။ ဆက်သွယ်ရေးမှာလည်း သူ့ဥပဒေတွေရှိမှာပဲလေ။ တစ်ချို့ကျတော့ ငွေကြေးဖြတ်တောက်တယ်ဆိုပြီးတော့ လိမ်လည်တာတွေက ဆက်သွယ်ရေးဥပဒေပုဒ်မ ၆၆(၈)၊ တရားဝင်အော်ပရေတာတစ်ခုက Package တွေကို အရွယ်အစားတွေ၊ ဈေးနှုန်းတွေကိုလည်း သူတို့တောင်းချင်တိုင်းတောင်းလို့မရဘူး။ သူတို့ဒါတွေကို ဆက်သွယ်ရေးဌာနမှာ တင်ပြတောင်းခံရမယ်"ဟု ပြည်နယ်စားသုံးသူရေးရာဦးစီးဌာန၊ ပြည်နယ်ထုတ်ကုန်လုံခြုံစိတ်ချမှုဆိုင်ရာ လုပ်ငန်းကော်မတီမှ လက်ထောက်ညွှန်ကြားရေးမှူး ဦးမင်းအောင်က တာချီလိတ်သတင်းအေဂျင်စီသို့ မတ်လ (၁၃) ရက်နေ့တွင်ပြောသည်။
Telenor Broadband အင်တာနက်ဝန်ဆောင်မှုများနှင့် ပတ်သက်၍ တိုင်ကြားလွှာများ (၁၀)ရက်အတွင်း (၃၃၈)မှုအထိ ရှိခဲ့သဖြင့် Consumer Information and Complainet Center(CICC) နေပြည်တော်တွင် Telenor Myanmar မှ တာဝန်ရှိသူများ၊ ဆက်သွယ်ရေးညွှန်ကြားမှု ဦးစီးဌာနနှင့် စားသုံးသူရေးရာ ဦးစီးဌာနမှ တာဝန်ရှိသူများ ဇန်နဝါရီ (၂၁)ရက်နေ့က တွေ့ဆုံညှိနှိုင်းခဲ့ပြီး ဖြေရှင်းပေးမည့် အချက် (၃)ချက်ကို ထုတ်ပြန်ပေးခဲ့ပြီး ၂၀၁၈ ခုနှစ်၊ ဒီဇင်ဘာ (၁) ရက်မတိုင်မီ Unlimited Plan ဝန်ဆောင်မှုဝယ်ယူထားသူများနှင့် ၂၀၁၈ ခုနှစ်၊ ဒီဇင်ဘာ (၁) ရက်မှစ၍ 10 GB Par Day ဝန်ဆောင်မှု ဝယ်ယူထားသူများအနေဖြင့် သက်တမ်း ဆက်တိုးပါက မျှတသုံးစွဲမည့်မှုဝါဒ (111 GB Par Month) ဖြင့်သာ ဆက်လက်သုံးစွဲနိုင်မည်ဖြစ်ကြောင်း နှင့် မျှတသုံးစွဲသည့် မှုဝါဒဝန်ဆောင်မှုကို ဆက်လက်အသုံးမပြုလိုသူများ အနေဖြင့် ၂၀၁၉ ခုနှစ် ဧပြီလ ၁၅ ရက်မတိုင်မီ ချို့ယွင်းပျက်စီးမှု မရှိသော စက်များကို ပြန်အပ်၍ ကျပ်(၁၅၀၀၀)ကို တယ်လီနောမှ ပြန်လည်ထုတ်ပေးရမည်ဖြစ်ကြောင်းပါရှိခဲ့သည်။
"အဓိကက အရင်သုံးထားတဲ့လူတွေပေါ့။ ပထမဆုံး (၃) လအတွင်းမှာရောင်းချထားတဲ့ Unlimited သမညးတွေကို အရင်အတိုင်းပဲဆက်လက်သုံးစွဲခွင့် ပြုဖို့၊ သုံးစွဲခွင့်မပြုပါက စက်ဖိုးတွင်မက မှုလအတိုင်း (၇၅၀၀၀) ပြန်လည်ပေးလျော်ရမယ်၊ တောင်းဆိုချက် နှစ်ချက်ကို လိုက်နာဆောင်ရွက်ခြင်းမပြုပါက ကျွန်တော်တို့ ဥပဒေနဲ့အညီဆက်လက်ဆောင်ရွက်သွားမယ်"ဟု မတ်လ (၅) ရက်နေ့ တွေ့ဆုံပွဲတွင် တောင်းဆိုခဲ့ကြောင်း ဦးမင်းအောင်ကဆိုသည်။
Telenor Broadband ကို မိသားစုအဝသုံး Unlimited အဖြစ် ၇၅,၀၀၀ ကျပ်ဖြင့် စတင်ရောင်းချခဲ့ကာ မကြာမီ ကာလတွင် မျှတစွာ သုံးစွဲခြင်းအစီအစဉ်ဖြင့် တစ်ရက်လျှင် 10 GB သို့လျော့ချခဲ့ပြီး စက်တန်ဖိုးကို ၇၅,၀၀၀ ကျပ်မှ ၉၀,၀၀၀ ကျပ်သို့ တိုးမြှင့်ခဲ့ခြင်းဖြစ်သည်။
အဆိုပါအစီအစဉ်မှာ လက်ရှိတွင် သုံးစွဲသူ User Drive (၅)ခု ထက်ပိုမို ချိတ်ဆက်ခွင့်မပြုဘဲ တစ်ရက်လျှင် (3.7) GB နှုန်းဖြင့် တစ်လလျှင် (111) GB သာ သုံးစွဲခွင့်ပြုတော့သဖြင့် တိုင်ကြား လာကြခြင်း ဖြစ်ကြောင်း သိရသည်။
သတင်း #ဟန်စိုးထိုက်
