ရှမ်းပြည်နယ် (မြောက်ပိုင်း) ကျောက်မဲ၊ သီပေါ၊ နောင်ချိုမြို့များရှိ ကမ္ဘောဇဘဏ်ခွဲများကို ရက်အကန့်အသတ်မရှိ ယာယီပိတ်ထားမည်ဟု ကြေညာထားရာမှ ၂၀၂၀ ခုနှစ်၊ ဇွန်လ (၂၉) ရက်နေ့တွင် ပြန်လည်ဖွင့်လှစ်တော့မည်ဖြစ်ကြောင်း သိရသည်။
“ယာယီပိတ်ထားတဲ့ ဘဏ်ခွဲ (၃) ခုလုံးကို လာမယ့် တနင်္လာနေ့ ( ဇွန် ၂၉ ရက်နေ့) မှာ ပြန်ဖွင့်တော့မှာ ဖြစ်ပါတယ်။ ငွေလွှဲငွေထုတ်နဲ့ ဘဏ်လုပ်ငန်းဆိုင်ရာအားလုံးကို အဲဒီနေ့ကစပြီး ပုံမှန်အတိုင်း ပြန်ပြီး ဝန်ဆောင်မှုပေးသွားမှာပါ”
ဟု ကမ္ဘောဇဘဏ်ဝန်ထမ်းတစ်ဦးဖြစ်သည့် ဒေါ်အေးအေးမွန် က တာချီလိတ်သတင်းအေဂျင်စီသို့ ဇွန်လ (၂၄) ရက်နေ့တွင် ပြောသည်။
အဆိုပါ ဘဏ်ခွဲ (၃)ခုကို Covid-19 ကူးစက်ရောဂါ ကာကွယ်ရေးအတွက် ဇွန်လ ၂၂ ရက်ကစတင်၍ ရက်အကန့်အသတ်မရှိ ယာယီပိတ်ထားမည်ဟု ကြေညာထားခဲ့ခြင်းဖြစ်သည်။
ကျောက်မဲတွင် မြန်မာ့စီးပွားရေးဘဏ်၊ ရိုးမဘဏ်၊ ကမ္ဘောဇဘဏ်၊ ဧရာဝတီဘဏ်နှင့် ကမ္ဘာ့ရတနာ ဘဏ်တို့လဲရှိပြီး ကမ္ဘောဇဘဏ်တစ်ခုတည်းသာ ယာယီပိတ်ထားရန် ကြေညာခဲ့ခြင်းဖြစ်ကာ ဇွန်လ ၂၉ ရက်တွင် ပုံမှန်အတိုင်း ပြန်ဖွင့်သွားမည် ဖြစ်သည်ဟု သိရသည်။
Tachileik News Agency
သတင်း၊ဓါတ်ပုံ - နေဖြိုးမြင့်
