"မြန်မာနိုင်ငံ ရင်းနှီးမြုပ်နှံမှုကော်မရှင်ကလည်း ခွင့်ပြုထားတယ်။ ရန်ကုန်၊ မန္တလေးလို နေရာမျိုးတောင်မှ သားသတ်ရုံတွေက အဆင့်မမီသေးဘူး။ နည်းပညာပိုင်းအရရော ကွေကြေးအရပါ ရင်းနှီးမြုပ်နှံမယ်ဆိုရင် ကူညီပေးမှာပါ။ အိမ်နီးချင်း ထိုင်းတို့၊ လာအိုတို့မှာဆိုရင် တစ်နေ့ အကောင် (၁၅၀၀) လောက်ကို အသားထုတ်နိုင်တဲ့ သားသတ်ရုံတွေ ရှိနေတယ်။ ကျွန်တော်တို့ဘက်မှာ မရှိသေးဘူး"ဟု မွေးမြူရေးနှင့် ကုသရေးဦးစီးဌာန ညွှန်ကြားရေးမှူးချုပ် ဒေါက်တာရဲထွန်းဝင်းက တာချီလိတ်သတင်းအေဂျင်စီသို့ ပြောသည်။

လက်ရှိပြည်တွင်းမှ သားသတ်လုပ်ငန်းအများစုမှာ မိရိုးဖလာပုံစံများဖြင့်သာ အသားထုတ်လုပ်နေကြခြင်းဖြစ်ပြီး စားသုံးသူအတွက် ဘေးကင်းသည့်အသားများ စနစ်တကျထုတ်လုပ်သည့် သားသတ်ရုံလုပ်ငန်းများအဖြစ် ပြောင်းလဲနိုင်ခြင်းမရှိသေးဘဲ ရှိနေသဖြင့် ယင်းကဲ့သို့ ခွင့်ပြုသွားရန် ဆုံးဖြတ်ထားခြင်းဖြစ်သည်ဟု သိရသည်။

နယ်စပ်မြို့ဖြစ်သည့် တာချီလိတ်တွင်လည်း စီးပွားဖြစ်ဝက်မွေးမြူရေးခြံအချို့ရှိသော်လည်း အဆင့်မြင့် သားသတ်ရုံလုပ်ငန်းမရှိသေးသော်လည်း လုပ်ကိုင်ရန် စိတ်ဝင်စားသည့် လုပ်ငန်းရှင်များရှိနေပြီဖြစ်ကြောင်း သိရသည်။

"ကျွန်တော်တို့ဌာနမှာ သားသတ်ရုံလုပ်ချင်လို့ တင်ပြထားတာတွေ ရှိပါတယ်။ စစ်ဆေးချက်တွေနဲ့အညီ သားသတ်လုပ်ငန်းတွေ ဆောင်ရွက်ဖို့ပါ။ မွေးမြူရေးဌာနရဲ့ စစ်ဆေးချက်တွေနဲ့အတူ စနစ်ကျတဲ့ သားသတ်ရုံ တည်ထောင်ချင်တယ်ဆိုပြီး တင်ပြလာတာပါ။ ကျွန်တော်တို့နယ်စပ်အတွက်လည်း အကျိုးရှိပါတယ်။ လုပ်ငန်းရှင်က လုပ်ချင်တယ်ဆိုပြီး ကမ်းလှမ်းလာပါတယ်"ဟု တာချီလိတ်မြို့နယ်စည်ပင်သာယာရေးဌာန အမှုဆောင်အရာရှိ ဦးစိုင်းခွန်ဇော်ဦးက ပြောသည်။

တာချီလိတ်မြို့နယ်အတွင်း ဝက်မွေးမြူထုတ်လုပ်ရောင်းချခွင့်လိုင်စင်အား  ၂၀၁၃ ခုနှစ်မှစ၍ ဘဏ္ဍာရေးနှစ် အလိုက် ထုတ်ပေးနေခဲ့ရာ မွေးမြူထုတ်လုပ်ခြင်းလုပ်ငန်း ဆောင်ရွက်နေသည့် လုပ်ငန်းများလည်း ရှိနေခြင်းဖြစ်သည်။

မြန်မာနိုင်ငံအနေဖြင့် (၄)နှစ်တာကာလအတွင်း တရုတ်နိုင်ငံသို့ ဝက်သားတင်ပို့နိုင်ရေး ရည်မှန်းချက်ထား ဆောင်ရွက်နေသဖြင့် အဆင့်မြင့်သားသတ်ရုံလုပ်ငန်းများကို ခွင့်ပြုပေးသွားရန်ရှိနေသည်ဟု သိရသည်။

ဝက်အချင်းချင်း ကူးစက်စေသည့် အာဖရိကဝက်အပြင်းဖျားရောဂါမှာ တရုတ်နိုင်ငံတွင် ကျယ်ကျယ်ပြန့်ပြန့် ဖြစ်ပွားခဲ့ပြီးနောက် အာရှဒေသနိုင်ငံများတွင် ပျံ့နှံ့ခဲ့ကာ မြန်မာနိုင်ငံတွင် ရှမ်းပြည်နယ်အရှေ့ပိုင်း အထူးဒေသ (၄)အတွင်း တွေ့ရှိခဲ့ရသော်လည်း ဒေသတွင်း မပျံ့နှံ့စေရန် ကာကွယ်ထိန်းချုပ်မှုများ ဆောင်ရွက်နိုင်ခဲ့ခြင်း ဖြစ်သည်။

သတင်း #ဟန်စိုးထိုက်
[ဓါတ်ပုံ - တာချီလိတ်တွင် မွေးမြူထုတ်လုပ်လိုင်စင်ဖြင့် လုပ်ကိုင်နေသည့် ဝက်မွေးမြူရေးခြံ]