~~~~~~~~⊰❂ Unicode Version ❂⊱~~~~~~~~

ရှမ်းပြည်နယ်(အရှေ့ပိုင်း)၊ တာချီလိတ်မြို့ မီးလင်းရေးကော်မတီမှ တာချီလိတ်ခရိုင်ဆေးရုံကြီးသို့ ခြင်ဆေးဖျန်းစက် (၅) လုံး၊ ကြက်ခြေနီအသင်းသို့ ခြင်ဆေးဖျန်းစက် (၂) လုံး၊ စုစုပေါင်း (၇) လုံးလှူဒါန်းမှုနှင့် ကျောင်းအတွင်း ခြင်ဆေးဖြန်းခြင်းလုပ်ငန်းများကို ၂၀၁၉ ခုနှစ် ဇူလိုင်လ (၁၃) ရက်နေ့ နံနက်ပိုင်းက အခြေခံပညာအထက်တန်းကျောင်း(ဆန်ဆိုင်း)တွင် ပြုလုပ်ခဲ့ကြောင်း သိရသည်။

"မနှစ်က ကျွန်တော်တို့ သွေးလွန်တုပ်ကွေးစာရင်းကောက်ကြည့်တဲ့အခါမှာ တာချီလိတ်ဆေးရုံကြီးကိုရောက်ရှိလာတဲ့ လူနာအရေ အတွက်က (၅၀၀) ကျော်ထိရှိခဲ့တယ်။ ဟိုဘက်ကမ်းသွားတဲ့ လူနာတွေရောရှိခဲ့တယ်။ မနှစ်က ဒီလိုအချိန်မှာပဲ အပတ်စဉ် စနေနေ့တိုင်း ရပ်ကွက်တွေအားလုံးမှာ ဖုံး၊ သွန်၊ လဲ၊ စစ်လုပ်ငန်းကို ပြည်သူလူထု ပါဝင်တဲ့ လုပ်ငန်းအဖြစ် ကျွန်တော်တို့ ဆောင်ရွက်ခဲ့ပါတယ်။ ခြင်ဆေးဖျန်းစက်တွေကို တစ်မြို့လုံး စုလိုက်တော့ အားလုံးပေါင်း (၇) လုံးလောက်ပဲ ရှိတယ်။ အကုန်လုံးကို ဆေးရုံကြီးမှာစုပြီးတော့ ဖြစ်ပွားတဲ့ နေရာတွေကို လိုက်ဖျန်းရတာပေါ့။ ဒီလိုဖြစ်တော့ ကျွန်တော်စဉ်းစားမိတာက မြို့မီးလင်းရေးကော်မတီကနေ ခရိုင်ဆေးရုံကြီးကို လှူဒါန်းလိုက်မယ်ဆိုပြီး စီစဉ်လိုက်တာပါ"ဟု တာချီလိတ်မြို့ မီးလင်းရေးကော်မတီဥက္ကဌ ခရိုင်အုပ်ချုပ်ရေးမှူး ဦးမြင့်နိုင်က တာချီလိတ်သတင်းအေဂျင်စီသို့ ပြောသည်။

ဂျာမဏီနိုင်ငံမှ ထုတ်လုပ်သည့် ခြင်ဆေးဖျန်းစက် (၇) လုံး လှူဒါန်းခဲ့ခြင်းဖြစ်ပြီး (၁) လုံးလျှင် ထိုင်းဘတ်ငွေ (၅၅,ဝဝဝ) ကျော် ကျသင့်ကြောင်း၊ ကျောင်းဝန်းအတွင်းရှိ ရေမြောင်းမှာ ရေစီးဆင်းမှုမရှိပဲ ပိုးလောက်လန်းများ ပေါက်ဖွားနေသည့် အတွက် ရေစီးရေလာကောင်းမွန်အောင် မြောင်းဆယ်ယူခြင်းနှင့် ခြင်ဆေးဖျန်းမှုများဆောင်ရွက်ခဲ့ကြောင်း သိရသည်။

ခြင်ဆေးဖျန်းစက် လှူဒါန်း ပွဲ နှင့် ခြင်ဆေးဖျန်းရာသို့ အမျိုးသားလွှတ်တော်ကိုယ်စားလှယ် ဦးစိုင်းလုံစံခတ်၊ မြို့မီးလင်းရေးကော်မတီ ဥက္ကဌ၊ တာချီလိတ်ခရိုင်အုပ်ချုပ်ရေးမှူး ဦးမြင့်နှင့် နှင့် မီးလင်းရေးကော်မတီဝင်များ၊ တာချီလိတ်မြို့နယ်အုပ်ချုပ်ရေးမှူး ဦးချမ်းမြေ့စောနှင့်၊ ကြက်ခြေနီ၊ မီးသတ် တပ်ဖွဲ့ဝင်များ၊ လူမှုရေးအသင်းအဖွဲ့များ နှင့် ဖိတ်ကြားထားသူများ တက်ရောက်လာခဲ့ကြကြောင်း သိရသည်။

Tachileik News Agency
သတင်း - ဟန်စိုးထိုက်
ဓာတ်ပုံ - ကျော်ဇင်ဟိန်း