မြန်မာငလျင်ဘေး ကယ်ဆယ်ရေးအတွက် ဖိလစ်ပိုင် စစ်တပ်မှ တပ်ဖွဲ့ဝင်များပါဝင်သည့် ကယ်ဆယ်ရေးအဖွဲ့သည် ၂၀၂၅ ခုနှစ် ဧပြီလ (၁)ရက်နေ့တွင် မြန်မာနိုင်ငံသို့ စတင်ထွက်ခွာလာပြီဖြစ်ကြောင်း သိရသည်။

မြန်မာ့ငလျင်ဘေး ကူညီရေးအတွက် ဖိလစ်ပိုင်နိုင်ငံ၏ စစ်တပ်၊ ဖိလစ်ပိုင်လေတပ်၊ မီးဘေးကာကွယ်ရေးဗျူရို၊ မြို့တော်မနီလာ ဖွံ့ဖြိုးတိုးတက်ရေးအာဏာပိုင်အဖွဲ့နှင့် ပတ်ဝန်းကျင်နှင့် သဘာဝအရင်းအမြစ်များ/ပုဂ္ဂလိကကဏ္ဍ (EDC နှင့် APEX သတ္တုတွင်းဌာန) ၊ ကျန်းမာရေးဌာနမှ ဖိလစ်ပိုင် ဆေးဘက်ဆိုင်ရာ အထောက်အကူအဖွဲ့၊ အရပ်ဘက်ကာကွယ်ရေးရုံးမှ ညှိနှိုင်းရေးမှူးများပါဝင်သည့် (၉၁)ဦးပါအဖွဲ့ကို ကယ်ဆယ်ရေးနှင့် ဆေးဘက်ဆိုင်ရာပစ္စည်းများဖြင့် ပို့ဆောင်မည်ဖြစ်ကြောင်း သိရသည်။

ယနေ့နံနက်တွင် အဆိုပါ (၉၁)ဦးအနက်မှ (၅၈)ဦးပါအဖွဲ့ကို ဖိလစ်ပိုင်လေတပ်မှ C 130 လေယာဉ်နှစ်စီးဖြင့် ပို့ဆောင်ထားပြီး ကျန် (၃၃)ဦးကို ဧပြီလ (၂)ရက်နေ့တွင် ထပ်မံစေလွှတ်မည်ဟု သိရသည်။

အဆိုပါ ကယ်ဆယ်ရေးအဖွဲ့သည် မြန်မာနိုင်ငံတွင် ရက်သတ္တပတ် နှစ်ပတ်ကြာ ကယ်ဆယ်ရေးလုပ်ငန်းများ ဆောင်ရွက်ကြမည်ဖြစ်ကြောင်း သိရသည်။

#TachileikNewsAgency

Photo: Philippine Air Force