ထိုင်းနိုင်ငံ ဘန်ကောက်မြို့အတွင် ငလျင်ဒဏ်ကြောင့် ပြိုကျသွားသည့် အဆောက်အဦးအတွင်း ပိတ်မိနေဆဲဖြစ်သော လုပ်သားများအား ဆက်လက်ရှာဖွေပေးရန် ထိုင်းဝန်ကြီးချုပ်ကို မြန်မာအလုပ်သမား ကိုယ်စားလှယ်တစ်ဦးက ဒူးထောက်တောင်းဆိုသည်ဟု သိရသည်။
ပြိုကျသွားသည့် ဆောက်လုပ်ဆဲ ငွေစာရင်းစစ်ချုပ်ရုံးသို့ ထိုင်းဝန်ကြီးချုပ် ပေတုန်တန် ရှနာဝပ်က ယနေ့ ၂၀၂၅ခုနှစ် မတ်လ(၃၁)ရက်နေ့တွင် ရောက်လာစဉ် မြန်မာလုပ်သားကိုယ်စားလှယ်တစ်ဦးက တောင်းဆိုခြင်းဖြစ်သည်ဟု သိရ သည်။
“ကျွန်တော်တို့က တောင်းဆိုတာပေါ့ဗျာ။ ကျွန်တော်တို့ရဲ့ မြန်မာပြည်သားတွေအတွက် အကောင်းဆုံးဖြစ်အောင် လုပ်ဆောင်ပေးဖို့နဲ့ တန်းတူ အခွင့်အရေးရဖို့အတွက်ပါ။ ဘာလို့လဲဆို ဒီအထဲမှာ ထိုင်းနိုင်ငံသားလည်းပါတယ်။ လာအိုနိုင်ငံသားလည်း ပါတယ်။ မြန်မာလည်းပါတယ်ဆိုတော့ တန်းတူအခွင့်အရေးရဖို့ တောင်းဆိုတာပါ။”ဟု WAG အလုပ်သမားလုပ်ဆောင်ရေးအဖွဲ့မှ တာဝန်ရှိသူတစ်ဦးက Tachileik News Agency ကို ပြောသည်။
အဆိုပါ တောင်းဆိုမှုကြောင့် ထိုင်းဝန်ကြီးချုပ် ပေတုန်တန် ရှနာဝပ်က အကောင်းဆုံး လုပ်ဆောင်ပေးသွားမည်ဟု ပြန်လည်ပြောဆိုသွားသည်ဟု ဆိုသည်။
“ဘယ်နေ့အထိ ဆက်ရှာမယ်ဆိုတာ ကျွန်တော်တို့လည်း မသိရဘူး။ အပြင်ကိုရောက်လာမှ ကျွန်တော်တို့အဖွဲ့က လိုက်လုပ်ပေးလို့ရတာ။ ဒါပေမယ့် အတွင်းထဲမှာ ဘယ်နှစ်ရက်ကြာမယ် ဘယ်လိုလုပ်မယ်ဆိုတာကတော့ သူတို့ အပိုင်းပါ။ အဲဒါတွေ လုပ်ဆောင်ပေးဖို့ ဝန်ကြီးချုပ်ကိုတောင်းဆိုတာပါ။ သူကလည်း ပြန်နှိုးဆော်ပေးသွားတယ်။” ဟု ၎င်းက ပြောသည်။
ငလျင်လှုပ်ခတ်မှုကြောင့် အထပ်(၃၀)ရှိ ဆောက်လုပ်ဆဲ တိုက်ပြိုကျသွားခြင်းဖြစ်ပြီး ယမန်နေ့အထိ သေဆုံးသူ မြန်မာလုပ်သား(၁၁)ဦးရှိပြီး အသက်ရှင်သူ(၈)ဦးရှိကာ မည်မျှကျန်နေသေးသည်ကိုမူ အတိတကျမသိရသေးဟု ဆိုသည်။
“ပါသွားတဲ့အထဲမှာ အထောက်အထား မပြည့်စုံသူတွေလည်းပါတယ်။ အတိအကျတော့ ပြောလို့မရဘူး။ တချို့ ဟာတွေကျ ကိုယ့်မြန်မာတွေအတွက်ဆိုတော့ ခံစားချက်ပြင်းတဲ့အခါကျတော့ ကျွန်တော်တို့ တောင်းပန်တာ မဟုတ်ပါဘူး။ တောင်းဆိုတာပါ။ အကောင်းဆုံးလုပ်ဆောင်ပေးဖို့ ကျွန်တော်တို့တောင်းဆိုတာပါ။ ကျွန်တော်တို့ နိုင်ငံသားတွေကို လာရောက်ဝန်းရံ အားပေးနှစ်သိမ့်ပေးကြပါ။”ဟု ၎င်းကပြောသည်။
ငလျင်ဒဏ်ကြောင့် ပြိုကျသည့် စာရင်းစစ်ချုပ်ရုံးအဆောက်အဦးတွင် ကယ်ဆယ်ရေးကို အဆက်မပြတ် လုပ်ဆောင်နေသည်ကိုတွေ့ရပြီး ကယ်ဆယ်ရေးလုပ်ငန်းစဉ်မှာ နာရီပေါင်း (၇၂)နာရီကျော် ကြာမြင့်ပြီဖြစ်၍ အသက်ရှင်သူ မရှိနိုင်တော့လည်း မျှော်လင့်နေဆဲဟု ဆိုသည်။
“စဖြစ်တုန်းကတော့ အော်ခေါ်သံတွေကြားတယ်။ အခုနောက်ပိုင်းတော့ အဲဒီလိုတွေ မကြားတော့ဘူး။”ဟု ၎င်းက ဆက်ပြောသည်။
၂၀၂၅ခုနှစ် မတ်လ(၂၈)ရက်နေ့ မန္တလေးမြေ ငလျင်စခန်းမှ အရှေ့မြောက်ဘက် (၂၁)ကီလိုမီတာခန့် ကွာဝေးသော မြန်မာနိုင်ငံပြည်တွင်း(မန္တလေးမြို့၏ အရှေ့ မြောက်ဘက် (၂၀) ကီလိုမီတာခန့်အကွာ)တွင် အင်အား ရစ်(ခ်)တာစ ကေး (၇.၇)အဆင့်ရှိသည့် အင်အားအလွန်ပြင်းထန် ငလျင်လှုပ်ခတ်ချိန်တွင် ထိုင်းနိုင်ငံတွင်လည်း ငလျင်လှုပ်ခတ် သွားခြင်းဖြစ်သည်။
မြန်မာနိုင်ငံတွင် အာဏာသိမ်းခံရပြီးကတည်းက ချွတ်ခြုံကျသွားသည့် စီးပွားရေးနှင့် လုံခြုံရေးအခြေအနေကြောင့် မြန်မာနိုင်ငံသားများသည် ရရာအလုပ် သွားရောက်လုပ်ကိုင်နေရသည့် နိုင်ငံများတွင် ထိုင်းနိုင်ငံသည် လုပ်သား အများအပြားသွား ရောက်လုပ်ကိုင်နေရသည့် နိုင်ငံတစ်ခုဖြစ်သည်။
