ကော်ရိုနာဗိုင်းရပ်စ်သံသယရှိ ကိုရီးယားနိုင်ငံသားတစ်ဦးကို တောင်ကြီး စဝ်စံထွန်းဆေးရုံတွင် စောင့်ကြည့်ကုသနေ
ရှမ်းပြည်နယ်(တောင်ပိုင်း) ညောင်ရွှေတွင် အလည်အပတ်ရောက်နေသည့် ကိုရီးယားနိုင်ငံသားတစ်ဦးကို ကော်ရိုနာဗိုင်းရပ်စ် (ဝူဟန်အဆုတ်ရောင်ရောဂါ) သံသယလက္ခဏာစောင့်ကြည့်ရန် တောင်ကြီး စဝ်စံထွန်းဆေးရုံသို့ ၂၀၂၀ ခုနှစ်၊ ဖေဖေါ်ဝါရီလ (၂)ရက်နေ့တွင် ပို့ဆောင်ထားကြောင်း သိရသည်။
“သူပုဂံမှာ လည်နေတဲ့အချိန်မှာ တရုတ်ခရီးသွားတွေနဲ့ နီးနီးကပ်ကပ်ရှိခဲ့တယ်။ အခုက နှာစေးတယ်၊ ချောင်းဆိုးတယ်ဆိုတဲ့ လက္ခဏာနဲ့ဆိုတော့ စောင့်ကြည့်ဖို့ စဝ်စံထွန်းဆေးရုံ သီးသန့်လူနာခန်းမှာထားပြီး လိုအပ်တဲ့ စစ်ဆေးမှုတွေ လုပ်ပေးနေပါတယ်။ သူက တရုတ်နိုင်ငံသားတွေနဲ့ ထိတွေ့မှုရှိခဲ့တယ်။ အခုနှာစေး ချောင်းဆိုးဖြစ်နေတယ်ဆိုတော့ အဲဒါလေးနဲ့ စောင့်ကြည့်ဖို့ တင်ထားတာပါ”
ဟု ပြည်နယ်အဆင့် အဆုတ်ရောင်ရောဂါ 2019 Novel Coronavirus (2019 – n Cov) စောင့်ကြည့် စစ်ဆေးကုသရေး ကြီးကြပ်မှုကော်မတီ ဥက္ကဌဖြစ်သူ ရှမ်းပြည်နယ် အစိုးရအဖွဲ့ဝင် လူမှုရေးဝန်ကြီး ဒေါက်တာမျိုးထွန်းက တာချီလိတ်သတင်းအေဂျင်စီသို့ ပြောသည်။
အဆိုပါ ကိုရီးယားနိုင်ငံသားသည် ကိုရီးယား - လာအို - ချင်းမိုင် - မြဝတီ - ရန်ကုန် - ပုဂံ - မန္တလေး - ညောင်ရွှေ - ကလော ခရီးစဉ်လာရောက်ခြင်းဖြစ်ပြီး ညောင်ရွှေမြို့သို့ ရောက်ရှိစဉ် နှာစေးချောင်းဆိုးဖြစ်နေ၍ တောင်ကြီး စဝ်စံထွန်းဆေးရုံသို့ ပို့ဆောင်ထားခြင်းဖြစ်ကြောင်း သိရသည်။
ကော်ရိုနာဗိုင်းရပ်စ်ကြောင့် အဆုတ်ရောင်ခြင်း (ဝူဟန်အဆုတ်ရောင်ရောဂါ) သံသယလက္ခဏာများဖြစ်သည့် ကိုယ်အပူချိန် (၃၈) ဒီဂရီစင်တီဂရိတ်နှင့် အထက်ရှိခြင်း၊ ချောင်းဆိုးခြင်း၊ အသက်ရှုရခက်ခဲခြင်းနှင့် အားအင်ကုန်ခမ်းခြင်းများဖြစ်ပွားပါက နီးစပ်ရာကျန်းမာရေးဌာနများတွင် အမြန်ဆုံးသတင်းပို့ ကုသမှုခံယူကြရန် ကျန်းမာရေးဦးစီးဌာနက သတိပေးနှိုးဆော်ထားသည်။
Tachileik News Agency
သတင်း -ချယ်ရီထိုက်
