အင်အားပြင်း ငလျင်ဒဏ်ကြောင့် သေဆုံးသူ လူဦးရေ တိုးလာနေချိန် ရခိုင်ပြည်နယ်အတွင်း ကျောက်ဖြူမြို့နယ် ကုလဘာရွာကို စစ်ကောင်စီတပ်က ဒရုန်းဖြင့် ဗုံးကြဲတိုက်ခိုက်သည်ဟု ဒေသခံများထံမှ သိရသည်။
၂၀၂၅ခုနှစ် မတ်လ (၃၀)ရက်နေ့၏ ည(၇)နာရီခွဲ ဝန်းကျင်တွင် စစ်ကောင်စီတပ်သည် ဒရုန်းတစ်စီး အသုံးပြုပြီး ကုလဘာရွာကို ဗုံးသီး (၂)လုံးချကာ တိုက်ခိုက်သဖြင့် ဦးမောင်ဝင်း၏ နေအိမ်ဘေးယှဉ်းကပ်လျက်ရှိ TV ပြင်ဆိုင်ကို ကျရောက်ပေါက်ကွဲခဲ့သည်ဟု သိရသည်။
ဗုံးသီးကျရောက် ပေါက်ကွဲမှုကြောင့် ဆိုင်ခန်းတစ်ခုလုံး ပြိုကျပျက်စီးပြီး နေအိမ်ပြူတင်းပေါက်မှန်မှာလည်း ပျက်စီးသွားသည်ဟု သိရသည်။
မတ်လ(၂၈)ရက်နေ့ နေ့လယ်ပိုင်းက လှုပ်ခတ်ခဲ့သည့် အင်အားပြင်း ငလျင်ကြောင့် မန္တလေး၊ စစ်ကိုင်းနှင့် ရှမ်းပြည်နယ်တောင်ပိုင်းတို့တွင် အပျက်အစီးများပြီး လူအသေအပျောက်များနေသည်။
စစ်ကောင်စီ၏ ယမန်နေ့အထိ ထုတ်ပြန်ချက်အရ ငလျင်ကြောင့် သေဆုံးသူ(၁,၇၀၀)ဦး၊ ဒဏ်ရာရ(၃,၄၀၀)ဦးနှင့် ပျောက်ဆုံး(၃၀၀)ဦးတို့ ရှိသည်ဟု ထုတ်ပြန်ထားသော်လည်း မြေပြင်တွင် ယင်းထက်များနေနိုင်သည်ဟု သိရှိရသည်။
ငလျင်ကြောင့် ပြိုကျနေသည့် နေအိမ်များအတွင်း ပိတ်မိနေသူ အများအပြားရှိနေ၍ နိုင်ငံတကာမှ လာရောက် ကူညီပေးနေရချိန်တွင် စစ်ကောင်စီတပ်သည် အချို့သောနေရာများတွင် အကြောင်းမဲ့ ဗုံးကြဲတိုက်ခိုက်ခြင်းများ လုပ်ဆောင်နေသည်ဟု သိရသည်။
#TachileikNewsAgency
