အင်အားပြင်းငလျင်လှုပ်ခတ်မှုကြောင့် ထိခိုက်ပျက်စီးမှုများသည့် မြန်မာနိုင်ငံသို့ စင်္ကာပူနိုင်ငံမှ ကယ်ဆယ်ရေးအဖွဲ့ဝင်(၈၀)ဦး ယနေ့ ၂၀၂၅ခုနှစ် မတ်လ(၂၉)ရက်နေ့ နေ့လယ်ပိုင်းတွင် ထွက်ခွာလာပြီဟု စင်္ကာပူသတင်းများအရ သိရသည်။
သဘာဝဘေးအကူအညီနှင့် ကယ်ဆယ်ရေးအဖွဲ့ဝင်များသည် ဆေးဘက်ဆိုင်ရာဆရာဝန်များ၊ ဆေးမှူးများ၊ ရှာဖွေကယ်ဆယ်ရေး ခွေးများနှင့်အတူ ထွက်ခွာလာခြင်းဖြစ်သည်ဟု သိရသည်။
လက်ရှိတွင် တရုတ်၊ ရုရှားတို့မှ ကယ်ဆယ်ရေးအဖွဲ့များလည်း မြန်မာနိုင်ငံသို့ လာရောက်နေကြပြီး အိန္ဒိယနိုင်ငံမှ ထောက်ပံ့ရေးပစ္စည်းများကို ပို့ဆောင်ပေးထားသည်ဟု သိရသည်။
ယနေ့နေ့လယ်ပိုင်းအထိ စစ်ကောင်စီက ကောက်ယူရရှိသော စာရင်းများအရ တစ်နိုင်ငံလုံးအတိုင်းအတာဖြင့် ငလျင်ဒဏ် သင့်ခဲ့ရသည့် ဒေသများအားလုံး၌ သေဆုံးခဲ့ရသူ(၁၀၀၂)ဦး၊ ဒဏ်ရာရသူ(၂၃၇၆)ဦးနှင့် ပျောက်ဆုံးနေ သူ(၃၀)ဦးရှိ သည်ဟု သိရသည်။
မြန်မာနိုင်ငံအတွင်း ၂၀၂၅ခုနှစ် မတ်လ(၂၈)ရက်နေ့ မြန်မာစံတော်ချိန် နေ့လယ်(၁၂)နာရီ (၅၁)မိနစ် (၀၂)စက္ကန့် အချိန်က မန္တလေးမြေငလျင်စခန်းမှ အရှေ့မြောက်ဘက် (၂၁)ကီလိုမီတာခန့် ကွာဝေးသော မြန်မာနိုင်ငံပြည်တွင်း (မန္တလေးမြို့၏ အရှေ့ မြောက်ဘက် (၂၀) ကီလိုမီတာခန့်အကွာ)တွင် အင်အား ရစ်(ခ်)တာစကေး (၇.၇) အဆင့်ရှိသည့် အင်အားအလွန်ပြင်းထန် ငလျင်လှုပ်ခတ်သွားခြင်းဖြစ်သည်။
#TachileikNewsAgency
Photo: Singapore Civil Defence Force
