ပါတီစုံဒီမိုကရေစီစနစ်ကို တကယ်လိုချင်ပါက ကဏ္ဋကောစ လုပ်မနေဘဲ ပူးပေါင်းဆောင်ရွက်ရန် အာဏာသိမ်းစစ်ခေါင်းဆောင် မင်းအောင်လှိုင်က ပြောဆိုသည်။

ရုရှားနှင့် ဘယ်လာရုစ်နိုင်ငံတို့မှ ပြန်လာသည့် လေယာဉ်ပေါ်တွင် စစ်ခေါင်းဆောင်က ၎င်းတို့ထောက်တိုင် သတင်းဌာနများမှ တစ်ဆင့် ယင်းသို့ 

ပြောဆိုခြင်းဖြစ်သည်။

“ပါတီစုံဒီမိုကရေစီ ရွေးကောက်ပွဲကို လုပ်မယ်ဖို့အတွက် ကျွန်တော် ပြောခဲ့တာရှိတယ်။ ဒါကျွန်တော်တို့က ခိုင်ခိုင်မာမာလုပ်မှာပါ။ ပါတီစုံဒီမိုကရေစီ စနစ်ကို တကယ်လိုချင်လို့ရှိရင် ကဏ္ဋကောစ(ဆန့်ကျင်လျက်) လုပ်မနေနဲ့ ပူးပေါင်းဆောင်ရွက်ဖို့ပဲ လိုပါတယ်။ အဲ့ဒါလုပ်မယ်ဆိုလို့ရှိရင် ကျွန်တော်တို့နိုင်ငံ မုချအောင်မြင်ရမယ်ဗျ။ မုချအောင်မြင်ရမယ်။ ကျွန်တော်ဒါကိုပြောရဲပါတယ်။ ပြည်သူတွေကို ကျွန်တော် ဒါလေးတော့ ကျွန်တော့်ဘက်က သဘောထားပေါ့ဗျာ။ ကျွန်တော်ဒါကို ပြောပါရစေ။ အားလုံး အစစအရာရာ အောင်မြင်မယ်လို့လည်းကျွန်တော် ယုံကြည်ပါတယ်ဗျာ။”ဟု စစ်ခေါင်းဆောင် မင်းအောင်လှိုင်က ပြောသည်။

၂၀၂၅ခုနှစ် မတ်လ (၇)ရက်နေ့တွင် စစ်ခေါင်းဆောင် နှင့် ဘယ်လာရုစ်နိုင်ငံသမ္မတ လူကာရန်းကော့တို့ ဘယ်လာရုစ်သမ္မတနန်းတော်တွင် တွေ့ဆုံပြီးပြုလုပ်သော သတင်းစာရှင်းလင်းပွဲတွင်လည်း ယခုနှစ်ကုန် ဒီဇင်ဘာလ (သို့မဟုတ်) ၂၀၂၆ ခုနှစ် ဇန်နဝါရီလအတွင်း ရွေးကောက်ပွဲလုပ်မည်ဟု စစ်ခေါင်းဆောင်က ပြောဆိုထားသည်။

“ပါတီစုံဒီမိုကရေစီကို ယုံကြည်တယ်ဆိုလို့ရှိရင် အားလုံးပူးပါင်းဆောင်ရွက်ပေးကြပါလို့လည်း ကျွန်တော်ပြောလိုပါတယ်ဗျာ။”ဟု စစ်ခေါင်းဆောင်က ပြောသည်။

ဘယ်လာရုစ်နိုင်ငံတွင် စစ်ခေါင်းဆောင်က နှစ်နိုင်ငံလွှတ်တော်များအကြား ပူးပေါင်းဆောင်ရွက်ရေးဆိုင်ရာကိစ္စ၊ ဥပဒေပြုရေးရာကိစ္စများတွင် ပူးပေါင်းဆောင်ရွက်ရေး၊ မြန်မာနိုင်ငံတွင် ရွေးကောက်ပွဲကျင်းပနိုင်ရေး ကြိုတင်ပြင်ဆင်နေမှုနှင့် မြန်မာနိုင်ငံ၌ ရွေးကောက်ပွဲကျင်းပချိန်တွင် ဘယ်လာရုစ်နိုင်ငံမှ လေ့လာစောင့်ကြည့်ရေးအဖွဲ့များ စေလွှတ်သွားမည့်အခြေအနေများကို ဆွေးနွေးသည်ဟုလည်း သိရသည်။

စစ်ကောင်စီသည် သန်းခေါင်စာရင်းကို ၂၀၂၄ ခုနှစ် အောက်တိုဘာ (၁)ရက်နေ့မှ (၁၅)ရက်နေ့အထိ ကောက်ယူထားပြီးဖြစ်သည်။

လက်ရှိတွင် စစ်ကောင်စီသည် ၂၀၂၄ ခုနှစ် သန်းခေါင်စာရင်း ရှေ့ပြေးရလဒ်များကို ထုတ်ပြန်ထားသည်။

 

ရှေ့ပြေးလူဦးရေစာရင်း အစီရင်ခံစာတွင် ဖော်ပြချက်အရ မြန်မာနိုင်ငံတွင် လူဦးရေ (၅၁)သန်းကျော်ရှိပြီး (၃၂)သန်းကျော်သာ ကောက်ယူနိုင်ခဲ့ကာ (၁၉)သန်းကျော်ကို မကောက်ယူနိုင်ခဲ့ဟု စစ်ကောင်စီက ဆိုထားသည်။ 

အသေးစိတ်ဆန်းစစ်လေ့လာမှုများ၊ စာရင်းအင်းများပါဝင်သည့် ပင်မအစီရင်ခံစာကို ၂၀၂၅ ခုနှစ်အတွင်း ထုတ်ပြန်ပေးသွားမည်ဟု ဆိုသည်။

စစ်ကောင်စီသည် သန်းခေါင်စာရင်း လုံးဝမကောက်ယူနိုင်သည့် မြို့နယ်(၅၈)မြို့နယ်နှင့် တစ်စိတ်တစ်ဒေသသာ ကောက်ယူနိုင်သည့် မြို့နယ်(၁၂၇)မြို့နယ်ရှိပြီး လူဦးရေ(၁၉)သန်းကျော်ကို ကောက်ယူနိုင်ခဲ့ခြင်းမရှိဟု Data for Myanmar အဖွဲ့က ထုတ်ပြန်ထားသည်။

နွေဦးတော်လှန်ရေးကာလအတွင်း တော်လှန်ရေးအင်အားစုများသည် မြို့ပေါင်း(၉၀)ကျော်ကို သိမ်းထားပြီးဖြစ်ကာ ကျန်မြို့အများစုတွင် တိုက်ပွဲများဆက်ဖြစ်နေသည်။

#TachileikNewsAgency