စစ်ကောင်စီ၏ အမှတ်(၅၉၁) ခြေမြန်တပ်ရင်းမှ စစ်မှုထမ်းတပ်သားနှစ်ဦး ဒေါနတပ်ရင်းထံ ခိုလှုံလာပြီး စစ်ကောင်စီကို ပြန်တိုက်မည်ဟု သိရသည်။
တပ်သားအဖြစ်စုဆောင်းခံခဲ့ရသော ခမရ(၅၉၁)မှ တပ်သားနှစ်ဦးသည် ၂၀၂၅ခုနှစ် ဖေဖော်ဝါရီလ (၂၇)ရက်နေ့တွင် ဒေါနတပ်ရင်း၊ ဒေါနစစ်ကြောင်း (၂)၊ ရေးပြောက်ကျားတပ် (YGF)ထံ ခိုလှုံလာသည်ဟု YGF က ယနေ့တွင် သတင်းထုတ်ပြန်သည်။
ခိုလှုံလာသူနှစ်ဦးမှာ စစ်မှုထမ်း အပတ်စဉ် (၁)တပ်မတော်အရာခံနှင့် ကြီးကြပ်ရေးသင်တန်းကျောင်းမှ စစ်သင်တန်းဆင်း ကိုဇော်ထူးနှင့် အပတ်စဉ် (၆)ဝဲကလိ စစ်သင်တန်းကျောင်းဆင်း ကိုအောင်ပြည့်စုံတို့ဖြစ်သည်ဟု သိရသည်။
၎င်းတို့နှစ်ဦးသည် လမ်းကင်းချိန်တွင် နယ်မြေခံများကို မေးမြန်း၍ ခိုလှုံလာကြခြင်းဖြစ်ပြီး မတရားအတင်းအဓမ္မ တပ်သားစုဆောင်းခံရသူများဖြစ်၍ တစ်ဦးမှာ တပ်ရင်းနှင့်ပူးပေါင်းပြီး စစ်ကောင်စီကို ပြန်တိုက်ခိုက်မည်ဟု သိရသည်။
ဒေါနတပ်ရင်းထံ အလင်းဝင်လာပြီးနောက် တပ်ရင်းတွင် တပ်ဖွဲ့ဝင်အဖြစ် တာဝန်ထမ်းဆောင်နေသူ (၂၃)ဦးရှိပြီဟုလည်း သိရသည်။
#TachileikNewsAgency
