မန္တလေးတိုင်း တံတားဦးမြို့နယ်နှင့် နွားထိုးကြီးမြို့နယ်တို့တွင် တိုက်ပွဲဖြစ်ပြီးနောက် စစ်ကောင်စီတပ်များ တပ်မဆုတ်သေး၍ ကျေးရွာ(၄)ရွာမှ ဒေသခံများ ထွက်ပြေးတိမ်းရှောင်နေရဆဲဖြစ်သည်ဟု မြင်းခြံခရိုင် အမှတ် (၄-၁၀) တပ်ရင်းထံမှ သိရသည်။
တံတားဦးနှင့် နွားထိုးကြီးမြို့နယ်တို့တွင် ဖေဖော်ဝါရီလ (၂၆)ရက်နေ့ကစတင်၍ (၄)ရက်ကြာ တိုက်ပွဲဖြစ်ပြီး နှစ်ဖက်ထိခိုက်မှုရှိကာ စစ်ကောင်စီတပ်၏ မီးရှို့ဖျက်ဆီးမှုများကြောင့် ရွာ(၄)ရွာမှ ဒေသခံများ ယနေ့အထိ ထွက်ပြေးတိမ်းရှောင်နေကြရခြင်းဖြစ်သည်ဟု သိရသည်။
“စစ်ကြောင်းကတော့ တံတားဦးနဲ့ နွားထိုးကြီးမြို့နယ် အစပ်မှာပဲ လောလောဆယ်ရှိသေးတယ်။ လေကြောင်းတိုက်ခိုက်တာတွေကတော့ တိုက်ပွဲဖြစ်တဲ့ ရက်ပိုင်းတွေမှာတော့ တောက်လျောက်လုပ်သွားတာပေါ့နော်။ တိုက်ပွဲထဲမှာ ပစ်ခတ်တာဆိုတော့ ပြည်သူထိခိုက်မှုတော့ မရှိဘူးပေါ့။ အခုအခြေအနေအရကတော့ စစ်ကောင်စီစစ်ကြောင်းက ပြန်မထွက်သေးဘူး။ ဒေသခံစစ်ရှောင်တွေလည်း ရှိနေတယ်ပေါ့နော်။ ရွာ (၄) ရွာလောက်တော့ စစ်ရှောင်နေရတယ်။”ဟု မြင်းခြံခရိုင်အမှတ် (၄-၁၀) တပ်ရင်းမှ ပြောရေးဆိုခွင့်ရှိသူက Tachileik News Agency ကိုပြောသည်။
စစ်ကောင်စီတပ်နှင့် တော်လှန်ရေးတပ်များသည် ဖေဖော်ဝါရီလ (၂၆)ရက်နေ့ ညနေပိုင်းတွင် တံတားဦးမြို့နယ် မြိုင်သာကျေးရွာအနီးတွင် တိုက်ပွဲစတင်ဖြစ်ပွားခဲ့ပြီး ဖေဖော်ဝါရီလ (၂၇)ရက်နေ့ ညနေပိုင်းတွင် နွားထိုးကြီးမြို့နယ် သာစည်လေးကျေးရွာနှင့် မျက်ရှုကျေးရွာ အနီးတဝိုက်တို့တွင် တိုက်ပွဲဆက်ဖြစ်သည်ဟု သိရသည်။
တိုက်ပွဲအတွင်းတွင် စစ်ကောင်စီတပ်က Mi-35 ဖြင့် လေကြောင်းပစ်ကူပေးခဲ့ပြီး ဖေဖော်ဝါရီလ (၂၈)ရက်နေ့ ညနေပိုင်းတွင် နွားထိုးကြီးမြို့နယ် မျက်ရှုကျေးရွာအနီးတွင် ထပ်မံတိုက်ပွဲဖြစ်ပြီးနောက် သာစည်လေးကျေးရွာနှင့် မျက်ရှုကျေးရွာတို့ကို စစ်ကောင်စီတပ်က မီးရှို့ဖျက်ဆီးခဲ့သည်ဟု သိရသည်။
ထို့အပြင် မတ်လ (၁)ရက်နေ့ ညနေပိုင်းတွင် မြင်းခြံမြို့နယ် ကျောက်ကန်ကျေးရွာအနီးတွင် တိုက်ပွဲဖြစ်ရာ စစ်ကောင်စီတပ်က တိုက်လေယာဉ်ဖြင့် (၂)ကြိမ်၊ Mi-35 ဖြင့် (၄)ကြိမ် လေကြောင်းပစ်ကူပေးခဲ့သည်ဟု သိရသည်။
အဆိုပါစစ်ကြောင်းသည် တံတားဦးမြို့နယ် အမြန်လမ်း မိုင်တိုင် (၃၃၅)ဘက်မှ အင်အား(၂၀၀)ဝန်းကျင်ဖြင့် စစ်ကြောင်းထိုးလာခြင်းဖြစ်သည်ဟု သိရသည်။
#TachileikNewsAgency
