မြန်မာ - ထိုင်းနယ်စပ်ဒေသ တာချီလိတ်မြို့ ဆေခမ်းရပ်ကွက်အတွင်းရှိ Shwe Bun Aung Hotel တွင် တရုတ်နိုင်ငံသား တစ်ဦးအား မူးယစ်ဆေးဝါးအမျိုးစုံဖြင့် ဖမ်းဆီးရမိကြောင်း သိရသည်။
Shwe Bun Aung Hotel အတွင်း ၂၀၂၅ခုနှစ် ဖေဖော်ဝါရီလ(၂၃)ရက်နေ့ ညပိုင်းက စစ်တပ်နှင့်ပြည်သူ့စစ်အပါအဝင် ရဲတပ်ဖွဲ့တို့ စစ်ဆေးရာ အခန်းနံပါတ် (၂၀၄)တွင် တည်းခိုနေထိုင်သူ အသက်(၃၀)ဝန်းကျင်ရှိ ဟွမ်လျှို အမည်ရှိ တရုတ်နိုင်ငံသားအား မူးယစ်ဆေးဝါးမျိုးစုံဖြင့် ဖမ်းမိခြင်း ဖြစ်ကြောင်း သိရသည်။
တရုတ်နိုင်ငံသား ဟွမ်လျှို၏ အခန်းအတွင်းမှ ကတ်တမင်း (၅)ကီလို ဝန်းကျင် အပါအဝင် တားမြစ် မူးယစ်ဆေးဝါးအဖြစ် သတ်မှတ်ထားသည့် Happy water (၇)ကီလို၊ Frimin-5 ဆေးကတ် (၃၀၀)ဝန်းကျင်၊ အက်တက်စီ(Ecstasy) အရောင်မျိုးစုံ ဆေးပြား (၃၆၀၀)ကျော် နှင့် ဆက်စပ်ပစ္စည်းများ သိမ်းဆည်းရမိခြင်း ဖြစ်ကြောင်း သိရသည်။
မူးယစ်ဆေးဝါးများနှင့်အတူ ဖမ်းဆီးရမိသည့် တရုတ်နိုင်ငံသားမှာ တာချီလိတ်သို့ တရားမဝင်နည်းလမ်းဖြင့် ရောက်ရှိနေထိုင်သူဖြစ်ကြောင်း နှင့် ၎င်းအား ဟောင်လိတ်နယ်မြေရဲစခန်းတွင် ဖမ်းဆီးချုပ်နှောင်ထားပြီး စစ်ဆေးနေလျှက်ရှိကြောင်း သိရသည်။
