ရှမ်းပြည်နယ်(အရှေ့ပိုင်း) ကျိုင်းတုံမြို့တွင်း မြို့မအားကစားကွင်း ပတ်လည်ရှိ ဆိုင်ခန်းပေါင်း (၁၄၀)ကျော်ကို သက်ဆိုင်ရာက ဖယ်ရှားမည်ဖြစ်သည့်အတွက် ဆိုင်ခန်း အရောင်းအဝယ်ပြုလုပ်သူများ သတိထားကြရန် အသိပေးထားကြောင်း သိရသည်။
ကျိုင်းတုံခရိုင်အားကစားနှင့်ကာယပညာဦးစီးဌာန၏ ကြီးကြပ်မှုအောက်ရှိ ကျိုင်းတုံမြို့မအားကစားကွင်း ပတ်လည်တွင် (၁၀)ပေ ပတ်လည်ရှိ ဆိုင်ခန်းပေါင်း (၁၄၄)ခန်းကို ဖျက်သိမ်းရန် နှင့် ငှားရမ်းစာချုပ် ထပ်မံချုပ်ဆိုခြင်းကို ခွင့်မပြုတော့ကြောင်း ရှမ်းပြည်နယ်အားကစားနှင့်ကာယပညာဦးစီးဌာနက ညွှန်ကြားထားသည့်အတွက် ခရိုင် အား/ကာ က ထပ်မံအသိပေးထားခြင်း ဖြစ်ကြောင်း သိရသည်။
ကျိုင်းတုံမြို့မအားကစားကွင်း ပတ်လည်တွင် အဆိုပါ ဌာနက ၁၉၉၀ ဝန်းကျင်တွင် အကျယ် အဝန်း (၁၀)ပေ ပတ်လည်ဖြင့် ဆိုင်ခန်းပေါင်း (၁၄၄)ခန်းကို နှစ်(၂၀) သက်တမ်းဖြင့် ငှားရမ်းစာချုပ် ချုပ်ဆိုပြီး ငှားရမ်းပေးထားခြင်း ဖြစ်ကြောင်း သိရသည်။
သက်တမ်းအားဖြင့် နှစ်(၂၀)ကျော်လွန်ပြီးနောက် ထပ်မံ သက်တမ်းတိုးခြင်းအဖြစ် (၃)နှစ်သက်တမ်းတိုးမှုများကို ၂၀၀၉၊ ၂၀၁၁၊ ၂၀၁၃ နှင့် ၂၀၁၉ခုနှစ်များတွင် နှစ်တိုးငှားရမ်းမှုများ ပြုခဲ့သော်လည်း ယခုအခါတွင် သက်တမ်း ဆက်လက်တိုးခွင့်မပေးတော့ဘဲ ဆိုင်ခန်းများအားလုံးကို ဖျက်သိမ်းရန် အထက်ဌာနက ညွှန်ကြားထားခြင်း ဖြစ်သည်ဟု သိရသည်။
"အား/ကာ ကတော့ ဖျက်သိမ်းရေးနဲ့ သက်တမ်းတိုးခွင့် မရှိတော့ကြောင်း စာကို ဆိုင်ခန်းတွေကို ပေးတာတော့ရှိတယ်။ တခြားလူတွေ သိအောင်တော့ အသိပေးထားတာတော့မရှိဘူး။ သူတို့က သက်တမ်းလည်း တိုးခွင့်မပေးတော့ဘဲ ဖျက်သိမ်းမယ်ဆိုတော့ ဒီနေရာကို ဘယ်သူ့ကို လုပ်ကိုင်ခွင့်ပေးမှာလဲ ဆိုတာကိုလည်း မသိရသလို။ ဒီနေရာကို ဘာအတွက် အသုံးချမလဲ။ ဒီအတိုင်းထားမလားဆိုတာလည်း ပွင့်လင်းမြင်သာစွာ မသိရဘူး။"ဟု နှစ်ရှည်ကြာ ဆိုင်ခန်းငှားရမ်းကာ ဈေးရောင်ချသူ တစ်ဦးက Tachileik News Agency သို့ ၂၀၂၅ခုနှစ် ဖေဖော်ဝါရီလ(၁၉)ရက်နေ့တွင် ပြောသည်။
"ဒီဆိုင်ခန်းတွေကို မှီခိုပြီး နေကြတဲ့ မိသားစုဝင်တွေ အများကြီးရှိတယ်။ ဆိုင်ခန်းတွေကို ဖယ်ရှားမယ်ဆိုရင် ဘာလုပ်ရတော့မလဲ။ ဒီအတွက်ကိုလည်း ထည့်သွင်းစဉ်းစားပေးသင့်ပါတယ်။ အလုပ်အကိုင်မဲ့ပါ ဖြစ်သွားတော့မယ်"ဟု ၎င်းက ဆိုသည်။
