ထိုင်းနိုင်ငံအတွင်း COVID-19 ကူးစက်မှုကို ထိန်းချုပ်နိုင်ရန်အတွက် ထိုင်းနိုင်ငံက တာချီလိတ် နှင့် မယ်ဆိုင်အကြား ရှိ မြန်မာ - ထိုင်း ချစ်ကြည်ရေး အမှတ်(၁)တံတားအား ၂၀၂၀ခုနှစ် မတ်လ(၂၂)ရက်နေ့ မြန်မာ စံတော်ချိန် ည(၈)နာရီခွဲအချိန်က စတင်ပိတ်လိုက်ပြီဖြစ်သည်။
တာချီလိတ်ရှိ ချစ်ကြည်ရေးတံတားနှစ်စင်း အနက် ကုန်စည်များပို့ဆောင်ရာတွင် အဓိက အသုံးပြုသည့် ချစ်ကြည်ရေးတံတား(၂)အား မတ်လ(၂၃)ရက်နေ့က စ၍ ပြန်လည်ကာ ဖွင့်လှစ်ပေးမည်ဖြစ်ပြီး COVID-19 ထိန်းချုပ်ကာကွယ်ရေးအတွက် ချစ်ကြည်ရေးတံတား(၂)ပေါ် ကုန်စည်ပို့ဆောင်ရာတွင် ယာဉ်မောင်းများကို ကန့်သတ်မည် ဖြစ်ကြောင်း သိရသည်။
မတ်လ(၂၃)ရက်နေ့က စ၍ ချစ်ကြည်ရေးအမှတ်(၂)တံတားပေါ်မှ ထိုင်းနိုင်ငံဘက်က စက်သုံးဆီ၊ အိမ်ဆောက်ပစ္စည်းများ၊ စားသောက်ကုန်ပစ္စည်းများ၊ ဆေးရုံသုံးပစ္စည်းများ စသဖြင့် ဝယ်ယူသယ်ဆောင်ခွင့်ပြုမည်ဖြစ်သော်လည်း လူနာပို့ဆောင်ခြင်း၊ လူဖြတ်သန်းသွားလာခြင်းကို ထိုင်းနိုင်ငံဘက်မှ ခွင့်ပြုမည်မဟုတ်ကြောင်း သိရသည်။
ယခုလို တံတား(၁)အား ထိုင်းနိုင်ငံဘက်က ပိတ်လိုက်ခြင်းသည် COVID-19 ရောဂါကူးစက်မှုကို ထိန်းချုပ်ရေးအတွက်သာဖြစ်သည့်အတွက် မြန်မာဘက်က ကုန်စည်များကို တံတား(၂)က သယ်ယူရရှိနိုင်ရန် ညှိနှိုင်းကာ အဆင်ပြေမှု ရရှိထားသည့်အတွက် တံတား(၁)နည်းတူ မှန်လုံယာဉ်အသေးဖြင့် ကုန်ပစ္စည်းများအား တစ်ပိုင်တစ်နိုင် သယ်ယူနိုင်မည်ဖြစ်သည့်အတွက် ဒေသတွင်းနေပြည်သူများအနေဖြင့် စိုးရိမ်စရာမလိုသည့်နည်းတူ ကုန်စည်ဒိုင်များ နှင့် ကုန်စုံဆိုင်များအနေဖြင့် ဈေးနှုန်းမြှင့်တင်ရောင်းချြခင်း မပြုရန်လည်း တာချီလိတ်ခရိုင်စီမံခန့်ခွဲမှုကော်မတီက အသိပေးထားရှိသည်။
Tachileik News Agency
